जेनजी आन्दोलनपछि शिथिल बनेको बजारमा विश्वकर्मा पूजाले रौनक
स्पर्श खबर जितपुर (बारा), भदौ ३१
जेन–जी आन्दोलनका कारण केही दिनदेखि शिथिल बनेको जितपुर बजारमा विश्वकर्मा पूजाले पुनः रौनक थपिएको छ । बारा जिल्लाको जितपुरसिमरा उपमहानगरपालिका–७ स्थित जितपुर बजारमा विगतका दिनभन्दा आज उल्लेख्य चहलपहल देखिएको छ ।
भोलि असोज १ गते पर्न आउने विश्वकर्मा पूजालाई लक्षित गर्दै बजारमा ग्राहकहरूको भीड बढेको व्यापारीहरूले जनाएका छन् । विशेषगरी मेसिनरी उपकरण, निर्माण सामग्री, कपडा तथा दैनिक उपभोग्य वस्तु खरिद गर्न आउनेको संख्या बढेसँगै स्थानीय व्यापारीहरूमा उत्साह छाएको छ ।
विश्वकर्मा पूजा प्रविधि र मेसिनरीको आराधना गरी भगवान विश्वकर्मालाई सम्झिने दिनका रूपमा मनाइन्छ । नेपालमा असोज १ गतेलाई विश्वकर्मा दिवसका रूपमा मनाउने गरिन्छ भने भारतमा समेत यस दिनलाई कारखाना, उद्योग तथा श्रमिक वर्गको पर्वका रूपमा विशेष महत्त्व दिइन्छ ।
बजारमा सजावट, पूजाका सामग्री खरिद, विभिन्न मेला–मेलाप्रति आकर्षणले यहाँको वातावरण चहकिलो बनेको छ । अघिल्लो सातादेखि आन्दोलनका कारण प्रभावित बनेको आर्थिक गतिविधि पूजाको अवसरले पुनः सक्रिय बनेको स्थानीय व्यापारीहरूको धारणा छ ।
साथै, स्थानीय स्तरमा आयोजित मेला तथा पूजाले सामाजिक मेलमिलाप र धार्मिक सद्भाव बढाउन सहयोग पुर्याउने अपेक्षा गरिएको छ ।
