अमेरिकाको क्यालिफोर्निया राज्यको लस एन्जलसको जंगलमा लागेको आगो सहरमा पनि फैलिएर विकराल रुप लिएको छ।
मंगलबार सुरु भएको आगोले हालसम्म ४,८५६ हेक्टर क्षेत्रफल प्रभावित भएको छ। आगलागीमा लगभग १,१०० भवनहरू पूर्ण रूपमा जलेका छन्। साथै २८ हजार घरमा क्षति पुगेको छ।
जंगलमा फैलिएको आगोका कारण हालसम्म ५ जनाको मृत्यु भएको पुष्टी भएको छ। करिब ५० हजार मानिसहरूलाई तुरुन्तै घर खाली गर्न भनिएको छ। करिब ३ लाख मानिसहरूलाई सुरक्षित स्थानमा जान निर्देशन दिइएको छ। प्रशासनले शहरमा आपतकाल घोषणा गरेको छ।
लस एन्जलस शहरको विलासी पालिसेड्स क्षेत्रमा रहेको धेरै हलिउड स्टारहरूको बंगला आगलागीले ध्वस्त पारेको छ। मार्क ह्यामिल, पेरिस हिल्टन, जेमी ली कर्टिस, म्यान्डी मूर, मारिया श्रीभर, एश्टन कुचर, जेम्स वुड्स र लेइटन मिस्टर लगायत धेरै हलिउड स्टारहरूको घरमा आगलागी भएको छ। धेरै सेलिब्रेटीहरूले आफ्नो घर छोड्नु परेको छ।आगलागीका कारण लस एन्जलसको ब्रेटनवुड क्षेत्रमा रहेको उपराष्ट्रपति कमला ह्यारिसको घर खाली गर्न निर्देशन दिइएको छ। लस एन्जलस अमेरिकाको सबैभन्दा बढी जनसंख्या भएको काउन्टी हो। यहाँ १ करोडभन्दा बढी मानिसहरू बसोबास गर्छन्। यहाँको फिल्म उद्योगको नाम प्रसिद्ध हलिउड क्षेत्रको नामबाट राखिएको छ।
क्यालिफोर्नियामा हेलिकप्टर र विमानको सहयोगमा आगो नियन्त्रण गर्ने प्रयास भइरहेको छ । तीव्र हावा र हावाको दिशा परिवर्तन भइरहेकोले आगो विभिन्न ठाउँमा फैलिरहेको छ। उद्धार टोलीले हजारौं मानिसहरूलाई सुरक्षित स्थानहरूमा सारिरहेको छ। विद्यालय, सामुदायिक केन्द्र र अन्य सुरक्षित स्थानहरूलाई आपतकालीन आश्रयस्थलको रूपमा तयार पारिएको छ।
