स्पर्श खबर

 जीतपुरसिमरा नगर कमिटिको अध्यक्षमा अनिल तिवारी सर्वसम्मत चयन

मनाेज शाह जितपुर   बारा चैत ४ गते: राष्ट्रिय निजी तथा आवासीय विद्यालय एशोसिएसन नेपाल (एन प्याब्सन) जीतपुरसिमरा नगर कमिटि अध्यक्षमा अनिल तिवारी चयन भएका छन् । एन प्याब्सन नेपालका केन्द्रिय सदस्य राम प्रसाद अधिकारीको संयोजकत्व र एन प्याब्सन बारा जिल्ला उपाध्यक्ष सुबोध गुप्ताको नेतृत्वमा एन प्याब्सन जीतपुरसिमरा नगर कमिटि गठन गरिएको हो ।
शनिवार गठन गरिएको एन प्याब्सन जीतपुरसिमरा नगर कमिटिको अध्यक्षमा डुमरवाना पब्लिक स्कूल रजघट्टाको संचालक अनिल तिवारी सर्वसम्मत चयन भएका हुन् ।

नयाँ कार्यसमितिको उपाध्यक्षमा दिपेन्द्र कुमार साह, सचिवमा सरोज चन्द्र कार्की,कोषाध्यक्षमा नरेन्द्र तामाङ्ग, सदस्यमा गौतम चौधरी, मधुसुदन चौधरी चयन भएका छन् ।कार्यक्रममा बोल्दै एन प्याब्सनका केन्द्रिय सदस्य राम प्रसाद अधिकारीले चयन भएका पदाधिकारीलाई बधाई तथा शुभकामना दिएका थिए । निजी विद्यालयको पक्षमा वकालत गर्न एन प्याब्सन केन्द्रिय कार्यसमिति निरन्तर सरकार तथा सरोकारवाला निकायसंग छलफलमा रहेका समेत अधिकारीले बताए ।

अध्यक्षमा सर्वसम्मत चयन गरेकोमा एन प्याब्सन जीतपुरसिमरा नगर कमिटिका अध्यक्ष अनिल तिवारीले धन्यावाद ज्ञापन गरेको थियो ।उक्त कार्यसमिति गतह्न कार्यक्रममा एन प्याब्सन बाराका कोषाध्यक्ष मदन रिजाल, स-सचिव राम बहादुर चौधरी, पूर्व प्रदेश सदस्य सुन्दर ढकाल लगायत जीतपुरसिमरा उपमहानगर भित्र रहेका बिभिन्न निजि बिद्यालयका शिक्षकहरुको उपस्थिति रहेको थियो ।

सिमरा नागरिक उड्डयन कार्यालय अन्तर्गतको सिमरा विमानस्थलबाट उडान भर्नेको संख्यामा वृद्धि

मनोज शाह, जीतपुर बारा, चैत्र ३ गते:

बारा जिल्लाको सिमरामा रहेको सिमरा विमानस्थलबाट आ.व. ०७९/८० मा कुल १२८६१३ जना यात्रुहरुले प्रस्थान गरेका छन् । यसैगरी सिमरा विमानस्थलमा आगमनको गर्ने यात्रुको सङ्ख्या कुल १३५२०३ जना रहेको सिमरा नागरिक उड्डयन कार्यालयका प्रबन्धक सूर्य बहादुर खत्रीले जनाएका छन् ।

अभिभावक विहीन जीतपुर : आफ्नो पुरानो प्रतिष्ठा गुमाएको स्थानीयको गुनासो

मनोज  शाह, जीतपुर बारा, चैत्र ३ गते

‘हात्ती आयो हात्ती आयो फुस्सा’ उखान वर्तमान परिस्थितिमा जीतपुरसिमरा उपमहानगरपालिका वडा नं. ७ जीतपुरको लागि उपयुक्त भएको छ । नगरपालिका र उपमहानगरपालिका एवम् आर्थिक नगरीको रुपमा रहे पनि यहाँको विकास भने झन् झन् खस्किँदै गएको सर्वविदितै छ । वडा नं. ७ जीतपुरको हालको विकास र प्रगतिको दरभन्दा विगतमा भवानीपुर जीतपुर गा.वि.स. हुँदै राम्रो रहेको तथ्याङ्कले देखाउँछ । आफ्नो स्थापनाकालदेखि नै यस नगरीले आर्थिक तथा व्यापारिक केन्द्रको रुपमा आफूलाई चिनाउन सफल रहे तापनि हालको स्थिति जोकोहीले पनि मूल्याङ्कन गर्न सक्छन् । यहाँका भूतपूर्व प्रधानपञ्च एवम् भूतपूर्व गा.वि.स. अध्यक्ष श्री चीरञ्जीवी भक्त पौडेलको भनाइ पनि यस्तै किसिमको रहेको छ । उहाँको अनुसार हाल जीतपुरको विकासमा ह्रास आएको बताउनुहुन्छ । यसमा थप्दै उहाँ अगाडि भन्नुहुन्छ, “जीतपुरको विकास र प्रगतिको लागि म सदैव तन, मन र धनले लागिरहनेछु । सबैको साथ र सहयोगले मात्र यस जीतपुरलाई सुन्दर र सम्पन्न बनाउन सकिन्छ ।”

हामीले यहाँका थप एक भूतपूर्व गा.वि.स. अध्यक्ष एवम् प्रधानपञ्च श्री रमण चौधरीसँग पनि यस समसामयिक विषयमा बुझ्दा उहाँकै शब्दमा, “जीतपुर एउटा सुनको चराजस्तै हो । यहाँ जो व्यक्ति पनि आएर सजिलै आफ्नो व्यापार व्यवसाय गर्न सक्छन् । यस भेगकै व्यापारिक केन्द्रको रुपमा जीतपुर रहेको छ ।” भनी बताउनुभयो ।

यसै गरी जीतपुरका अग्रज एवम् जीतपुरसिमरा उपमहानगरपालिका वडा ७ का भूतपूर्व गा.वि.स. अध्यक्ष श्री कृष्ण व्रत सिंहले हालको जीतपुरको राजनीतिक एवम् सामाजिक अवस्था सन्तोषजनक रहेको भन्न नसकिने बताउनुभयो । उहाँले अगाडि थप्दै भन्नुभयो, “हामीले कुनै पनि व्यक्तिगत रिसराग नराखी सबैजना मिली यहाँको विकास गर्न सकिन्छ ।” हाल केही समय यता आएर जीतपुरमा मोनोपोली, धाकधम्की र प्रलोभनको राजनीति भइरहेको कुरा उहाँले स्वीकार गर्नुभयो ।

यसरी सरसर्ती हेर्दा अहिले जीतपुरले आफ्नो पुरानो साख समेत गुमाएको स्थिति रहेको छ । यहाँको पुरानो पहिचान बोकेको भैंसी बजार पनि लगभग लोप हुने स्थितिमा रहेको छ । त्यसैगरी व्यापारिक केन्द्रको उपाधि पनि छिमेकी सहरले लिइसकेको छ । यस्ता यस्तै केही उपलब्धीहरु यस नगरले गुमाएको छ भने केही गुमाउने क्रममै छ ।

यसले के देखाउँछ भने हाल जीतपुर अभिभावकविहीन भएको छ । जीर्ण बन्ने अवस्थामा रहेको जीतपुरको समग्र विकासको लागि असल तथा दूरदर्शी सोच भएको अभिभावकत्वको भूमिका निर्वाह गर्न सक्ने व्यक्तिको खाँचो छ । जुन जोगी आए पनि कानै चिरेका भनेझैं नेपालमा गणतन्त्र आएयता जीतपुरमा अनेकौं जनप्रतिनिधिहरु, सामाजिक अगुवाहरु, विभिन्न राजनैतिक दलका नेताहरु तथा सामाजिक अभियन्ताहरु देखा परे तर कसैले पनि यस क्षेत्रको अभिभावकत्व ग्रहण गर्न सकेको देखिंदैन । गाउँगाउँमा सिंहदरबार पुगिसकेको ढोल पिटे पनि जीतपुरको सन्दर्भमा भने यो लागू हुन नसकेको गुनासो स्थानीयहरुको रहेको छ । यहाँका प्रतिष्ठित व्यापारी शिवजी प्रसाद साह सोनारले दुखेसो पोख्दै भने, “जीतपुर व्यापारिक केन्द्रको रुपमा रहे तापनि यसको उचित व्यवस्थापन, अनुगमन तथा प्रवर्द्धन – सम्वर्द्वन नहुँदा आज जीतपुरको हविगत यस अवस्थामा पुगेको हो ।”

जीतपुरको सर्वाङ्गीण विकासको लागि यहाँको स्थानीय जनताहरु जागरुक भई स्वस्फूर्त रुपमा उठ्न र आफ्नो सहरको गुमेको वा गुम्न लागेको साखको संरक्षण गर्नको लागि सडा सङ्घर्ष गर्न नितान्त आवश्यक छ । विकासप्रेमीलाई सम्मान र विकासविरोधीको प्रतिकार गर्न सख्त आवश्यक रहेको छ । विकासप्रेमी स्थानीय बासिन्दाहरुले समयमै उचित कदम चालेनन् भने चोर चोर मौसेरा भाइ भनेझैं धमिराहरुले जीतपुरलाई नामेट पार्न बेर लगाउने छैनन् ।