प्रभु साहको नेतृत्वमा आम जनता पार्टीको संगठन सुदृढ, महिला सशक्तिकरणको ‘मोडेल आईटी आर्मी’ अभियान
स्पर्श खबर जितपुर बारा पुस २ गते। प्रभु साहको नेतृत्वमा रहेको आम जनता पार्टीले संगठन विस्तारसँगै महिला सशक्तिकरणलाई केन्द्रमा राख्दै ‘मोडेल आईटी आर्मी’ अभियान अघि सारेको छ। आधुनिक प्रविधि, डिजिटल साक्षरता र सूचना प्रवाहलाई राजनीतिक संगठनसँग जोड्दै महिलालाई नेतृत्व तहमा पुर्याउने उद्देश्यसहित यो अभियान सञ्चालन गरिएको पार्टीले जनाएको छ।
पार्टीका अनुसार ‘मोडेल आईटी आर्मी’ मार्फत महिलालाई सूचना–प्रविधिमा दक्ष बनाइ संगठन, नीति निर्माण र जनसम्पर्कमा सक्रिय सहभागिता गराइनेछ। सामाजिक सञ्जाल व्यवस्थापन, डिजिटल अभियान, तथ्य–आधारित सूचना प्रवाह र साइबर सचेतनाजस्ता विषयमा तालिम प्रदान गरिने योजना छ। यसले महिलाको आत्मनिर्भरता बढाउनुका साथै पार्टीको संगठनात्मक क्षमता समेत सुदृढ बनाउने विश्वास गरिएको छ।
नेतृत्वले ग्रामीणदेखि शहरी क्षेत्रसम्म महिलाको पहुँच विस्तार गर्दै युवती र महिलालाई टेक्नोलोजी–मैत्री राजनीति तर्फ आकर्षित गर्ने लक्ष्य लिएको छ। प्रभु साहले समावेशी र आधुनिक संगठन निर्माणका लागि महिला सहभागिता निर्णायक हुने उल्लेख गर्दै, आईटी आर्मी अभियान पार्टीको दीर्घकालीन रणनीतिक कदम भएको बताए।
आम जनता पार्टीले निकट भविष्यमै प्रदेश तथा स्थानीय तहमा महिला आईटी आर्मी इकाइ गठन गर्ने, नियमित तालिम सञ्चालन गर्ने र सफल अभ्यासलाई ‘मोडेल’का रूपमा विस्तार गर्ने तयारी गरेको छ। पार्टीका अनुसार यस अभियानले महिला सशक्तिकरणलाई व्यवहारिक परिणाममा रूपान्तरण गर्ने अपेक्षा गरिएको छ।
