महावीर पुनले पर्सामा युगान्तकारी परिवर्तन ल्याउन सक्ने

रन्जित कुमार चाैधरी फागुन २० गते :

नेपालका दुर्गम क्षेत्रहरूमा ताररहित इन्टरनेट प्रविधिको पहुँच पुर्‍याएर आफ्नो अद्वितीय पहिचान बनाउन सफल भएका महामानव, महान् वैज्ञानिक, समाजसेवी एवम् उदार हृदयका धनी महावीर पुन अहिले निकै चर्चाको शिखरमा छन् ।

पर्साको वीरगन्जमा रहेको कृषि औजार कारखाना वर्षौंदेखि बन्द अवस्थामा छ । यही कृषि औजार कारखानाको पुनर्स्थापना तथा संचालनका लागि उनले कयौं मन्त्रालयको ढोका ढक्ढक्याए, प्रधानमन्त्रीसमक्ष पनि हारगुहार गरे तर बजेट अभावको कारण देखाउँदै सबैतिरबाट निराशाजनक प्रतिक्रिया हात लाग्यो । त्यसपछि खाने मुखलाई जुँगाले छेक्दैन भनेझैँ वीरगन्ज कृषि औजार कारखाना लिमिटेड पुनः संचालन गर्ने आफ्नो दृढ अठोट पूरा गर्ने हेतुले रकम सङ्कलन गर्न उनी एकल अभियानमा लागेका छन् ।

‘रामोन म्यागासेसे’ पुरस्कार प्राप्त गर्न सफल प्रतिभाशाली व्यक्तित्वका धनी महावीर पुनले ‘महावीर पुन सम्झना,सपना र अविरल यात्रा’ नामक १८ शीर्षकमा रहेको ३०६ पेजमा संलग्न आत्मकथाको पुस्तक बेच्दै वीरगन्जमा रहेको कृषि औजार कारखानाको लागि रकम संकलन गर्दै छन् ।

सूचना तथा प्रविधिमार्फत देश विकासका अनेकौं सम्भावनाको खोजी गर्न र नवीनतम् आविष्कार गर्ने उद्देश्यले मुनाफा रहित संस्था ‘राष्ट्रिय आविष्कार केन्द्र’ को स्थापना गरेर प्रविधिको खोजी र अनुसन्धानमा तल्लीन रहँदै आएका महावीर पुनले नेपालका विभिन्न ठाउँमा पुग्दै आफ्नो आत्मकथा समेटिएको पुस्तक बेच्दै छन् ।

विज्ञान र प्रविधिको उन्नयनमा महत्वपूर्ण योगदान दिएका पुनले वीरगन्जमा रहेको कृषि औजार कारखाना पुन: संचालनमा ल्याउने सपना पूरा गरे भने उनको यस सफलताले पर्सामा युगान्तकारी परिवर्तन ल्याउने छ साथै यस क्षेत्रकै सम्पूर्ण जनताको मुहारमा खुशी छाउने छ । कृषि औजार कारखानाको संचालनले यस क्षेत्रकै आर्थिक विकासमा टेवा पुग्ने पक्का छ ।

सन् १९५५ जनवरी २२ मा म्याग्दीको नागी गाउँमा जन्मिएका महावीर पुनले सन् १९८९ मा नेब्रास्का विश्वविद्यालयबाट विज्ञान शिक्षामा स्नातकोत्तर गरेका छन् । देश र जनताको लागि केही गर्नुपर्छ भन्ने असल सोच र महान् चिन्तन भएका महावीर पुनले पर्साबासीका सन्तानका उज्ज्वल भविष्य कृषि औजार कारखानासँग जोडिएको कुरा बताउँदै यो कारखाना देशकै लागि बलियो मेरुदण्ड साबित हुने जनाएका छन् ।

कृषि औजार उत्पादन गर्ने महान् लक्ष्यका साथ अगाडि बढिरहेका महावीर पुनले कृषि औजार कारखानाको पुनर्निर्माण तथा संचालनका लागि होस्टेमा हैंसे गर्न सम्पूर्ण देशप्रेमी नेपाली दाजुभाइ तथा दिदीबहिनीहरुमा आग्रह गरिरहेका छन् । उनको यस प्रयासका लागि सम्मानका साथ हामी पर्साबासीले पनि उनको यस अभियानमा सहयोग गर्नु आवश्यक छ ।

लेखक :- रन्जित कुमार चौधरी

वनरक्षक पदमा आवेदन माग

स्पर्श खबर जितपुर बारा फागुन १४ गते:

कोशी प्रदेश लोक सेवा आयोग प्रदेश निजामती सेवाअन्तर्गत प्राविधिक तर्फका प्रदेश वन सेवा अन्तरगतको जनरल फरेष्ट्री समूहको आधारभूत तहमा वन रक्षक पदको खुला तथा समावेशी प्रतियोगितात्मक परीक्षाको विज्ञापन प्रकाशित गरेको छ । प्रदेश निजामती सेवा तर्फका निम्न सेवा, समूह, उपसमूह तथा तहका पदहरूमा (खुला तथा समावेशी) प्रतियोगितात्मक परीक्षाद्वारा पदपूर्ति गर्नुपर्ने भएकोले योग्यता पुगेका उम्मेदवारहरूबाट दरखास्त आव्हान गरिएको हो ।

तोकिएको न्यूनतम योग्यता पुगेका उम्मेदवारहरूले आयोगको अनलाइन दरखास्त प्रणाली psconline.pl.gov.np मार्फत आवेदन दिनुपर्नेछ । सेवाका शर्त र तलब तथा अन्य सुविधा प्रचलित कानून बमोजिम हुनेछ ।

परीक्षामा शारीरिक परीक्षण, तन्दुरुस्ती परीक्षा, लिखित परीक्षा र अन्तर्वार्ता लिइनेछ । शारीरिक परीक्षण, तन्दुरुस्ती परीक्षा तथा लिखित परीक्षाको परीक्षा केन्द्र आयोगले पछि सूचना प्रकाशन गरे बमोजिम हुनेछ ।

प्रत्येक विज्ञापनका लागि दरखास्त दस्तुर रु. ३००/- (तीन सय मात्र) बुझाउनुपर्नेछ । समावेशी समूह तर्फका थप विज्ञापनमा आवेदन दिने उम्मेदवारको हकमा प्रत्येक थप समूहका लागि रु. १००/- (एक सय) थप दस्तुर बुझाउनुपर्नेछ ।

गढीमाई साझेदारी वन व्यवस्थापन समिति, पथलैयामा दिउँसो १ बज्दा पनि हाकिम अनुपस्थित

मनोज  शाह, जीतपुर बारा, फागुन १३ गते

जीतपुरसिमरा उमनपा -१ पथलैयामा अवस्थित गढीमाई साझेदारी वन व्यवस्थापन समितिमा व्यापक भ्रष्टाचार भएको बारे सत्य तथ्य बुझ्न तथा समाचार तयार गर्ने प्रयोजनका लागि आवश्यक सूचना माग गर्न संचारकर्मीहरु गढीमाई साझेदारी वन व्यवस्थापन समितिको कार्यालय पथलैयामा पुग्दा त्यहाँ सबै कक्षहरुमा ताल्चा लागेको थियो । दिउँसोको १ बजिसक्दा पनि गढीमाई साझेदारी वन व्यवस्थापन समितिका एक जना सदस्य अजित सिंह तथा एक दुईजना कर्मचारीबाहेक अरु कोही पनि देखिएनन् ।

नेपालको संविधानमा नागरिकको मौलिक हक अन्तर्गत सूचनाको हकको व्यवस्था रहेको हुँदा सूचनाको हक सम्बन्धी ऐन २०६४ को दफा ३ र ७ (१) अनुसार गढीमाई साझेदारी वन व्यवस्थापन समिति, पथलैयासँग सम्बन्धित सार्वजनिक सरोकारका विषयसँग सम्बन्धित आवश्यक सूचना माग गर्न आज दिउँसो १२ बजेको समयमा संचारकर्मीहरु गएको बेलामा त्यस कार्यालयका अध्यक्ष, उपाध्यक्ष तथा लेखापालको कार्यकक्षमा ताल्चा लागेको थियो । उनीहरु कार्यालयमा आउने आशामा दिउँसो १ बजेसम्म पर्खदा पनि उनीहरुमध्ये कोही पनि कार्यालयमा उपस्थित भएनन् । कार्यालयमा हाजिर हुने समय बिहान १० बजे हो भन्ने जगजाहेर भए पनि यस कार्यालयका हाकिमहरु आधा दिन बितिसक्दा पनि कार्यालयमा उपस्थित भएनन् । केही सीप नलागेर संचारकर्मीहरुले त्यहाँ उपस्थित गढीमाई साझेदारी वन व्यवस्थापन समितिका एक जना सदस्य अजित सिंहलाई नै निवेदन जिम्मा लगाएर फर्किन बाध्य भएका छन् ।