बिल बिजक भन्दा बढी चुकुन्दर लोड रहेको मालवाहक पिकअप पर्सा प्रहरीको  नियन्त्रणमा ।
मनाेज शाह जितपुर बारा फागुन १३ गते:

बिल बिजक भन्दा बढी चुकुन्दर लोड रहेको मालवाहक पिकअप पर्सा प्रहरीको  नियन्त्रणमा ।

  गएराती बिल विजक भन्दा बढी चुकुन्दर बोकेको माल बाहक पिकअप  गाडी पर्सा प्रहरीले पक्राउ गरेको छ ।  वीरगञ्जबाट काठमाण्डौतर्फ जाँदै गरेको छ भन्ने सूचनाको आधारमा जिल्ला पर्सा वीरगञ्ज महानगरपालिका वडा नं.१४ गण्डक चोक स्थित सडकखण्डमा प्रदेश ३-०१-०२४ च ३५८९ नम्बरको मालवाहक पिकअपलाई रोकी जाँच गर्ने क्रममा विल विजक भन्दा बढी चुकुन्दर लोड रहेको तथा सो विल बिजक संकास्पद देखिएको हुँदा  चौतीस हजार आठ सय बराबरको चुकुन्दर नियन्त्रणमा लिई थप अनुसन्धान तथा आवश्यक कारवाहीको लागि   राजश्व अनुसन्धान कार्यालय पथलैया, बारामा    प्रवक्ता तथा सुचना अधिकारी प्रहरी नायबउपरीक्षक  कुमार बिक्रम थापाले बताए  ।

सन्तानको जन्मदर्ता गर्न बाबु अनिवार्य नहुने, आमा सूचक भई आएमा इन्कार नगर्न आदेश

स्पर्श खबर जितपुर बारा फागुन १३ गते:

सन्तानको जन्मदर्ता गर्न बाबु अनिवार्य नहुने, आमा सूचक भई आएमा इन्कार नगर्न आदेश ।

। सर्वोच्च अदालतले बाबुले इन्कार गरेमा वा फेला नपरे पनि आमा सूचक भई जन्म दर्ता गर्न आएमा छोराछोरीको जन्मदर्ता गर्न बाध्य हुने आदेश स्थानीय पञ्जिकाधिकारीहरूलाई गरेको छ ।

महिला,कानून र विकास मञ्चको कानूनी सहयोगमा धादिङ धुनिवेसीका करण केसीले दायर गरेको रिटमाथि प्रारम्भिक सुनुवाइ गर्दै अदालतले आमा सूचक भई निवेदकको जन्म दर्ता गर्न आएमा कानून बमोजिम जन्म दर्ता गर्न इन्कार नगर्न अन्तरिम आदेश दिएको हो ।

न्यायाधीश विनोद शर्माको एकल इजलासले करन केसीको हकमा दिएको यो आदेश बाबु ठेगान नभएको वा बाबुले अश्वीकार गरेका कारण जन्म दर्ताबाट बन्चित भई नागरिकतासमेत नपाएका छोराछोरीका हकमा पनि लागू हुने बाटो खुलेको छ ।सभार नेपाल प्रेस डट कम।

यसैलाई आधार मानेर त्यस्ता व्यक्तिले रिट दायर गर्न सक्ने र अदालतको पूर्ण पाठ आएमा नजिर बन्ने बरिष्ठ अधिवक्ता मिरा ढुंगानाले बताइन् । अदालतले नागरिकता जस्तो गम्भीर र संवेदनशील विषयसँग् सम्बन्धित मुद्दा भएकाले यसलाई छिटो किनारा लगाउन अग्राधिकार समेत दिएको छ ।

धादिङ धुनीवेसी गाउँपालिका ८ कार्यालयले आमा सूचक भई आएको अवस्थामा जन्म दर्ता प्रमाणित नगरेकाले आमा गंगा भण्डारीका छोरा करण केसी अदालतमा गएका थिए ।

गढीमाई साझेदारी वन व्यवस्थापन समिति, पथलैयामा कर्मचारी नियुक्तिमा व्यापक अनियमितता

मनोज  शाह, जीतपुर बारा, फागुन ११ गते

जीतपुरसिमरा उमनपा -१ पथलैयामा अवस्थित गढीमाई साझेदारी वन व्यवस्थापन समितिले गरेको कर्मचारी नियुक्तिमा व्यापक अनियमितता भएको छ । सो कार्यालयमा विगत साउन महिनादेखि कार्य गर्दै आएका २ जना कर्मचारीहरुको नियुक्ति नियमसङ्गत ढङ्गले नभएको देखिएको छ ।

गढीमाई साझेदारी वन व्यवस्थापन समितिमा काम गर्दै आएका नवनियुक्त दुई कर्मचारीहरुले आफूहरुले विगत केही महिनादेखि तलब नपाएको गुनासो स्पर्श खबरलाई गरेपछि सो बारे बुझ्न जाँदा नवनियुक्त कर्मचारीहरुको नियुक्ति नै गैरकानुनी ढङ्गले भएको रहस्य खुलेको छ ।

कुनै पनि सरकारी संस्था वा निकायमा कर्मचारी नियुक्ति गर्दा सर्वप्रथम कुनै रेडियो, टि.भी, पत्रपत्रिका आदिमा विज्ञापन निकाल्नुपर्ने हुन्छ । त्यसपछि बाँकी प्रक्रिया अगाडि बढ्छ तर गढीमाई साझेदारी वन व्यवस्थापन समितिमा कर्मचारी नियुक्ति गर्दा नियमकानुन मिचेर, कुनै पनि प्रक्रिया नपुर्याइकन, आन्तरिक मिलोमतोमा दुईजना कर्मचारीहरुको नियुक्ति भएको बुझिएको छ ।

गैरकानुनी ढङ्गले नियुक्ति भएकामध्ये चैनपुर, परवानीपुर – ४ निवासी ४२ वर्षीय हरेराम साह वि.सं. २०८० साउन १४ गतेदेखि जीतपुरसिमरा उमनपा -१ पथलैयामा अवस्थित गढीमाई साझेदारी वन व्यवस्थापन समिति कार्यालयमा कार्य गर्दै आएको उनले स्पर्श खबरलाई बताए । यसैगरी पर्साको बहुदरमाई नगरपालिका वडा नं. ४ निवासी निशेष यादवलाई पनि प्रक्रिया नपुर्याईकन सोही कार्यालयमा नियुक्ति गरिएको छ । उनी विगत दुई महिनादेखि यस कार्यालयमा कार्य गर्दै आएका छन् । गढीमाई साझेदारी वन व्यवस्थापन समिति, पथलैयाको कार्यालयले काठ बिक्री वितरणमा भ्रष्टाचार गर्नुका साथै कर्मचारी नियुक्तिमा समेत व्यापक अनियमितता तथा चरम लापरबाही गरेको देखिन्छ ।

२३ दिन पैदल हिँडेर राजधानी पुगे मिटरब्याज पीडित न्यायकाे

जितपुर बारा फागुन १० गते:

न्यायको माग गर्दै पूर्वको झापा र पश्चिमको कञ्चनपुरबाट एकसाथ पैदलमार्चमा निस्किएका चार हजार मिटरब्याजपीडितहरू बुधबार काठमाडौं आइपुगेका छन् ।

मिटर ब्याजी साहूको पासोबाट छुटकारा पाउन माग गर्दै २३ दिनको पैदल यात्रापछि बुधबार साँझ थानकोटबाट काठमाडौं प्रवेश गरेका हुन् ।

माघ १६ मा यात्रा थालेयता निरन्तर सडकमै गाँसबास गरेर आएका उनीहरूले बुधबार राति त्रिभुवन पार्कमा चिसो भुँइमा रात कटाए । उनीहरूले आज बिहीबार सिंहदरबार मार्च गर्दैछन् । सरकारलाई झक्झकाउन र न्यायका लागि दबाब दिन थानकोटदेखि सिंहदरबारसम्म पैदलमार्च गर्ने कार्यक्रम रहेको मिटरब्याज तथा ठगीविरुद्ध किसान संघर्ष समितिका प्रवक्ता नीर्ग नवीनले बताए ।

‘हामी तीन वर्षदेखि संघर्षमा छौँ । पटक-पटक आन्दोलन गर्नुपरेको छ । सरकारसँग बार्ता पनि भएको छ । तर सरकारले हामीलाई न्याय दिन चाहेको छैन,’ उनले भने, ‘सरकारले जाँचबुझ आयोग बनायो, ३० हजार पीडितको उजुरी लियो । तर कारबाही गरेन । त्यहीकारण हामी फेरि संघर्षमा उत्रिनु परेको छ ।’ उनले तराईका २० जिल्ला र भित्री मधेशका आठ गरी २८ जिल्लाका पीडितहरूले यसपटक एकसाथ देशव्यापी पैदलमार्च गरेको बताए । उनीहरूले ६ प्रदेशका २३ जिल्ला पार गरेर काठमाडौं आइपुगेका हुन् ।

‘बिहीबार थानकोटदेखि सिंहदरबारसम्म मार्च गर्छौ । शुक्रबार ऐक्यबद्धता सभा हुन्छ,’ प्रवक्ता नवीनले भने, ‘ऐक्यबद्धता सभामा सबैलाई सहभागी भएर ऐक्यबद्धता जनाउन हाम्रो आग्रह छ ।’ समितिले मिटरब्याजपीडित किसान, मजदुर, साना व्यवसायी र सबै खाले वित्तीय शोषणबाट उत्पीडितहरूको न्यायका लागि संस्थागत र व्यक्तिगत प्रतिनिधित्वसहित मिटरब्याजपीडितविरुद्धको न्याय मार्चलाई ऐक्यबद्धता जनाउन आग्रह गरेको छ ।
सरकारले यसअघि मिटर ब्याजपीडितका समस्या सम्बोधन गर्न जाँचबुझ आयोग गठन गरेको थियो । आयोगले पाँच हजार पीडितका समस्या सुल्झाएपनि बाँकीका समस्याको जानकारी मात्रै बटुलेर सरकारलाई प्रतिवेदन बुझाएको छ । तर सरकारले सो प्रतिवेदनमाथि कुनै कारबाही अघि बढाएको छैन । सम्झौताबमोजिम सरकारले कुनै काम पहल नगरेपछि आफूहरू फेरि संघर्षमा उत्रिनु परेको समितिका अध्यक्ष अवधेशकुमार कुशवाहाले बताए ।

मिटरब्याजपीडितहरू यसअघि गत चैतमा पनि पैदलै काठमाडौं आएका थिए । त्यतिखेर सरकारले विशेष अदालतका पूर्वअध्यक्ष गौरीबहादुर कार्कीको अध्यक्षतामा मिटरब्याजपीडित जाँचबुझ आयोग गठन गरेको थियो ।

‘सम्माननीय प्रधानमन्त्रीज्यू बाट महोत्सवको उदघाटन हुने‘

मनोज कुमार शाह, जीतपुर बारा, फागुन ९ गते

जीतपुरसिमरा उपमहानगरपालिकाको वडा नं. ३ बजनीमा जितपुरसिमरा नगर उद्योग बाणिज्य संघले “कृषि -पर्यटन , खेल -उद्योग र ब्यापार !
जितपुरसिमरा बारा , मधेस समृधिको मुख्य आधार !!” भन्ने मूल उद्देश्यका साथ (1st JeetpurSimara Expo 2024 ) ‘ प्रथम जितपुरसिमरा महोत्सव २०८० ‘ को आयोजना गर्न लागेको छ । महोत्सव यही फाल्गुन १८ गतेदेखि २९ गतेसम्म आयोजना हुनेछ ।

जितपुरसिमरा नगर उद्योग बाणिज्य संघ जितपुरका अध्यक्ष मोहन शर्माले सम्माननीय प्रधानमन्त्री पुष्पकमल दाहाललाई प्रधानमन्त्रीको कार्यालय सिंहदरवार काठमाडौमा भेटेर प्रमुख अतिथिको आतिथ्यता ग्रहण गरी महोत्सवको उदघाटनसमेत गरिदिनका लागि औपचारिक निमन्त्रणा दिनुभएको छ । महोत्सवलाई बृहत् रुपले सफल बनाउन बारा क्षेत्र नं.४ का जनताका सेवक एवम् प्रतिनिधिसभा सद्स्य तथा पूर्व मन्त्री माननीय श्री कृष्ण कुमार श्रेष्ठ (किसान ) ज्यूको विशेष पहलमा प्रधानमन्त्रीज्यूलाई आमन्त्रण गर्न लागिएको महोत्सवको आयोजक समितिले जनाएको छ ।

जि.प्र.का. पर्साद्वारा सर्वपक्षीय बैठक आह्वान : महत्त्वपूर्ण निर्णयहरू पारित

मनाेज शाह जितपुर बारा  फाल्गुन ८ गते:

। पर्साको वीरगञ्जमा दुई फरक धर्म समुदायबिचकाे द्वन्द्वका कारण साेमबारदेखि उत्पन्न भएको तनावग्रस्त अवस्थालाई नियन्त्रणमा लिने उद्देश्यले आज मंगलबार जिल्ला प्रशासन कार्यालय पर्सामा बसेको सर्वदलीय-सर्वपक्षीय बैठकले वीरगञ्जमा सदियाैंदेखि कायम रहेको जातीय तथा धार्मिक सद्भावलाई अझै बलियो बनाउने निर्णय गरेकाे छ।

अनादि कालदेखि कायम रहेको नेपाली जनताबिचकाे सुमधुर सम्बन्ध, भाइचारा र एकतालाई विखण्डन गर्न खाेज्नेहरुको दुष्प्रयासलाई निष्फल पार्न सबै पक्ष एकजुट भई अघि बढ्न बैठकले आग्रह गरेको छ ।

धार्मिकस्थलहरुमा नाराबाजी, जुलुस लगायतका विराेधका कार्यक्रम नगर्ने नगराउने र यस्ता किसिमका गतिविधि गर्नेलाई कानुनी कारबाहीकाे दायरामा ल्याउन प्रहरी प्रशासनलाई सहयाेग गर्ने लगायतका अन्य सहमति पनि भएकाे पर्साका सहायक प्रमुख जिल्ला अधिकारी शिव लम्सालले जानकारी गराए। डिजे बजाउने र चर्काे स्वरमा माइक बजाउने, राँके जुलुस, लाठीभाला सहितकाे जुलुस निकाल्ने लगायतका कृयाकलाप गर्ने विरुद्ध कानुन बमाेजिम कारबाही गर्न प्रशासन समक्ष अनुराेध गर्ने र यसमा सबै दलले सहयाेग गर्ने सहमित पनि भएकाे उनले बताए ।

जिल्लाकाे शान्ति सुरक्षा र अमन चयनलाई खलल पर्ने किसिमका धार्मिक र सामाजिक सदभाव बिगार्ने एंव द्वन्दलाई उस्काउने प्रकारका अवाञ्छित गतिविधि साथै धार्मिक , सम्प्रदायिक रयाली,जुलुस, बन्द हडताल लगायतका गतिवधि कुनै पनि संघसंस्था र समुदायले नगर्ने र यसमा सबै दल, नागरिक समाज र संघसंस्थाले सहयाेग गर्ने निर्णय बैठकले गरेको छ । सामाजिक सञ्जालमा कुनैपनि जातजाति, धर्म वा समुदायलाई लक्षित गरी नकारात्मक कुराहरु पाेष्ट गर्ने गराउने उपर प्रशासनले कडा कारबाही गर्ने निर्णयसमेत भएकाे छ ।

प्रमुख जिल्ला अधिकारी दिनेश सागर भुसालको अध्यक्षतामा बसेकाे बैठकमा प्रतिनिधि सभा सदस्य प्रदीप यादव, प्रदेश सरकारका पर्यटन राज्यमन्त्री रहबर अन्सारी, वीरगञ्ज महानगरका मेयर राजेशमान सिंह, नेकपा एमालेका जिल्ला संयाेजक विश्वम्भर शर्मा, जसपाका जिल्ला अध्यक्ष रामनरेश यादव, नेपाली कांग्रेसका नेता नरेन्द्र साह, जनमत पार्टीका जिल्ला अध्यक्ष ओमप्रकाश सर्राफ, नेकपा एकीकृत समाजवादीका जिल्ला अध्यक्ष बालगाेपाल थापा,लाेसपाका जिल्ला अध्यक्ष पुरुषाेत्तमलाल झा, राप्रपाका पन्नालाल पटेल, पर्साका प्रहरी नायब उपरीक्षक कुमार विक्रम थापा,सशस्त्र प्रहरी उपरीक्षक किशन कर्माचार्य , नेपाल पत्रकार महासंघ पर्साका अध्यक्ष अनुप तिवारी , उपाध्यक्ष युवराज खड्का लगायतकाे सहभागिता रहेको थियो ।

कृपा दैनीकको २१ औं बार्षिकोत्सव सम्पन्न, ठाकुर, महत र पोख्रेल पुरस्कृत

स्पर्श खबर जितपुर बारा फागुन ५ गते:

निजगढ,बाराको निजगढमा कृपा दैनिक पत्रिकाले शनिबार एक बिशेष कार्यक्रमको आयोजना गरी २१ औं बार्षिकोत्सव मनाएको छ ।

प्रेस काउन्सीलमा अध्यक्ष बालकृष्ण बस्नेतको प्रमुख आथित्यमा कार्यक्रम आयोजना गरिएको हो । कार्यक्रममा कृपा दैनिक पत्रिकाले स्थापना गरेको दुई पुरस्कार उमादेवी स्मृति पत्रकारिता पुरस्कारबाट रौतहटका पत्रकार फणी महत र सर्लाहीका पत्रकार ओम प्रकाश ठाकुर पुरस्कृत भए ।

चन्द्रप्रसाद खनाल स्मृति पत्रकारिता पुरस्कार बाराकी पत्रकार शारदा पोखरेललाई प्रदान गरिएको छ ।

कार्यक्रममा पुरस्कार राशी प्राप्त गर्ने सर्लाहीका पत्रकार ओमप्रकाश ठाकुरले अर्का पत्रकार अन्नपूूर्ण पोष्टका रौतहट सम्वाददाता उपचाररत फणिदेव महतलाई हस्तान्तरण गरेर मित्रताको अनुपम उदाहरण प्रस्तुत गरे ।

ठाकुरको यो काम पून्यको काम भएको नेपाल पत्रकार महासंघ सर्लाही शाखाका अध्यक्ष टंक क्षेत्रीले बताए । कार्यक्रममा राकेश पाण्डेय, पुष्प खतिवडा र महेश्वर अधिकारीलाई पृपा दैनीकले सम्मान गरेको थियो ।

कार्यक्रममा नेकपा एमालेका पोलिट ब्यूरो सदस्य एवं प्रतिनिधि सभाका सदस्य अच्यूत मैनाली, नेपाल पत्रकार महासंघका केन्द्रीय सचिव गोविन्द चौलागाई, निजगठ नगरपालिकाका प्रमुख सुरथ पुरी, नेपाल पत्रकार महासंघका केन्द्रीय सदस्य के.सी.लामिछाने, नेपाल प्रेस युनियनका प्रदेश अध्यक्ष सत्यप्रकाश श्रेष्ठ, रुद्र धिताल , नेकपा माओवादी केन्द्रका सन्तोष दंगाल नेपाल पत्रकार महासंघ बाराका अध्यक्ष रेशम तिवारी , समाजवादी प्रेस संगठनका केन्द्रीय सदस्य जितलाल श्रेष्ठ लगायतले शुभकामना मन्तब्य ब्यक्त गरेका थिए ।सभार इसिमाना ।

सम्पादक गोकुल घोरसाइनेको अध्यक्षतामा भएको कार्यक्रममा प्रकाशक कमल उपाध्यायले स्वागत र कृष्णउदास खनालले कार्यक्रमको संचालन गरेका थिए