स्पर्श खबर

तलब माग गर्दा मजदुरहरु उद्योग प्रशासनबाटै गुन्डा शैलीमा कुटिए

मनोज शाह, जीतपुर बारा, चैत्र २ गते

पर्सा जिल्लाको वीरगंज महानगरपालिका अन्तर्गतको वडा नं.२१ परवानीपुरमा अवस्थित श्री पेपर वर्क्स प्रा.लि. का मजदुरहरु सोही उद्योगको प्रशासनबाट गुन्डा शैलीमा कुटिएका छन् । नेपाल सरकारले वृद्धि गरेबमोजिमको तलब रकम अन्य उद्योगका मजदुरहरुले पाइसकेकाले आफूहरुलाई पनि नेपाल सरकारको नियमबमोजिमको वृद्धि भएको तलब रकम उपलब्ध गराउनका लागि श्री पाना पेपर वर्क्स प्रा. लि. का मजदुरहरुले उद्योग प्रशासन पक्षलाई पटकपटक जानकारी गराएका थिए ।

श्री पाना पेपर वर्क्स प्रा. लि. का प्र. अधिकृत ताराचन्द्र प्रसाद यादवले श्रावण महिनादेखिको वृद्धि भएको तलब रकम उपलब्ध गराउनुपर्ने मजदुरहरुको मागलाई बेवास्ता गर्दै आएका छन् । उद्योग प्रशासनले बिना कसुर तथा कुनै प्रकारको सूचना नै नदिई १३ जना कामदारहरुलाई कामबाट निकालेपछि मजदुर तथा उद्योग प्रशासनबीचको विवाद झनै चुलिएको छ ।

नेपाल सरकारले वृद्धि गरेको तलब रकम पाउनु सबै मजदुरहरुको हक भएकोले आफूहरुले पनि वृद्धि भएको तलब रकम पाउनुपर्ने श्री पाना पेपर वर्क्स प्रा. लि. का मजदुरहरुले स्पर्श खबरलाई बताए । मजदुरहरुले युनियन दर्ता गरेको तथा वृद्धि भएको तलबको माग गरेको निहुँमा उद्योग प्रशासनले बिना कसुर तथा कुनै प्रकारको सूचना नै नदिई १३ जना कामदारहरुलाई कामबाट निकाल्नुको साथै बाहिरबाट गुन्डाहरु बोलाएर मजदुरहरुमाथि निर्घात् कुटपिट गर्न लगाएको आरोप मजदुरहरुले लगाएका छन् ।

गत फाल्गुन २९ गतेका दिन उद्योग प्रशासनले बाहिरी मान्छेहरुलाई उद्योग परिसरभित्रै बोलाएर काम गरिरहेका मजदुरहरुलाई गुन्डा शैलीमा निर्घात् कुटपिट गर्न लगाएको छ । ती गुन्डाहरुबाट निर्घात् रुपमा कुटिएका श्री पाना पेपर वर्क्स प्रा. लि. का मजदुर नरेश यादव घाइते भएका छन् । घाइते भएका नरेश यादवलाई ढाड, खुट्टा, घाँटी, छातीमा रातो डाम देखिने गरी चोट लागेको छ । श्री पाना पेपर वर्क्स प्रा. लि. का मजदुरहरुले विगत ३ महिनादेखि काम गरेको तलब समेत उद्योगले उपलब्ध नगराएकोले घरपरिवार विचल्ली भएको तथा खान लाउन समेत कठिनाइ भएको मजदुरहरुले जनाएका छन् ।

यस घटनाबारे श्री पाना पेपर वर्क्स प्रा. लि. का प्रशासकीय अधिकृत ताराचन्द्र प्रसाद यादवसँग फोनमार्फत् बुझ्न खोज्दा मजदुरहरुले झुटो आरोप लगाएको हुनुपर्छ  बताए ।

जीतपुरसिमराको वडा नं. ७ मा विकासको कुरा नारामा मात्रै सीमित : तीनै तहले उपेक्षा गरेको जनताको गुनासो

मनोज  शाह, जीतपुर बारा, चैत्र १ गते

जीतपुरसिमरा उपमहानगरपालिका अन्तर्गतको वडा नं. ७ का बासिन्दाहरु यस क्षेत्रमा विकास निर्माणका कार्यहरु समयमै नभएकाले आजित भएका छन् । खासमा सडक, नाला तथा खानेपानी जस्ता अत्यावश्यक पूर्वाधारहरुको निर्माण तथा विकासका लागि यहाँका जनताहरुले वडा कार्यालयमा पटकपटक खबर गर्दा पनि वडाले कुनै चासो नदेखाएकाले निर्वाचित जनप्रतिनिधिहरुले यहाँका जनताहरुलाई भोट बैंकको रुपमा मात्रै प्रयोग गरेको तथा सर्वसाधारण जनताको दु:ख पीडाप्रति कुनै सरोकार नरहेको कुरा प्रमाणित भएको स्थानीयहरुले गुनासो पोखेका छन् ।

निर्वाचित जनप्रतिनिधिहरुले विकास निर्माणका कार्यमा चासो नदेखाएपछि वडा ७ का बिर्जु साहले आफ्नै लगानीमा नाला निर्माण गर्न बाध्य भएका छन् । जीतपुरसिमरा उपमहानगरपालिकाको वडा नं.७ जीतपुरको तरकारी बजारमा रहेको नाला विगत लामो समयदेखि भत्किएको थियो । जसको कारणले गर्दा स्थानीय बासिन्दा लगायत बजारमा सरसामान किनमेल गर्न आउने ग्राहकहरुले समेत सास्ती व्यहोर्नुपरेको थियो । यस समस्याबारे वडा तथा नगरपालिकामा समेत आफूले पटकपटक जानकारी गराउँदा पनि वडाध्यक्ष एवम् मेयरबाट कुनै कदम नचालिएकाले उनीहरुको यस्तो व्यवहारबाट आफू रुष्ट एवम् आजित भएको स्थानीय बिर्जु साहले बताए । जीतपुर तरकारी बजारमा खानेपानीको लागि एउटा पनि सार्वजनिक धाराको व्यवस्था नरहेको समेत उनले गुनासो गरे । जीतपुर बजारमा किनमेलका लागि आउने ग्राहकहरु तिर्खाले छटपटाउने गरेको दृश्यले आफूलाई मर्माहित बनाएकोले सबैका लागि शुद्ध पिउने पानीको व्यवस्था गर्न आफ्नै लगानीमा धारा समेत जडान गरेको कुरा स्थानीय बिर्जु साहले जानकारी गराए ।

जीतपुरसिमरा उपमहानगरपालिका वडा ७ को फरक फरक ठाउँ वा टोलमा विकास निर्माणको कार्यमा सम्बन्धित निकायले भेदभाव गरेको गुनासो पोख्दै कतै हतारहतार नाला तथा सडक बनाइए पनि कतै सडक-नाला निर्माण नहुने, बजार तथा नाला समेत सरसफाइ नहुने गरेको स्थानीय बासिन्दा असर्फी पटेलले आक्रोश पोखे । बजारमा जताततै जम्मा भएका फोहोरतर्फ ध्यानाकर्षण गराउँदै हाल जीतपुर बजार फोहोरको डङ्गुर बनेको स्थानीय बासिन्दा असर्फी पटेलले दुखेसो पोखे । यसै गरी जीतपुर ७ शान्तिटोल निवासी शैलेस सराफले वरिपरिका सबै गल्लीहरुमा बाटो बने पनि आफू बस्ने गल्लीमा अहिलेसम्म सडक नबनेकोले यस वडामा विकासको कुरा नारामा मात्रै सीमित रहेको गुनासो गरेका छन् । जीतपुरसिमरा उपमहानगरपालिकाकै एकमात्र व्यापारिक केन्द्रको रुपमा आफ्नो पहिचान बनाएको जीतपुर नगरी अहिले केन्द्रीय सरकार, प्रदेश सरकार तथा स्थानीय सरकारको प्राथमिकतामा नपर्दा विकास निर्माणले गति लिन सकेको छैन । निर्वाचित जनप्रतिनिधिहरु पनि आफ्नै दुनो सोझ्याउनपट्टि लागेकाले जाबो सानो नाला निर्माण गर्न नसक्नेहरुले समग्र जीतपुरको विकास गर्लान् भनी सोच्नु व्यर्थ छ भनेर स्थानीय बासिन्दाहरुले गुनासो गरेका छन् ।

द लेप्रोसी मिसन नेपालद्वारा कुष्ठरोग एवम् सुरक्षा संरक्षण अभिमुखीकरण कार्यक्रम सम्पन्न

मनोज  शाह, जीतपुर बारा, फाल्गुन ३० गते

द लेप्रोसी मिसन नेपालद्वारा आयोजना गरिएको कुष्ठरोग एवम् सुरक्षा संरक्षण अभिमुखीकरण सम्बन्धी पत्रकारसँगको एकदिने कार्यक्रम आज सम्पन्न भएको छ । पत्रकार महासंघ बाराका अध्यक्ष रेशम तिवारीकाे सभापतित्वमा सम्पन्न भएको कार्यक्रममा डा. प्रकाश पाैडेल , शम्भुलाल कर्ण , राम हरि रेग्मीले प्रशिक्षण दिनुभएको थियो ।

सीता विष्टले सहजीकरण गर्नुभएको उक्त कार्यक्रममा प्रशिक्षकहरुले कुष्ठरोग सम्बन्धी जानकारी प्रदान गर्नुभएको थियो । कुष्ठरोगसम्बन्धी ब्याक्टेरिया मानव शरीरमा प्रवेश गरेपछि त्यसको असर सुरु भए पनि धेरै जसाे मानिसहरुले याे कहिल्यै महसुस गर्दैनन् । धेरैजसो मानिसहरुको शरीरमा यो रोगसम्बन्धी ब्याक्टेरिया प्रवेश भए पनि ती व्यक्तिहरुमा ब्याक्टेरिया र कुष्ठराेग विरुद्ध लड्ने पर्याप्त रोग प्रतिकारात्मक शक्ति हुने भएकोले १ सय जना व्यक्तिमा ब्याक्टेरिया प्रवेश गरे पनि मात्रै तीन जनालाई राेगका प्रारम्भिक लक्ष्ण देखिने सम्भावना हुने एक अनुसन्धानले जनाएको छ ।

पर्याप्त मात्रामा रोग प्रतिरोधात्मक शक्ति भएका व्यक्तिहरुमा भने यो राेग लाग्दैन । कृष्ठराेग छाला र शरीरका बाहिरी सतहका स्नायुमा असर पुर्‍याउने एक प्रकारकाे सरुवा राेग हाे तर उपचार सुरु गरेपछि याे राेग सर्दैन भन्ने डा. प्रकाश पाैडेलले जानकारी गराउनुभएको थियो । द लेप्रोसी मिसन नेपालद्वारा आयोजना गरिएको कुष्ठरोग एवम् सुरक्षा संरक्षण अभिमुखीकरण कार्यक्रममा उपस्थित पत्रकारहरुको उल्लेखनीय सहयोग रहेको कुरा बिभा यदवले स्पर्श खबरलाई जानकारी दिनुभयो

बारामा नयाँ प्र.जि.अ. को आगमनसँगै सरकारी कार्यमा बढ्यो तीव्रता : २५ दिनमै राहदानी पाइने

मनोज शाह, जीतपुर बारा, फाल्गुन २९ गते

बारा जिल्लामा नयाँ प्र.जि.अ. आउनुभएको लगभग २ महिना भएको छ । बाराका प्र.जि.अ. शशिधर घिमिरेको आगमनसँगै यस कार्यालयले दिने सेवामा तीव्रता आएको छ । प्रमुख जिल्ला अधिकारी शशिधर घिमिरेले यति छोटो समयमै आफ्नो मातहतको कार्यालयले आम जनताहरुलाई उपलब्ध गराउने सेवा सुविधाको गति चुस्तदुरुस्त बनाएका छन् । उनको कार्यशैलीबाट आम नागरिक निकै सन्तुष्ट छन् ।

विगतमा बारा जिल्लाबाट राहदानी बनाउँदा उक्त राहदानी लगभग ४५ दिनपछि मात्रै प्राप्त हुन्थ्यो तर अहिले २५ दिनभित्रै राहदानी उपलब्ध हुने गरेको कुरा राहदानी वितरण शाखा, कलैयाका कम्प्यूटर अपरेटर सनी कुमार गुप्ताले स्पर्श खबरलाई जानकारी दिएका छन् । उनका अनुसार वि.सं. २०८० फाल्गुन महिनामा मात्रै राहदानी बनाउन आवेदन दिएका मध्ये जम्मा ११४२ जनाको राहदानी तयार भइसकेको छ । जसमध्ये ५४३ जना पुरुष तथा १०९ जना महिला गरी जम्मा ६५२ जनाले आआफ्नो राहदानी यस कार्यालयबाट संकलन गरी लगिसकेका छन् भने ४९० ओटा राहदानी अझैसम्म पनि सम्बन्धित व्यक्तिहरुले संकलन गर्न बाँकी रहेको सनी कुमार गुप्ताले जानकारी दिए ।

राहदानीका लागि आवेदन दिएकाहरुमध्ये तयारी अवस्थामा रहेका तर संकलन गर्न बाँकी रहेका राहदानी सम्बन्धित नागरिकले यस कार्यालयबाट समयमै संकलन गर्न समेत गुप्ताले स्पर्श खबरमार्फत् आमजनतालाई आग्रह गरेका छन् ।