कांग्रेसले बोलायो केन्द्रीय समितिको आकस्मिक बैठक
काठमाडाैं | मंसिर ३, २०८१
नेपाली कांग्रेसले केन्द्रीय कार्यसमितिको आकस्मिक बैठक बोलाएको छ । पूर्वसभामुख दमननाथ ढुंगानाको निधनप्रति शोक प्रस्ताव पारित र श्रद्धाञ्जली अर्पण गर्न केन्द्रीय कार्यसमितिको आकस्मिक बैठक बोलाइएको कांग्रेस केन्द्रीय कार्यालयका सचिव प्रेम केसीले जानकारी दिए ।
बैठक आज साढे १० बजे कांग्रेस केन्द्रीय कार्यालय सानेपामा बस्नेछ ।
ढुंगानाको निधनपछि सभापति शेरबहादुर देउवा सुदूरपश्चिमको भ्रमण छोट्याएर काठमाडौं फर्किएको जानकारी केसीले दिए ।
पूर्वसभामुख एवं वकिल ढुंगानाको आइतबार काठमाडौंमा निधन भएको थियो । उनको आजै राष्ट्रिय सम्मानका साथ अन्त्येष्टि गरिँदै छ ।
उनको निधनमा राष्ट्रिय शोक घोषणा गर्दै सरकारले आज सार्वजनिक बिदासमेत दिएको छ ।
२०४८ मा कांग्रेसबाट सभामुख बनेका ढुंगाना २०५१ सालको निर्वाचनमा भने पराजित भएका थिए । त्यसपछि पार्टी राजनीतिबाट टाढिएका थिए ।
बीचमा शान्ति प्रक्रिया, मानव अधिकार, वकिलको रूपमा सक्रिय रहे । फेरि २०७४ सालमा भएको निर्वाचनमा ढुंगाना भक्तपुर २ बाट उम्मेदवार बनेका थिए । तर कांग्रेसबाट उम्मेदवार बनेका उनी पराजित हुन पुगेका थिए ।
