अत्याधुनिक प्रविधियुक्त रेडिमिक्स कन्क्रीट उद्योग स्थापना भयो : जनताको घरदैलोमै पुगेर सेवा दिइने संचालकको दाबी

मनाेज शाह, जितपुर बारा, फाल्गुन  २६ गते:

जीतपुरसिमरा उपमहानगरपालिकाको वडा नं. १० नितनपुरमा अत्याधुनिक प्रविधि जडान भएको रेडिमिक्स उद्योग एलाइट आर. एम. सि. प्रा. लि. को स्थापना भएको छ । हालसम्म जनताहरुले अनेकौं समस्या भोग्नुपरिरहेका बेलामा यस उद्योगले उपलबध गराउने छिटोछरितो र गुणस्तरीय सेवाबाट सबैले समस्याबाट मुक्ति पाउने जनविश्वास लिइएको छ ।

समयमा काम पूरा नहुने, भएको काम पनि गुणस्तरहीन हुने, महँगो पैसा तिरेपनि चित्तबुझ्दो प्रतिफल प्राप्त नहुने जस्ता चुनौतीहरुको सामना गर्न बाध्य यस भेगका जनताहरुको लागि अत्याधुनिक प्रविधि जडान भएको रेडिमिक्स उद्योग एलाइट आर. एम. सि. प्रा. लि. वरदान साबित हुनेछ । बारा जिल्लामै सम्भवतः सबैभन्दा ठूलो लगानीमा स्थापित यस उद्योगले आफूलाई भौतिक निर्माण क्षेत्रमा अब्बल साबित गर्दै यहाँको जनताहरुलाई आफ्नो अत्याधुनिक प्रविधिबाट छिटोछरितो , सन्तोषजनक तथा गुणस्तरीय सेवा उपलब्ध गराउन प्रयासरत रहने संचालकको एकमात्र उद्देश्य रहेको छ ।

ठुलो लगानीमा बाराको नितनपुर चौकमा स्थापित रेडिमिक्स उद्योग एलाइट आर. एम. सि. प्रा. लि. ले रेडिमिक्स कन्क्रीट अर्थात् तयारी ढलान उत्पादन गर्ने र कार्य स्थलमा डेलिभरी गर्ने तथा घरदैलोमै सुपथ मूल्यमा गुणस्तरीय सेवा उपलब्ध गराई निर्माण क्षेत्रमा योगदान पुर्‍याउने आफूहरुको एकमात्र लक्ष्य रहेको रेडिमिक्स उद्योग एलाइट आर. एम. सि. प्रा. लि. का डाइरेक्टर सन्तोष कुश्वाहाले जानकारी दिए । बारामा स्थापना भए पनि यसको कार्य क्षेत्र विस्तार गर्दै लैजाने र बारा, पर्सा, रौतहट, मकवानपुर लगायतका क्षेत्रमा पनि सेवा उपलब्ध गराउने दीर्घकालीन योजना रहेकोले अन्य जिल्लाका जनताहरु पनि लाभान्वित हुने विश्वास सन्तोष कुश्वाहाले व्यक्त गरेका छन् ।

हिन्दुधर्म र संस्कृतिको जगेर्नामा जुटे युवा : शिवरात्री पर्वको महत्त्व र गरिमा जोगाउनुपर्ने धारणा

मनाेज  शाह, जितपुर बारा, फागुन २४ गते

जितपुरसिमरा उपमहानगरपालिकाको वडा नं. १४ रजघट्टाका बुद्धिजीवी, युवावर्ग, आमा समूह लगायतका सम्पूर्ण स्थानीय बासिन्दाहरुको विशेष सहभागितामा हिन्दुधर्म र संस्कृतिको जगेर्ना गर्ने महान् अभियान सुरु भएको छ ।

हिन्दु धर्मावलम्बीका नयाँ युवा पुस्ताले आफ्नो धर्म संस्कृति, रीतिरिवाज बिर्संदै गएको तथा युगौंदेखिको हिन्दु परम्परा, रीतिरिवाज, संस्कार- संस्कृति आदि लोप हुने अवस्थामा पुगेकोले आफ्नो धर्म संस्कृतिको रक्षा गर्ने उद्देश्यका साथ जितपुरसिमरा उपमहानगरपालिकाको वडा नं. १४ रजघट्टाका सम्पूर्ण हिन्दु धर्मावलम्बीहरु एकताबद्ध भएर लागिपरेका छन् ।

महाशिवरात्रीको महिमा र गरिमा जोगाउन फाल्गुन २५ गतेको महाशिवरात्री पर्व रजघट्टाको प्रसिद्ध शिव मन्दिरमा भव्यताका साथ मनाउने आफूहरुको योजना रहेको स्थानीय युवा प्रदीप रिजालले स्पर्श खबरलाई जानकारी दिएका छन् । अनुभवले खारिएका अग्रज वृद्ध अभिभावकहरुको मार्गनिर्देशनमा यसपालिको महाशिवरात्री पर्व अन्य वर्षभन्दा पृथक बनाउन युवावर्गले यस क्षेत्रभरि नै शिव भगवान अङ्कित झण्डा बडो आकर्षक ढङ्गले लगाएका छन् ।

प्रत्येक वर्ष महाशिवरात्री पर्वको अवसरमा रजघट्टामा लाग्ने मेलालाई यस वर्षदेखि अझै स्तरोन्नती गरी फरक ढङ्गले प्रस्तुत हुने जानकारी गराउँदै हिन्दु धर्म तथा शास्त्रले सिकाएअनुसार अगाडि बढ्दै सफलताको शिखरमा पुग्ने आफूहरुको लक्ष्य रहेको प्रदीप रिजालले जानकारी दिनुभयो ।

जितपुरसिमरा उपमहानगरपालिकाको वडा नं. १४ रजघट्टामा अवस्थित रामजानकी मन्दिरको पुरानो इतिहास रहेको र यो मन्दिर लगायत यस क्षेत्रमा रहेका सबै मठमन्दिरहरुको संरक्षण तथा विकासको लागि वडा कार्यालयले बजेटको लागि विशेष पहल गर्ने कुरा वडा नं. १४ का वडाध्यक्षले जानकारी दिनुभयो ।

बाराकाे पचरौँता नगरपालिका ४ का वडाध्यक्ष यादव विरुद्ध भ्रष्टाचार मुद्दा दार्ता

मनाेज शाह जितपुर बारा फागुन २४ गते:

बाटो हुदै नभएको जग्गामा बाटो प्रमाणित गरेको बाराको पचरौता नगरपालिकाका एकजना वडाध्यक्षविरुद्ध भ्रष्टाचार मुद्दा दायर भएको हो ।
पचरौता नगरपालिकाको वडा नं. ४ का वडाध्यक्ष कन्हैयालाल यादव विरुद्ध भ्रष्टाचार मुद्दा दायर भएको हो ।
सडकले छोएको जग्गालाई नछोएको भनी सिफारिस दिएको आरोपमा अख्तियार दुरुपयोग अनुसन्धान आयोगले वडाध्यक्षविरुद्ध भ्रष्टाचार मुद्दा दायर गरेको हो । वडाध्यक्ष यादवले साविक बेलदारी गाविस–४ को कित्ता नम्बर १७३ को सडकले छोएको जग्गालाई नछोएको भन्दै सिफारिस दिएको अख्तियारको दाबी रहेको छ ।
वाडा अध्यक्ष यनदवले सिफारिसका कारण उक्त जग्गा खरिदकर्ता र बिक्रीकर्ताले तिर्नुपर्ने रजिस्ट्रेसन शुल्क र पुँजीकर लाभकर वापत राज्यकोषमा ८ लाख ११ हजार ९५१ रुपैयाँ घाटा भएको अख्तियारले जनाएको छ ।
अख्तियारले वडाध्यक्ष यादव, जग्गा बिक्रीकर्ता विद्या यादव, खरिदकर्ता बृजकिशोरप्रसाद यादव र अवध किशोर यादविरुद्ध पनि विशेष अदालतमा भ्रष्टाचार मुद्दा दायर गरेको अख्तियारले जनाएको छ ।

सम्पूर्ण मानवजातिको कल्याण हेतु मधानी महायज्ञ सम्पन्न

मनोज  शाह, जीतपुर बारा, फाल्गुन २४ गते

रौतहटको मौलापुरमा विशेष धुमधाम तथा भव्यताका साथ मधानी महोत्सवको आयोजना गरिएको छ । मौलापुरमा आयोजित मधानी महोत्सव अन्तर्गत आज मधानी महायज्ञको आयोजना गरिएको थियो । भगवान शिव र पार्वतीको विवाहको रुपमा मनाइने मधानी महायज्ञको यस बिशेष पुजा समारोहमा आचार्य शोभाकान्त झाले मन्त्रोच्चारण गर्नु भएको थियो भने बाबाधामको पुजारीहरुले विशेष पुजा गराउनु भएको थियो ।

मौलापुर नगरपालिकाको नगरप्रमुख रीना कुमारी साहको अध्यक्षतामा सम्पन्न मधानी महायज्ञ विशेष पूजा समारोहमा मधेश प्रदेशको सभामुख माननीय रामचन्द्र मण्डल प्रमुख अतिथिको रुपमा सहभागी हुनुभएको थियो । समारोहमा विभिन्न शिव मण्डलीहरुले विशेष कला प्रस्तुत गरेका थिए ।

मौलापुरमा आयोजित मधानी महोत्सव अन्तर्गत सम्पन्न मधानी महायज्ञ विशेष पूजा समारोहमा विभिन्न शिव मण्डलीहरुले विशेष कला प्रस्तुत गरेका थिए । समारोहमा आजपा पार्टीका केन्द्रीय अध्यक्ष एवम् पूर्व मन्त्री प्रभु साहज्यु विशिष्ट अतिथिको रुपमा सहभागी हुनुभएको थियो ।

आमा नेपाल फाउन्डेसन बिरगंज द्वारा प्रभात फेरि शान्ति र्‍यालीको आयोजना

पवन शाह    वीरगंज फागुन २४ गते:

आमा नेपाल फाउन्डेसन वीरगन्जले ११४ औ अन्तरास्ट्रिय महिला दिवसको अवसरमा वीरगन्ज महानगरपालिकामा प्रभात फेरि शान्ति र्‍यालीको आयोजना गरेको छ । संयुक्त राष्ट्र संघको “Invest in women :Accelerate progress ” भन्ने अन्तर्राष्ट्रिय नारा तथा ” महिलामा लगानी: सभ्य र समुन्नत समाजको थालनी ” भन्ने राष्ट्रिय नाराका साथ यो दिवस मनाउन आव्हान गरिएको सन्दर्भमा महिलाहरुको आर्थिक र समाजिक सशक्तीकरणका लागि महिलामा लगानीको सुनिश्चितता गर्न समाजिक सचेतना अभिवृद्धि गर्ने उदेश्यले साझा अभियानको रुपमा आमा फाउन्डेसन नेपालले समेत यस दिवसलाइ मनाएको छ । आमा नेपाल फाउन्डेसन सग सगै वीरगन्ज नर्सिङ क्याम्पस , हरि खेतान बहुमुखी क्याम्पस , सामुदायिक सेवा केन्द्र तथा सामुदायिक प्रहरी सेवा केन्द्र विर्ताले सयुक्त रुपमा मिलि सो दिवस मनाएका छन ।

वीरगन्ज महानगरपालिका स्थित विर्ता मन्दिर बाट शुरु भएको र्‍याली नगर परिक्रमा गरि पुन: विर्ता मन्दिर परिसरको सरसफाइ गरि कोणसभा गरि समापन भएको थियो ।उक्त र्‍याली भब्य र सब्य रुपमा सम्पन भएको थियो । त्यस्तै र्‍याली पश्चात् वीरगन्ज नर्सिङ क्याम्पसको परिसरमा उपस्तिथि रहेका अतिथिहरु ले वृक्षारोपण समेत गरेका थिए । प्रत्येक रुख लाई लैङ्गकि समानताको प्रगतिको प्रमाण बनाऔ भन्ने उदेश्यका साथ वृक्षरोपण गरिएको आमा नेपाल फाउन्डेसन वीरगन्जका अध्यक्ष प्रमिता मानन्धर ले बताइन् ।

र्‍यालीमा वीरगन्ज महानगरपालिकाका मेयर राजेशमान सिहंका पत्नी अन्नपूर्ण मानन्धर , वीरगन्ज महानगरपालिकाका कार्यपालिकका सदस्य राधा कार्की , वीरगन्ज नर्सिङ क्याम्पसका क्याम्पस प्रमुख डा. कल्पना पौडेल ,आमा नेपाल फाउन्डेसनका अध्यक्ष प्रमिता मानन्धर , समाजसेवी तथा युवा नेता सन्तोष कुमार श्रेष्ठ , सामुदायिक सेवा केन्द्रका अध्यक्ष मज्जिद मिया , समाज सेवि प्रतिमा सिंह , समाजसेवी रानी रोय लगायत आमाअ नेपाल फाउन्डेसन का पदाधिकारी तथा सदस्य , वीरगन्ज नर्सिङ क्याम्पसका शिक्षक तथा विद्यार्थी , हरिखेतान बहुमुखी क्याम्पसका शिक्षक तथा विद्यार्थीहरु बिर्ता प्रहरी कार्यलयका प्रहरीहरुको उपस्थिति रहेको थियो ।

११४ औ अन्तरास्ट्रिय महिला दिवस फाल्गुन २५ गते परे पनि उक्त दिन महा शिवरात्री पर्व परेकोले फाल्गुन २४ गते नै मनाइएको आयोजक ले जनाएका थिए ।

दलित समाजद्वारा विशेष बैठक सम्पन्न : दलितहरुको उत्थानका लागि लिए महत्त्वपूर्ण निर्णय

मनोज  शाह, जीतपुर बारा, फाल्गुन २३ गते

जितपुरसिमरा उपमहानगरपालिकाको वडा नं. ८ इमलीप्रतीमा आज दलित समाजको विशेष बैठक सम्पन्न भएको छ । जितपुरसिमरा उपमहानगरपालिकाको वडा नं.५ बकुलियाका वडा सदस्य ईन्दल पासवानको अध्यक्षतामा बसेको बैठकले अझैसम्म विकासको मूल धारमा नसमेटिएका तथा सामाजिक, आर्थिक, राजनैतिकरुपले पछि पारिएका समग्र दलित वर्गको उत्थानका लागि गहन छ्लफल गरी महत्त्वपूर्ण निर्णयहरु लिएको छ ।

सो बैठकले दलित समुदायको जनताहरुको हक अधिकारको रक्षा गर्न, समग्र दलित समाजको उत्थानमा टेवा पुर्‍याउनका लागि आगामी दिनहरुमा चाल्नुपर्ने कदमको बारे गहन छलफल गरी दिशानिर्देश तयार पारेको छ ।

यसैगरी जितपुरसिमरा उपमहानगरपालिकाको वडा नं. ७ जितपुरमा रहेको पासवान समाज एवम् दलितहरुको ऐतिहासिक मन्दिर अर्थात् सलहेश बाबाको मन्दिरको संरक्षणको विषयमा पनि बैठकमा सहभागी भएकाहरुबीच बृहत् छलफल भएको थियो । सोही बैठकले बारा क्षेत्र ४ का सम्पूर्ण दलित अगुवाहरुलाई समेटी क्षेत्रीय भेला गराउने तथा आउँदो चैत्र ८ गतेको अन्तर्राष्ट्रिय जातीय उन्मूलन दिवस भव्यताका मनाउने निर्णयसमेत गरेको छ ।

सिमरा महिला बचत तथा ऋण सहकारी संस्थाले जीतपुरसिमरा अस्पताललाई आज बेबी ब्ल्यांकेट हस्तान्तरण

मनाेज शाह जितपुर बारा फागुन २३ गते:

बाराको सिमरामा रहेको सिमरा महिला बचत तथा ऋण सहकारी संस्थाले जीतपुरसिमरा अस्पताललाई आज बेबी ब्ल्यांकेट हस्तान्तरण गरेको छ । १ सय १४ औ अन्तराष्ट्रिय नारी दिवसको अवसर पारेर सिमरा महिला साकोसले एक सय थान बेबी ब्ल्यांकेट हस्तान्तरण गरेको हो ।

अस्पतालमा जन्मिएका शिशुहरुको स्वास्थ्य सुरक्षालाई मध्यनजर गर्दै साकोसले अस्पताललाई बेबी व्ल्यांकेट हस्तान्तरण गरेको संस्थाकी अध्यक्ष मुना खरेलले बताउनुभयो । कार्यक्रमको जीतपुरसिमरा उपमहानगरपालिका वडा नं १४ की वडाध्यक्ष चयन मगरले दुई दिने नवजात शिशुलाई ब्ल्यांकेट ओढाएर उद्घाटन गर्नुभएको थियो ।

कार्यक्रमकाबिच अस्पताल प्रमुख प्रकाश साहलाई एक सय थान ब्ल्यांकेट हस्तान्तरण गरिएको थियो । कार्यक्रममा जीतपुरसिमरा उपमहानगरपालिका वडा नं २ का कार्यवाहक अध्यक्ष उद्धवप्रसाद गौतम, नेपाली काग्रेसका केन्द्रीय सदस्य नारायणी रायमाझी, नेकपा माओवादी केन्द्रकी केन्द्रीय सदस्य गीता कँडेल, जीतपुरसिमरा उपमहानगरपालिकाका पूर्व कार्यपालिका सदस्य सुमित्रा कार्की, जीतपुरसिमरा अस्पताल प्रमुख प्रकाश साह, अस्पतालका जनस्वास्थ्य अधिकृत अशोक जैसवाल, इलाका प्रहरी कार्यालय महिला बालबालिका सेवा केन्द्रकी पार्वती बोहोरा, सिमरा महिला साकोसकी पूर्व अध्यक्ष एवं सल्लाहकार अनिता लम्साल, लेखा समिति संयोजक उर्मिला सापकोटा लगायतको उपस्थिति रहेको थियो ।

संस्थाकी अध्यक्ष मुना खरेलको अध्यक्षतामा सम्पन्न कार्यक्रमको सञ्चालन सचिव गीता शर्माले गर्नुभएको थियो । कार्यक्रममा संस्थाकी उपाध्यक्ष भिमादेवी शर्माले गर्नुभएको थियो ।

ट्राफिक प्रहरी एक्सनमा : विद्यालयका बसलगायत कयौं साना ठुला गाडीलाई चिट काट्यो

मनोज  शाह, जीतपुर बारा, फाल्गुन २२ गते

जितपुरसिमरा वडा ७ मा रहेको ट्राफिक प्रहरी पोस्टको ट्राफिक प्रहरीहरु अचानक एक्सनमा आएका छन् । जितपुरको मुख्य सडक खण्डमा छड्के चेकजाँच गर्ने क्रममा ट्राफिक प्रहरीहरुले मालवाहक ट्रक, सवारी साधन बोकेको साना ठुला बस तथा विद्यार्थी बोकेको स्कुल बस लगायत चेकजाँच गरेको छ । केही विद्यालयका बसहरुले सिट क्षमताभन्दा बढी विद्यार्थी बोकेका कारण ती बसका चालकलाई आवश्यक नसिहत दिँदै एकदिनका लागि चिट काटेर छाडिएको ट्राफिक प्रहरी कार्यालय जीतपुरका प्रमुख बब्लु ठाकुरले स्पर्श खबरलाई जानकारी दिनुभयो ।