सामाज

सहयोगी हात नेपालद्वारा विभिन्न स्थानीय निकायमा ज्ञापनपत्र पेस : लामखुट्टे नियन्त्रणका लागि ध्यानाकर्षण

मनोज  शाह, जीतपुर बारा, चैत्र २२ गते

जीतपुरसिमरा उपमहानगरपालिकाको वडा नं.७ जीतपुरमा रहेको सामाजिक संस्था सहयोगी हात नेपालले आज विभिन्न स्थानीय निकायहरुमा ज्ञापनपत्र बुझाएको छ । पछिल्लो समयदेखि सामाजिक कार्यमा सक्रिय बन्दै आइरहेको सहयोगी हात नेपाल नामक सामाजिक संस्थाले समयमै लामखुट्टे नियन्त्रण गर्नका लागि ध्यानाकर्षण गराउँदै जीतपुरसिमरा उपमहानगरपालिकाका प्रमुख प्रशासकीय अधिकृत शिवजी साह तथा वडा नं.७ का कार्यवाहक वडाध्यक्ष सीता उप्रेतीलाई आज दिउँसो ज्ञापनपत्र बुझाएको हो ।

गर्मीयाम बढेसँगै लामखुट्टेको प्रकोप पनि बढ्दै गइरहेकोले गर्दा लामखुट्टेको टोकाइबाट सर्वसाधारण जनतालाई सुरक्षित राख्न तथा विभिन्न रोगव्याधि आदि हुन नदिन समयमै लामखुट्टे नियन्त्रण कार्यका लागि वडा नं.७ भरि नै लामखुट्टे मार्ने औषधी छर्न सुझाव दिँदै सहयोगी हात नेपाल नामक सामाजिक संस्थाका अध्यक्ष देवन्न साहले जीतपुरसिमरा उपमहानगरपालिकाको कार्यालय तथा वडा नं.७ को कार्यालयमा उक्त ज्ञापनपत्र बुधबार बुझाउनुभएको हो ।

पर्साको विभिन्न स्थानबाट ५० लाखभन्दा बढी मूल्यको विविध सामग्रीहरु प्रहरीद्वारा जफत

मनोज  शाह, जीतपुर बारा, चैत्र २१ गते

भारतबाट भन्सार छली चोरी पैठारी गरी नेपाल भित्र्याइएको ५० लाखभन्दा बढी मूल्य बराबरको विविध सामग्रीहरु पर्साको वीरगन्ज महानगरपालिकाको विभिन्न स्थानहरुबाट प्रहरीले बरामद गरी नियन्त्रणमा लिएको छ । विशेष सूचनाको आधारमा जिल्ला प्रहरी कार्यालय पर्साबाट खटिएको टोलीले ५० लाख १२ हजार १ सय ८० मूल्य बराबरको औषधी, कपडा, चिनी र सुर्तीलगायतका सामानहरु आफ्नो नियन्त्रणमा लिएको हो ।

पर्साको वीरगन्ज महानगरपालिकाको वडा नं. १२ पावर हाउस चौकस्थित सडकखण्डबाट ना.८ख.३५४९ नम्बरको ट्रकमा लोड गरी राखिएको अ .मू.रु. ४१ लाख ९३ हजार दस रुपियाँ मूल्य बराबरको कपडा तथा खुद्रा सामानहरु प्रहरीले नियन्त्रणमा लिएको जनाएको छ । नियन्त्रणमा लिइएको सम्पूर्ण सामानहरु आवश्यक कारवाहीको लागि राजश्व अनुसन्धान कार्यालय पथलैयामा बुझाइएको प्रहरीले जानकारी दिएको छ ।

यसैगरी भारतबाट भन्सार छली चोरी पैठारी गरी अनधिकृतरुपमा कपडा, चिनी, सुर्ती तथा औषधीहरु गरी अ.म.रु. ८ लाख १९ हजार १ सय ७० मूल्य बराबरको सामग्रीहरु वीरगन्ज महानगरपालिकाको वडा नं.१६ रजतजयन्ती चौकस्थित सडकखण्डबाट प्रहरीले नियन्त्रणमा लिएको जनाएको छ । नियन्त्रणमा लिइएको सम्पूर्ण सामानहरु आवश्यक कारवाहीको लागि वीरगन्ज भन्सार कार्यालय पर्सामा बुझाइएको प्रहरीले जानकारी दिएको छ ।

दिगो बन ब्यवस्थापन कार्यबिधि मस्यौँदा बिरुद्ध साझेदारी बन महासंघ डेलिगेसन जाने

अमलेखगञ्जमा लाेकसेवा आयाेग तयारी कक्षा संचालन

मनाेज शाह, जितपुर बारा, चैत १८ गते:

बारा जिल्लाको अमलेखगञ्जमा लाेकसेवा आयाेग तयारी कक्षा संचालनमा आएको छ । अभियान संस्थाका अध्यक्ष लक्ष्मी तिमिल्सिनाकाे अध्यक्षतामा कार्यक्रम सुरु भएको छ । आज सम्पन्न भएको कार्यक्रमलाई सम्बोधन गर्दै कार्यक्रमकाे प्रमुख अतिथि जितपुरसिमरा उपमहानगरपालिकाको उपप्रमुख भाेला अधिकारीले यस क्षेत्रका युवाहरुलाई निजामती सेवातर्फ आकर्षित गर्न सुरु गरिएको लोकसेवा आयोग तयारी कक्षा निकै नै फलदायी साबित हुने बताउनुभयो ।

नगरका युवालाई दक्ष बनाउने उदेश्यले लाेकसेवा तयारी कक्षा संचालन गरिएको प्रमुख अतिथि अधिकारीले बताउनुभयो । जितपुरसिमरा उपमहानगरपालिका वडा २१ र अभियान नेपालकाे संयुक्त आयाेजनामा संचालन भएको लाेकसेवा आयाेग तयारी कक्षा १ महिना संचालन हुने भएको छ । उक्त लोकसेवा आयोग तयारी कक्षामा राम्रो पढाइ भइरहेको तयारी कक्षामा सहभागी ३० जना विद्यार्थीहरुले जानकारी दिए । वडाको बजेटबाट लाेकसेवा तयारी कक्षा भइरहेको छ ।

बिशिस्ट अतिथिको रूपमा जितपुरसिमरा उपमहानगरपालिकाको वडा २१ का वडा अध्यक्ष सुबश श्रेष्ठ , सुकुमाया कुमारी थिङ ,सीता बिक ,राजकुमार साह लगायत उपस्थिति रहेको थियोे ।

अनलाइनमार्फत ठगी धन्दामा संलग्न दुई चिनियाँ नागरिकसहितको गिरोह पक्राउ : नगदसहित ठूलो परिमाणमा विद्युतीय सामग्री बरामद

मनोज  शाह, जीतपुर बारा, चैत्र १८ गते

विगत लामो समयदेखि प्रहरी प्रशासनको नजरबाट जोगिएर अनलाइनमार्फत ठगी धन्दा गरिरहेको एक ठूलो गिरोहलाई पर्सा प्रहरीले पक्राउ गर्न सफल भएको छ । तिनजना चिनियाँ नागरिकको समेत संलग्नता रहेको उक्त गिरोहले वीरगंज महानगरपालिका वडा नं. १५ मा अवस्थित नन्दु पटेलको घरलाई आफ्नो कार्यस्थल बनाएर अनलाइन चिठ्ठा, अनलाइन किनमेलजस्ता अनेकौं प्रकारका प्रपन्चबाट सर्वसाधारण जनतालाई प्रलोभनमा पारी ठगी गर्ने गरेको प्रहरीको अनुसन्धानबाट खुलेको छ ।

जिल्ला प्रहरी कार्यालय पर्साले प्राप्त गरेको गोप्य सूचनाको आधारमा यसै कार्यालयको ईन्टेलिजेन्स टोलीले सूक्ष्मरुपमा निगरानी गर्ने क्रममा हिजो नन्दु पटेलको घरमा छापा मारी ठगी कार्यमा प्रयोग हुँदै आएको सरसामानसहित विभिन्न विदेशी तथा नेपाली नागरिकलाई पक्राउ गर्न सफल भएको हो ।

अनलाइनमार्फत ठगी कार्यमा संलग्न चिनियाँं नागरिकहरू वर्ष ३३ का LIU GUI CAI, वर्ष २६ का WANG BOHAN र वर्ष ३६ का XIANG XIAO लाई वीरगंज महानगरपालिकाको विभिन्न ठाउँबाट प्रहरीले पक्राउ गरेको छ । प्रहरीले घटनास्थलबाट कम्प्युटर डेक्सटप, ल्यापटप, मोबाईल फोनहरू लगायतका ठुलो परिमाणमा विद्युतीय उपकरणहरुसमेत बरामद गरेको छ ।

पर्सा प्रहरीले घटनास्थलबाट कम्प्युटर डेक्सटप CPU- १२० थान, मनिटर-११८ थान, पासपोर्ट थान-३, मोबाईल-३५ थान, भारतीय Geo Sim card-१३ थान, ल्यापटप- ४ थान,प्रिन्टर-१ थान, विभिन्न बैंकहरूका ATM CARD-३ थान,Keyboard-२६ थान,Internet Switch-५ थान,WiFi Router-२ थान,Mini Inverter-२ थान,BR01CX 5792 नम्बरको 120 गाडी, प्र.२-०३-०११ प १३६७ नम्बरको मोटरसाइकल १ थान समेत विभिन्न देशका मुद्राहरू मलेशियन ३७ रिंगिट, नेपाली ५०० दरका नोट ८६ पिस गरी रू.४३,०००।– तथा कम्बोडियन -३५०० नगद समेत बरामद गरेको पर्सा प्रहरीका प्रहरी उपरीक्षक कुमोद ढुङ्गेलले जानकारी दिएका छन् ।

न्यायको भीख माग्दामाग्दै पिताको मृत्यु : ससुराली पक्षले आफ्नो नागरिकता नबनाइदिएको पीडित किरणको आरोप

मनोज  शाह, जीतपुर बारा, चैत्र १८ गते

जीतपुरसिमरा उपमहानगरपालिका वडा नं. ७ शान्तिटोलमा घर भई चितवन जिल्लाको खैरेनी नगरपालिकाको वडा नं. ९ बैरोनीमा विवाह भएको किरण कुमारी साह ससुराली पक्षको ज्यादतीका कारण अन्यायमा परेकी छिन् । दुई छोराहरुकी आमा किरणको श्रीमानको ६ वर्षअघि वैदेशिक रोजगारीको सिलसिलामा मृत्यु भएको थियो । किरणले पटकपटक आफ्नो नागरिकता बनाइदिन अनुनय विनय गरेपनि ससुराले नागरिकता नबनाइदिएको किरणको आरोप छ ।

आफूले नागरिकता बनाइदिन अनुरोध गर्दा ससुरासहित ससुराली पक्षका सबैजना मिली आफूमाथि निर्घात कुटपिट गरेको किरणले बताउँछिन् । जति पटक नागरिकता बनाउन अनुरोध गर्‍यो त्यति नै पटक मेरो मम्मीलाई हजुरबुबा, हजुरआमा र अरु जना मिली कुटपिट गरेको कुरा किरणको जेठो छोरोले आँखाबाट आँसु झार्दै स्पर्श खबरलाई बताए । त्यति मात्रै नभएर विदेशमा मृत्यु भएका पिताको शव विदेशबाट घर ल्याइएपछि मृत बुबाको शवलाई समेत हजुरबुबाले लात्तैलात्तले हान्नुभएको कुरा किरणको जेठो सन्तानले स्पर्श खबरलाई जानकारी दिए ।

जति गुहार लगाएपनि ससुराले वास्तै नगरेपछि बाध्य भएर किरणले नागरिकता बनाइदिन माग गर्दै ससुराविरुध्द अदालतमा मुद्दा दिएकी थिइन् । अदालतले किरणको पक्षमा फैसला गरेपछि सोही कागजात लिई किरण र उनको बुबा भगवान साह सोनार जिल्ला प्रशासन कार्यालय चितवन गएका थिए । जिल्ला प्रशासन कार्यालयमै सिडिओकै अगाडि किरणकी सासू, ससुरालगायत अन्य व्यक्तिहरुले किरण र उनको बुबालाई तथानाम गालीगलौज गर्न थाले । यो कुराबाट मानसिक तनाव उत्पन्न भई किरणको बुबालाई अचानक छाती दुख्न र श्वास लिन गाह्रो हुन थाल्यो । भगवान साह सोनारले आफूलाई मुटुमा असह्य पीडा भएको र श्वास लिन पनि अप्ठ्यारो भएको भन्दै चाँडै अस्पताल पुर्‍याउन भनेपछि किरणले हतारहतार अटो बोलाएर बुबालाई अस्पताल लगिन् । डाक्टरले अनेकौं प्रयास गरेपनि किरणको बुबालाई बचाउन सकेनन् । उनलाई अचानकको गहिरो मानसिक तनावको कारण मुटुमा समस्या उत्पन्न भई मृत्यु भएको अस्पतालको रिपोर्टमा उल्लेख गरिएको छ ।

आफ्नो छोरीको लागि न्याय माग्न गएका गरिब पिताले आफ्नो अन्तिम श्वाससम्म न्यायको भीख मागिरहे तर उनी र छोरी किरणले न्याय पाएनन् । आफ्नो पिताको मृत्युसँगै न्याय पाउने आशा पनि झिनो बन्दै गएको पीडित किरण कुमारी साह दुखेसो पोख्छिन् । आफ्नो नागरिकता नबन्दा आफ्ना दुई सन्तानहरुको भविष्य पनि अन्धकारमय बन्न लागेको दु:ख पोख्दै आफ्ना कलिला सन्तानहरुको उज्ज्वल भविष्यका लागि भएपनि आफ्नो नागरिकता बनाइदिन सहयोग गरिदिन सम्पूर्ण सम्बन्धित निकाय, बुद्धिजीवी, अगुवासमक्ष पीडित किरण कुमारी साहले स्पर्श खबरमार्फत् अनुरोध गरिन् ।

सहयाेगी हात नेपाल जीतपुरद्वारा जीतपुरकाे मन्दिर सरसफाइ

मनाेज शाह, जीतपुर बारा, चैत १७ गते:

सहयाेगी हात नेपाल जीतपुरका सदस्यहरुले आज बिहान जीतपुरमा रहेको ब्रहम बाबाको मन्दिरमा सरसफाइ गरेका छन् । जीतपुरसिमरा उपमहानगरपालिका वडा ७ जीतपुरमा रहेको सामाजिक संस्था सहयाेगी हात नेपालले जीतपुरमा अवस्थित ब्रहम बाबाको मन्दिरको सरसफाइ गरी हिन्दु धर्मावलम्बीहरुको आस्थासँग प्रत्यक्ष सम्बन्ध राख्ने धार्मिक महत्त्वका स्थलहरुको संरक्षणमा सबैजना जागरुकताका साथ जुट्नुपर्ने उदाहरण प्रस्तुत गरेका छन् ।

सहयाेगी हात नेपालकाे सचिव चन्द्रेश्वर पासवानकाे अगुवाइमा मन्दिरको सरसफाइ गरिएको हो । सहयाेगी हात नेपालकाे सम्पूर्ण सदस्यहरुले मिली तदारुकताका साथ धार्मिक एवम साँस्कृतिक महत्त्व बोकेको ब्रहम बाबाको मन्दिरपरिसरको सरसफाइ गरेका हुन् । सरसफाइपश्चात् स्पर्श खबरसँग कुरा गर्ने क्रममा संस्थाकै एक युवा सदस्य प्रबेज पासवानले धार्मिक स्थलको सरसफाइ गर्न पाउँदा आफूहरु अत्यन्तै हर्षविभोर भएको बताए । पुर्खौंदेखि धार्मिक आस्थाको केन्द्र रहेका स्थानीय धार्मिक मठ, मन्दिर, चौतारा आदिको सरसफाइ एवम् संरक्षण गरी समाजको उज्ज्वल भविष्यका लागि सबैले एकजुट भई लाग्नुपर्ने यहाँका स्थानीयहरु बताउँछन्

जीतपुरका समाजसेवी रन्धीर गुप्ताद्वारा ‘सहयोगी हात नेपाल’ लाई टि शर्ट हस्तान्तरण

मनोज  शाह, जीतपुर बारा, चैत्र १७ गते

सामाजिक रुपान्तरणका लागि भविष्यमा समाजसेवातर्फ थप अग्रसर भई लाग्न र सामाजिक कार्यहरुमा योगदान दिन थप हौसला र उत्प्रेरणा प्रदान गर्ने हेतुले आज जीतपुरका समाजसेवी रन्धीर गुप्ताले एक सामाजिक संस्थालाई टि शर्ट प्रदान गरी सहयोग गरेका छन् । जीतपुरसिमरा उपमहानगरपालिकाको वडा ७ मा रहेको सहयोगी हात नेपाल, जीतपुर नामक सामाजिक संस्थालाई जीतपुरकै स्थानीय समाजसेवी रन्धीर गुप्ताले आफ्नो पिता स्वर्गीय चन्द्रदेव प्रसाद साह कलवार को स्मृतिमा १२ ओटा टि शर्ट सहयोग गरेका हुन् । सहयोगी हात नेपाल, जीतपुरका अध्यक्ष देवानन्द साहलाई टि शर्ट हस्तान्तरण गरे पश्चात आफूलाई आत्मसन्तुष्टि प्राप्त भएको कुरा समाजसेवी रन्धीर गुप्ताले स्पर्श खबरलाई जानकारी दिएका छन् ।

अरुलाई सहयोग गर्दा त्यो सहयोग कुनै न कुनै रुपमा आफूनेर पुन: फर्किने कुरा उल्लेख गर्दै अरुलाई सहयोग गर्न सदैव तत्पर रहनुपर्ने कुरामा सहयोगी हात नेपाल, जीतपुरका अध्यक्षले जोड दिनुभयो ।  धन धेरैसंग भएपनि   उदार मन सबैसँग नभएको दुखेसो पोख्दै सहयोगी हात नेपाल, जीतपुरका अध्यक्ष साहले  आफ्नो संस्थालाई सहयोग उपलब्ध गराउने समाजसेवी रन्धीर गुप्तालाई हृदयदेखि नै धन्यवाद ज्ञापन गर्दै उहाँको सम्पूर्ण घरपरिवारको सुख, समृद्धि तथा उत्तरोत्तर प्रगतिको कामना गरेका छन् । वर्तमान समाजमा नि:स्वार्थ रुपमा सहयोग गर्ने उदार हृदयका मानिसहरुको निकै खाँचो रहेको हुँदा रन्धीर गुप्ताज्यू जस्तै उदाहरणीय बनेर सहयोग गर्न अघि बढ्नुपर्ने कुरा सहयोगी हात नेपाल, जीतपुरका अध्यक्ष साहले स्पर्श खबरलाई बताउनुभयो ।

चितवनका डी.एस्.पी. डा. हेम के.सी. को भव्य स्वागत

मनोज  शाह, जीतपुर बारा, चैत्र १६ गते

आज एक कार्यक्रमका बीच चितवन रत्ननगर ईलाका प्रहरी कार्यालयका डी.एस्.पी. डा. हेम के.सी. को सफल कार्यकालको लागि शुभकामनासहित भव्य स्वागत गरिएको छ । चितवन मोबाइल व्यावसायिक संघ पूर्वी चितवनका सदस्यहरुद्वारा चितवन रत्ननगर ईलाका प्रहरी कार्यालयका डी.एस्.पी. डा. हेम के.सी. को सफल कार्यकालको लागि शुभकामनासहित भव्य स्वागत गरिएको हो ।

हाम्रो प्रहरी राम्रो प्रहरी, प्रहरी हाम्रो साथी भन्ने नाराका साथ चितवन मोबाइल व्यावसायिक संघ पूर्वी चितवनका अध्यक्ष रत्न भट्टले डी.एस्.पी. डा. हेम के.सी. लाई खादा ओढाई मायाको चिनो प्रदान गर्दै स्वागत तथा सफल कार्यकालको लागि शुभकामना दिएका थिए । यसै मौकामा यहाँका जनतालाई सुशासनसहितको कानुनी रज्यको आभाष दिलाई रत्ननगरलाई अनमोल रत्नमा परिवर्तन गर्न अध्यक्ष भट्टले डी.एस्.पी. डा. हेम के.सी.समक्ष अनुरोध गरेका छन् ।

बारामा मधेस प्रदेश सरकारका शिक्षा तथा संस्कृति मन्त्रीको भव्य स्वागत तथा सम्मान : मधेसको शिक्षा क्षेत्रको स्तरोन्नतिका लागि आफू प्रतिबद्ध रहेको शिक्षा मन्त्रीको भनाइ

रन्जित कुमार चाैधरी , जीतपुर बारा, चैत्र १५ गते

गत निर्वाचनमा पर्सा ३ (क) बाट स्वतन्त्र उम्मेदवारको रुपमा लोकप्रिय मत ल्याएर जनताहरुको मन जित्दै निर्वाचित भएका स्वतन्त्र प्रदेश सांसद प्रमोद कुमार जयसवालज्यूले गत शनिबार नेकपा एमालेको तर्फबाट मधेस प्रदेश सरकारको शिक्षा तथा संस्कृति मन्त्रीको पदभार ग्रहण गरेलगत्तै सफल कार्यकालको शुभकामना तथा बधाई दिनेहरुको ओइरो लागेको छ ।

मधेस प्रदेश सरकारको शिक्षा तथा संस्कृति मन्त्रीको रुपमा शपथ ग्रहण गरेपछि माननीय प्रमोद कुमार जयसवालज्यू आफ्नो क्षेत्रका जनताहरुसँंग भेटघाट गर्न पर्सा जिल्लामा व्यस्त रहँदा बारा जिल्लाको जीतपुरमा पनि आज एक कार्यक्रमका बीच उहाँको भव्य स्वागत एवम् सम्मान गरिएको छ । नेपाल सितोरियो कराते जीतपुरले आयोजना गरेको कार्यक्रममा नेपाल सितोरियो कराते शाखा जीतपुरका प्रशिक्षक मनोज कुमार शाहले मायाको चिनो प्रदान गरी माननीय मन्त्रीज्यूको स्वागत, सम्मान तथा शुभकामना व्यक्त गरेका थिए ।

बारा जिल्लाको जीतपुरसिमरा उपमहानगरपालिका वडा ७ मा नेपाल सितोरियो कराते शाखा जीतपुरले आयोजना गरेको कार्यक्रमलाई सम्बोधन गर्दै मधेस प्रदेश सरकारको शिक्षा तथा संस्कृति मन्त्रालयको जिम्मेवारी पाउनुभएका मन्त्रीज्यूले मधेस प्रदेशको शिक्षा क्षेत्रको स्तरोन्नतिका लागि आफू प्रतिबद्ध रहेको बताउनुभयो ।

प्रत्येक बालबालिकाको उज्ज्वल भविष्यको निर्माण यहाँका सामुदायिक विद्यालयबाट पनि सम्भव छ भन्ने कुरामा जोड दिँदै आफूले पाएको जिम्मेवारीलाई इमानदारीताका साथ पूरा गर्दै समग्र मधेस प्रदेशको शिक्षा क्षेत्रको स्तरोन्नतिका लागि नयाँ भिजनका साथ अगाडि बढ्ने कुरा मन्त्रीज्यूले बताउनुभयो । सामुदायिक विद्यालयमा गरिएको लगानीको सही सदुपयोग गरी प्रत्येक बालबालिकाको उज्ज्वल भविष्य निर्माणको लागि आफूले अत्यन्तै महत्त्वपूर्ण भूमिका निर्वाह गर्ने आश्वासन उहाँले व्यक्त गर्नुभयो ।

बारा जिल्लाको जीतपुरसिमरा उपमहानगरपालिका वडा ७ मा नेपाल सितोरियो कराते शाखा जीतपुरले आयोजना गरेको कार्यक्रममा कलवार कल्याण समितिका अध्यक्ष कन्हैया गुप्ता, जीतपुर युवा क्लबका अध्यक्ष भुनेश पासवान, ठेला संघका अध्यक्ष महेन्द्र पासवान , सहयाेगी हात नेपालका अध्यक्ष देवानन्द साह, सन राइज युवा क्लबका अध्यक्ष वन्दना चाैधरी, व्यापारी पप्पु साह, सुरेस साह, महिला नेतृ दिपु पासवान, ट्राफिक प्रहरी जीतपुरका प्रमुख बब्लु ठाकुर  लगायत स्थानीय बुद्धिजीवी, समाजसेवी, पत्रकार, सुरक्षाकर्मी, खेलाडीहरुको समेत उपस्थिति रहेको थियोे । कार्यक्रमको सहजीकरण पत्रकार एस्एस पटेलले गर्नुभएको थियो ।