जितपुरमा फुटपाथ निर्माणमा चरम् लापरवाही : सम्बन्धित निकाय मौन

मनाेज शाह जितपुर बारा फागुन ५ गते:
बाराको जितपुरसिमरा उपमहानगरपालिकाको वडा नम्बर ७ जितपुर अन्तर्गतको मुख्य सडक छेउको दुबै साइडमा फुटपाथ निर्माण गर्ने क्रममा चरम् लापरबाही गरिएको छ ।

हालसालै निर्माण गरिएको फुटपाथ कामचलाउ ढङ्गमा नियम विपरीत बनाइएको सजिलै देख्न सकिन्छ । फुटपाथ निर्माणको क्रममा माथिल्लो निकायबाट सही ढङ्गले निरीक्षण तथा सुपरीवेक्षण हुन नसक्दा निर्माणको जिम्मा पाएको निकायले लापरबाही गर्दै कतै सडककाे तलबाट त कतै सडककाे माथिबाट फुटपाथ निर्माण गरेको छ । पैदल यात्रुलाई हिडडुल गर्न अप्ठ्यारो हुने गरी कतै नालाको माथिबाट त कतै नालाको तलबाट फुटपाथ निर्माण गरिएको छ । मान्छे हिँड्ने ठाउँ एक लेबल हुनु पर्ने हाे तर जहाँतहीँ असामान्य ढङ्गले तलमाथि हुने गरी फुटपाथ निर्माण भएको स्थानीय युवा सन्ताेष गुप्ताले स्पर्श खबरलाई दु:खेसाे पाेखे । यही फुटपाथको कारणले गर्दा लडेर कयौं जनाकाे हातखुट्टा भाँचिएको तथा चोटपटक लागेको पनि उनले स्पर्श खबरलाई बताए ।

जितपुरमा सुविधाजनक फुटपाथसहितको सडक छिटोभन्दा छिटो निर्माण गर्नकाे लागि जितपुरकाे ब्यापारी , क्लबहरुले कयौंपटक आन्दोलन पनि गरेका थिए । पथलैया , सिमरा , जितपुर र परवानीपुरकाे सडक निर्माण गर्ने टेण्डर एउटै मितिमा पास भएको थियो तर जितपुरबाहेक सबै ठाउँको सडक निर्माण, बत्ती निर्माण, नाला निर्माणको काम एकवर्ष अगाडि नै सम्पन्न भइसकेको थियो । जितपुरमा सडक निर्माणको काम यति ढिलाे सुरु गर्दा पनि हाल यहाँको सडक कतै खाल्टाे परेको त कतै भत्केकाे साथै फुटपाथको दयनीय अवस्था रहे पनि सम्बन्धित निकाय मौन बसेको छ । अहिले जितपुरकाे सडक निर्माणको काम सम्पन्न हुने अन्तिम तयारीमा पुगे पनि सडक बिभागद्वारा निर्माण गरिएको सडक, नाला, फुटपाथ नियमविपरीत लापरबाहीपूर्ण ढङ्गले बनेको स्थानीयहरुले गुनासो गरेका छन् ।