चितवनमा आजपाको जिल्ला भेला सम्पन्न : भेलाद्वारा विभिन्न कमिटीहरु गठन
मनाेज शाह, जीतपुर बारा, चैत १७ गते:
आम जनता पार्टीले देशैभरिका सबै तहमा आफ्नो पकड बलियो बनाउन भरमग्दुर प्रयास जारी राखेको छ । यसै क्रममा आम जनता पार्टीले चितवनमा जिल्ला भेला सम्पन्न गरेको छ । आज उद्योग वाणिज्य संघ चितवनको सभा हलमा आजपाको प्रथम ऐतिहासिक चितवन जिल्ला भेला निकै हर्षोल्लासपूर्वक सभ्य एवं भव्य रुपमा सम्पन्न भएको छ । आजपाका वरिष्ठ उपाध्यक्ष उपेन्द्र साहको प्रमुख आतिथ्य एवं उपाध्यक्ष अरुण घिसिंङको बिशेष उपस्थितिमा सम्पन्न उक्त ऐतिहासिक भेलाबाट लोकप्रिय व्यक्तित्व मीन बहादुर खत्री ईन्चार्ज, तुल बहादुर थापामगर अध्यक्ष, रामनारायण साह र रामजी बिक उपाध्यक्ष, श्याम पटेल सचिव, कोशिला बराल कोषाध्यक्ष तथा निराजन साह सहसचिवमा निर्वाचित भएका छन् । उक्त भेलाले ५१ सदस्यीय पार्टी जिल्ला कमिटी गठन गर्नुको साथै लोकप्रिय महिला नेतृ अस्मिता खकुरेलको अध्यक्षतामा आम महिला मोर्चाको जिल्ला कमिटी, युवा नेता बिक्रम गुरुङको अध्यक्षतामा आईटी आर्मीको जिल्ला कमिटी लगायतका कमिटीहरु सर्वसम्मत रुपमा गठन गरेको छ ।
