समाचार

दलित समुदायलाई अत्यावश्यक सामग्री वितरण

मनाेज शाह, जीतपुर बारा, फागुन २८ गते:

जीतपुरसिमरा उपमहानगरपालिकाको वडा नं. ५ ले आज एक कार्यक्रमको आयोजना गरी आफ्नो वडाभित्रका दलित समुदायलाई विभिन्न अत्यावश्यक सामग्री हस्तान्तरण गरेको छ । जीतपुरसिमरा उपमहानगरपालिकाको वडा नं.५ को कार्यालयले वडास्तरीय दलित उत्थान कार्यक्रम बजेट शीर्षक अन्तर्गत रु. १ लाख ३० हजार बराबरको सामग्री त्यहाँका दलित समुदायलाई उपलब्ध गराएको छ ।

वडाले दलित समुदायलाई विवाह, पार्टी , गाेष्ठी आदिको लागि आवश्यक पर्ने सामग्रीहरु उपलब्ध गराएको छ । वडास्तरीय दलित उत्थान कार्यक्रम बजेट शीर्षक अन्तर्गत रहेर वडाले पण्डाल, टेन्ट, डायनिङ टेबल, ३० ओटा कुर्सीहरु तथा विभिन्न भाँडाकुँडाहरु लगायतको सामग्रीहरु वितरण गरेको वडा नं. ५ का वडाध्यक्ष दिपेन्द्र चाैधरीले स्पर्श खबरलाई जानकारी दिनुभएको छ ।

जीतपुरसिमरा उपमहानगरपालिकाको उपप्रमुख भाेला अधिकारीकाे हातबाट साे सामग्रीहरु हस्तान्तरण गरिएको थियो । वडा नं. ५ ले आयोजना गरेको सामग्री हस्तान्तरण कार्यक्रममा वडा सदस्यहरु, दलित अगुवाहरु इन्दल पासवान, सन्तोष राम  लगायतको उपस्थिति  रहेको थियोे ।

किसानकै छोरी भएकोले किसानहरुको दु:ख, पीडा हटाउन कृषकहरुको जीवनस्तर उकास्ने किसिमको विशेष प्याकेज ल्याइने कृषि तथा पशुपन्छी विकास मन्त्री साहको दाबी

मनोज  शाह, जीतपुर बारा, फाल्गुन २७ गते

जीतपुरसिमरा उपमहानगरपालिकाले आज विशेष कार्यक्रमको आयोजना गरी आफ्नो ८ औं स्थापना दिवस मनाएको छ । स्थापनाकालको ८ औं वसन्त पार गर्दै यस कार्यालयले विभिन्न चुनौतीहरुको सामना गर्दै आफूलाई समाजमा अब्बल रुपमा स्थापित गर्न सफल भएको छ । जीतपुरसिमरा उपमहानगरपालिकाका मेयर राजन पौडेलको अध्यक्षतामा सम्पन्न भएको कार्यक्रममा कृषि तथा पशुपन्छी विकास मन्त्री ज्वाला कुमारी साहले प्रमुख अतिथिको रुपमा दीप प्रज्ज्वलन गरी कार्यक्रमको उद्घाटन गर्नुभएको थियो ।

यसैगरी कार्यक्रममा बाराका प्रमुख जिल्ला अधिकारी शशीधर घिमिरे, एस्. पी. सुरेन्द्र काफ्ले, जीतपुरसिमरा उपमहानगरपालिकाका उपमेयर भोलाप्रसाद अधिकारी, पूर्व संविधानसभा सदस्य मधु शाही ठकुरी, पूर्व गा. वि. स. अध्यक्ष कृष्णव्रत सिंह, विभिन्न राजनैतिक दलका अगुवा, विभिन्न वडाका वडाध्यक्ष, , जीतपुरसिमरा उपमहानगरपालिकाका प्रमुख प्रशासकीय अधिकृत शिवजी साह लगायत ज्येष्ठ नागरिक, शिक्षक, विद्यार्थी, कर्मचारीहरुको उपस्थिति रहेको थियो ।

्

कार्यक्रममा बोल्दै कृषि तथा पशुपन्छी विकास मन्त्री ज्वाला कुमारी साहले आफू पनि किसानकै छोरी भएकोले गर्दा प्रत्येक घरघरको किसानहरुको दु:ख, पीडा आफूले नजिकबाट बुझेको कुरा उल्लेख गर्दै किसानहरुको समस्यालाई आफ्नै समस्या ठानी ती समस्याहरुको समाधानको लागि जस्तोसुकै मूल्य चुकाउन पनि पछि नपर्ने उहाँले दाबी गर्नुभयो । संघीयताकै फलस्वरुप महिला, मधेसी, आदिवासी, जनजाति लगायतले अगाडि बढ्ने अवसर पाएको कुरामा समेत उहाँले जोड दिनुभयो ।

विगतमा राज्यबाट उपेक्षा गरिएका गरिब एवम् निमुखा कृषकहरुको प्रत्येक योगदानको कदर गर्दै मुलुकका कुनाकुनामा रहेका कृषकहरुको जीवनस्तर उकास्ने किसिमको विशेष प्याकेज आफ्नो कार्यकालमा ल्याउन लागिएको उहाँले जानकारी दिनुभयो । नेपालमा किसानको योगदानलाई मध्यनजर गर्दै कृषि तथा पशुपन्छी विकासको क्षेत्रमा दीगो विकासकाे बजेट विनियाेजन गर्नुका साथै किसानहरुको लागि फाइदा हुने हरेक क्षेत्रमा आफूले काम गर्ने उहाँले घोषणा गर्नुभयो । अन्य मुलुकहरुबाट भित्रिने कृषि तथा खाद्यान्न सामग्रीका कारण स्थानीयस्तरमा उत्पादित कृषि सामग्रीहरुले उचित मूल्य तथा स्थान नपाएको गुनासो पोख्दै यसको समाधानको बाटो आफूले चाँडै निकाल्ने कुरा मन्त्री साहले बताउनुभयो ।

जीतपुरसिमरा उपमहानगरपालिकाले आफ्नो ८ औं स्थापना दिवसको उपलक्ष्यमा जीतपुरसिमरा उपमहानगरपालिकाभित्रका ज्येष्ठ नागरिक, उत्कृष्ट शिक्षक, उत्कृष्ट विद्यार्थी तथा कर्मचारीहरुलाई सम्मान समेत गरेको थियो ।

कानु समाज नेपाल पर्साको बैठक सम्पन्न, चैत्र ९ गते होली मिलन गर्ने निर्णय

पवन शाह वीरगंज, २६ फागुन

कानु समाज नेपाल पर्साको बैठक आज पोखरीयामा सम्पन्न भएको छ । समाजका पर्सा अध्यक्ष लक्ष्मण साह कानुको अध्यक्षतामा सम्पनन बैठकले चैत्र ९ गते वीरगंजमा होली मिलन समारोह गर्ने निर्णय गरेको छ । यसैगरी बैठकले कानु समाजको १४ वटै पालिकाहरुमा पालिका अधिवेशन गर्ने निर्णय गरेको छ । होली मिलन समारोहको समाजले आर्थिक व्यवस्थापन आफै गर्ने निर्णय समेत गरेको समाजका सल्लाहकार अकलेश कुमार साहले जानकारी दिए । “ बिगतको बर्षझै यसबर्ष पनि होली मिलन समारोहलाई निरन्ता दिने निर्णय गरेका छौ र यसका लागि आर्थिक व्यवस्थापन पनि समाजले नै गर्ने निर्णय गरेका छौ” साहले भने । साथै कानु स्वजातियबाट संघिय कृषि मन्त्रीको रुपमा ज्वाला साह मन्त्री बनेकोमा समाजले खुशी व्यक्त गरेको छ । बैठकमा उपाध्यक्ष सोनालाल साह ,सचिव श्रवण साह, सह सचिव सुरेन्द्र साह, सदस्यहरु राजन साह, दयानन्द गुप्ता लगायतको उपस्थिती रहेको थियो ।

नियमनकारी निकाय सुस्त हुँदा पोखरिया नगरपालिका भ्रष्टाचारीहरुको अखडा बन्दै

रंजित चौरसिया,पाेखरिया  फागुन २६ गते।

बेलाबेलामा पर्सामा भ्रष्टाचारको घट्नाहरुले चर्चा पाइरहेका हुन्छन् । यहाँका कुनै पनि निकाय भ्रष्टाचारको पासोबाट मुक्त छैन । पर्सा जिल्लाकै पोखरिया नगरपालिकाका निमित्त प्रमुख प्रशासकीय अधिकृत अजय कुमार श्रीवास्तवले भ्रष्टाचारको मामिलामा ताण्डव नै मच्चाएको स्थानीयहरुले आरोप लगाएका छन् । श्रीवास्तवका कारण पोखरिया नगरपालिका भ्रष्टाचारीहरुको अखडा बन्दै गएको स्थानीयहरुले गुनासो गरेका छन् ।

आफ्नो पदीय गरिमाको ख्यालै नगरी अधिकृत श्रीवास्तवले भुजापकौडीको पसलदेखि लिएर चिया नास्ता लगायतका ठाउँहरुबाट पनि कमिशन असुल्ने गरेको बताइन्छ । पोखरिया नगरपालिकामा दशौं तह (उपसचिव)को दरबन्दी भए पनि सातौं तहमा कार्यरत्त श्रीवास्तवले संघीय मामिला तथा सामान्य प्रशासन मन्त्रालयलाई रिझाउँदै निमित्त हाकिम बन्न सफल भएको सोही कार्यालयका कर्मचारीहरु बताउँछन् ।

पोखरिया नगरपालिकामा हेल्थ ईन्सपेक्सनको दरबन्दी नभएता पनि मेयर प्रद्युमन प्रसाद चौहान र उपमेयर रुबी ठाकुरबीच आपसी मनमुटाव सिर्जना गर्दै मेयरको सहयोगमा आफ्नो रोटी सेक्दै निमित्त बन्दै आएको कर्मचारी स्रोतको भनाइ रहेको छ ।

सबैलाई रिझाउन खप्पिस अधिकृत श्रीवास्तव हेल्थ ईन्सपेक्सनको ७ औं तहको कर्मचारी भए पनि उनी संघीय मामिला तथा सामान्य प्रशासन मन्त्रालयलाई भेटी चढाउँदै आफ्नो म्याद थप्न लगाई आगामी आषाढ मसान्तसम्मको म्याद थप गराएको ती स्रोतको भनाइ रहेको छ ।

भ्रष्ट अधिकृत श्रीवास्तवले नगरपालिकाको प्रत्येक भुक्तानी हुनु भन्दा अगाडि अनिवार्य पर्सनल कमिशन (पिसि) बुझेपछि मात्र भुक्तानी दिने गरेको बताइन्छ । भ्रष्टाचारको मामिलामा गन्हाइसकेका अधिकृत श्रीवास्तवले जिन्सी प्रमुख मनोज साहको मिलोमतोमा जिन्सीको सामान नै नल्याइकन बिल मात्र राखी लाखौं लाख भुक्तानी गरेको स्रोतले जनाएको छ ।

अधिकृत श्रीवास्तव र जिन्सी प्रमुख साहले प्रायः साँझ रक्सीको मातमा योजना बनाउने र सोही योजना अनुसार बिना सामानको बिल मात्र राखी भुक्तानी गर्ने गरेको ती स्रोतको भनाइ रहेको छ । कमिशन र घुसको मामिलामा आतंक मच्चाउँदै आएका भ्रष्ट अधिकृत श्रीवास्तवले करिब दुई महिना अगाडि बिना सूचनाको करिब ७ जना कर्मचारी भर्ना गरेको स्रोतको भनाइ रहेको छ ।

पोखरिया नगरपालिकामा अपरेटर र सुपरवाइजरको पद रिक्त नभए पनि मधु पाण्डे, अमित चौहान, संदिप साह गोढ, सरोज चौहान लगायत ७ जना मध्ये ५ जना सँग जनही २ लाखको दरले रकम लिई भ्रष्ट अधिकृत श्रीवास्तवले नियुक्ती दिएको स्रोतको कथन रहेको छ । जसमध्ये २ जना कर्मचारी मेयर चौहानको नजिकको रहेको कारण सो २ जनाले घुसको रकम नदिएको ती स्रोतको दाबी छ । बिना सूचनाको भर्ना भएका कर्मचारीहरु नेपाल सरकारको चौथो तहको तलब सुविधा खाने हरेको स्रोतले जनाएको छ ।

हेल्थ ईन्सपेक्सनको  कर्मचारीलाई प्रशासन सम्बन्धी खासै अनुभव नभएतापनि संघीय मन्त्रालयमा लाखौं लाख खर्चेर हाकिम बन्न सिपालु रहेका अधिकृत श्रीवास्तवलाई कार्यालयका कर्मचारीहरुले नै भ्रष्टाचारी हाकिम भन्ने गरेको एक ठेकेदारले बताए ।

भ्रष्टाचार कसरी गर्ने बारेमा सूक्ष्म अनुभव बोकेका अधिकृत श्रीवास्तवको कालाकर्तुतले पोखरिया नगरपालिका बदनाम हुँदै गए पनि मेयर चौहान, उपमेयर ठाकुर लगायतका जनप्रतिनिधिहरु संवेदनशील नहुँदा नगरपालिका थप बदनाम हुँदै गएको पोखरियावासीहरुको कथन रहेको छ ।

जिन्सीमा अवैध भुक्तानी, पदरिक्त नभए पनि कर्मचारीहरुको बिना सूचनाको भर्ना, विकास निर्माण, सामाजिक विकास तथा लक्षित वर्गको कार्यक्रम लगायतका सन्दर्भमा अख्तियार दुरुपयोग अनुसन्धान आयोग लगायतका नियमनकारी निकायले छानबिन गरी कारवाही प्रक्रिया अगाडि नबढाउँदा अधिकृत श्रीवास्तवले “दिन दुगुना रात चौगुना” एनि हाउ पैसा कमाउ अभियानमा सक्रिय नै रहेको स्रोतको कथन रहेको छ । यस सन्दर्भमा अधिकृत श्रीवास्तव सँग मोबाईल फोन सम्पर्क गर्दा सम्पर्क हुन सकेन ।

अत्याधुनिक प्रविधियुक्त रेडिमिक्स कन्क्रीट उद्योग स्थापना भयो : जनताको घरदैलोमै पुगेर सेवा दिइने संचालकको दाबी

मनाेज शाह, जितपुर बारा, फाल्गुन  २६ गते:

जीतपुरसिमरा उपमहानगरपालिकाको वडा नं. १० नितनपुरमा अत्याधुनिक प्रविधि जडान भएको रेडिमिक्स उद्योग एलाइट आर. एम. सि. प्रा. लि. को स्थापना भएको छ । हालसम्म जनताहरुले अनेकौं समस्या भोग्नुपरिरहेका बेलामा यस उद्योगले उपलबध गराउने छिटोछरितो र गुणस्तरीय सेवाबाट सबैले समस्याबाट मुक्ति पाउने जनविश्वास लिइएको छ ।

समयमा काम पूरा नहुने, भएको काम पनि गुणस्तरहीन हुने, महँगो पैसा तिरेपनि चित्तबुझ्दो प्रतिफल प्राप्त नहुने जस्ता चुनौतीहरुको सामना गर्न बाध्य यस भेगका जनताहरुको लागि अत्याधुनिक प्रविधि जडान भएको रेडिमिक्स उद्योग एलाइट आर. एम. सि. प्रा. लि. वरदान साबित हुनेछ । बारा जिल्लामै सम्भवतः सबैभन्दा ठूलो लगानीमा स्थापित यस उद्योगले आफूलाई भौतिक निर्माण क्षेत्रमा अब्बल साबित गर्दै यहाँको जनताहरुलाई आफ्नो अत्याधुनिक प्रविधिबाट छिटोछरितो , सन्तोषजनक तथा गुणस्तरीय सेवा उपलब्ध गराउन प्रयासरत रहने संचालकको एकमात्र उद्देश्य रहेको छ ।

ठुलो लगानीमा बाराको नितनपुर चौकमा स्थापित रेडिमिक्स उद्योग एलाइट आर. एम. सि. प्रा. लि. ले रेडिमिक्स कन्क्रीट अर्थात् तयारी ढलान उत्पादन गर्ने र कार्य स्थलमा डेलिभरी गर्ने तथा घरदैलोमै सुपथ मूल्यमा गुणस्तरीय सेवा उपलब्ध गराई निर्माण क्षेत्रमा योगदान पुर्‍याउने आफूहरुको एकमात्र लक्ष्य रहेको रेडिमिक्स उद्योग एलाइट आर. एम. सि. प्रा. लि. का डाइरेक्टर सन्तोष कुश्वाहाले जानकारी दिए । बारामा स्थापना भए पनि यसको कार्य क्षेत्र विस्तार गर्दै लैजाने र बारा, पर्सा, रौतहट, मकवानपुर लगायतका क्षेत्रमा पनि सेवा उपलब्ध गराउने दीर्घकालीन योजना रहेकोले अन्य जिल्लाका जनताहरु पनि लाभान्वित हुने विश्वास सन्तोष कुश्वाहाले व्यक्त गरेका छन् ।

हिन्दुधर्म र संस्कृतिको जगेर्नामा जुटे युवा : शिवरात्री पर्वको महत्त्व र गरिमा जोगाउनुपर्ने धारणा

मनाेज  शाह, जितपुर बारा, फागुन २४ गते

जितपुरसिमरा उपमहानगरपालिकाको वडा नं. १४ रजघट्टाका बुद्धिजीवी, युवावर्ग, आमा समूह लगायतका सम्पूर्ण स्थानीय बासिन्दाहरुको विशेष सहभागितामा हिन्दुधर्म र संस्कृतिको जगेर्ना गर्ने महान् अभियान सुरु भएको छ ।

हिन्दु धर्मावलम्बीका नयाँ युवा पुस्ताले आफ्नो धर्म संस्कृति, रीतिरिवाज बिर्संदै गएको तथा युगौंदेखिको हिन्दु परम्परा, रीतिरिवाज, संस्कार- संस्कृति आदि लोप हुने अवस्थामा पुगेकोले आफ्नो धर्म संस्कृतिको रक्षा गर्ने उद्देश्यका साथ जितपुरसिमरा उपमहानगरपालिकाको वडा नं. १४ रजघट्टाका सम्पूर्ण हिन्दु धर्मावलम्बीहरु एकताबद्ध भएर लागिपरेका छन् ।

महाशिवरात्रीको महिमा र गरिमा जोगाउन फाल्गुन २५ गतेको महाशिवरात्री पर्व रजघट्टाको प्रसिद्ध शिव मन्दिरमा भव्यताका साथ मनाउने आफूहरुको योजना रहेको स्थानीय युवा प्रदीप रिजालले स्पर्श खबरलाई जानकारी दिएका छन् । अनुभवले खारिएका अग्रज वृद्ध अभिभावकहरुको मार्गनिर्देशनमा यसपालिको महाशिवरात्री पर्व अन्य वर्षभन्दा पृथक बनाउन युवावर्गले यस क्षेत्रभरि नै शिव भगवान अङ्कित झण्डा बडो आकर्षक ढङ्गले लगाएका छन् ।

प्रत्येक वर्ष महाशिवरात्री पर्वको अवसरमा रजघट्टामा लाग्ने मेलालाई यस वर्षदेखि अझै स्तरोन्नती गरी फरक ढङ्गले प्रस्तुत हुने जानकारी गराउँदै हिन्दु धर्म तथा शास्त्रले सिकाएअनुसार अगाडि बढ्दै सफलताको शिखरमा पुग्ने आफूहरुको लक्ष्य रहेको प्रदीप रिजालले जानकारी दिनुभयो ।

जितपुरसिमरा उपमहानगरपालिकाको वडा नं. १४ रजघट्टामा अवस्थित रामजानकी मन्दिरको पुरानो इतिहास रहेको र यो मन्दिर लगायत यस क्षेत्रमा रहेका सबै मठमन्दिरहरुको संरक्षण तथा विकासको लागि वडा कार्यालयले बजेटको लागि विशेष पहल गर्ने कुरा वडा नं. १४ का वडाध्यक्षले जानकारी दिनुभयो ।

बाराकाे पचरौँता नगरपालिका ४ का वडाध्यक्ष यादव विरुद्ध भ्रष्टाचार मुद्दा दार्ता

मनाेज शाह जितपुर बारा फागुन २४ गते:

बाटो हुदै नभएको जग्गामा बाटो प्रमाणित गरेको बाराको पचरौता नगरपालिकाका एकजना वडाध्यक्षविरुद्ध भ्रष्टाचार मुद्दा दायर भएको हो ।
पचरौता नगरपालिकाको वडा नं. ४ का वडाध्यक्ष कन्हैयालाल यादव विरुद्ध भ्रष्टाचार मुद्दा दायर भएको हो ।
सडकले छोएको जग्गालाई नछोएको भनी सिफारिस दिएको आरोपमा अख्तियार दुरुपयोग अनुसन्धान आयोगले वडाध्यक्षविरुद्ध भ्रष्टाचार मुद्दा दायर गरेको हो । वडाध्यक्ष यादवले साविक बेलदारी गाविस–४ को कित्ता नम्बर १७३ को सडकले छोएको जग्गालाई नछोएको भन्दै सिफारिस दिएको अख्तियारको दाबी रहेको छ ।
वाडा अध्यक्ष यनदवले सिफारिसका कारण उक्त जग्गा खरिदकर्ता र बिक्रीकर्ताले तिर्नुपर्ने रजिस्ट्रेसन शुल्क र पुँजीकर लाभकर वापत राज्यकोषमा ८ लाख ११ हजार ९५१ रुपैयाँ घाटा भएको अख्तियारले जनाएको छ ।
अख्तियारले वडाध्यक्ष यादव, जग्गा बिक्रीकर्ता विद्या यादव, खरिदकर्ता बृजकिशोरप्रसाद यादव र अवध किशोर यादविरुद्ध पनि विशेष अदालतमा भ्रष्टाचार मुद्दा दायर गरेको अख्तियारले जनाएको छ ।

सम्पूर्ण मानवजातिको कल्याण हेतु मधानी महायज्ञ सम्पन्न

मनोज  शाह, जीतपुर बारा, फाल्गुन २४ गते

रौतहटको मौलापुरमा विशेष धुमधाम तथा भव्यताका साथ मधानी महोत्सवको आयोजना गरिएको छ । मौलापुरमा आयोजित मधानी महोत्सव अन्तर्गत आज मधानी महायज्ञको आयोजना गरिएको थियो । भगवान शिव र पार्वतीको विवाहको रुपमा मनाइने मधानी महायज्ञको यस बिशेष पुजा समारोहमा आचार्य शोभाकान्त झाले मन्त्रोच्चारण गर्नु भएको थियो भने बाबाधामको पुजारीहरुले विशेष पुजा गराउनु भएको थियो ।

मौलापुर नगरपालिकाको नगरप्रमुख रीना कुमारी साहको अध्यक्षतामा सम्पन्न मधानी महायज्ञ विशेष पूजा समारोहमा मधेश प्रदेशको सभामुख माननीय रामचन्द्र मण्डल प्रमुख अतिथिको रुपमा सहभागी हुनुभएको थियो । समारोहमा विभिन्न शिव मण्डलीहरुले विशेष कला प्रस्तुत गरेका थिए ।

मौलापुरमा आयोजित मधानी महोत्सव अन्तर्गत सम्पन्न मधानी महायज्ञ विशेष पूजा समारोहमा विभिन्न शिव मण्डलीहरुले विशेष कला प्रस्तुत गरेका थिए । समारोहमा आजपा पार्टीका केन्द्रीय अध्यक्ष एवम् पूर्व मन्त्री प्रभु साहज्यु विशिष्ट अतिथिको रुपमा सहभागी हुनुभएको थियो ।

आमा नेपाल फाउन्डेसन बिरगंज द्वारा प्रभात फेरि शान्ति र्‍यालीको आयोजना

पवन शाह    वीरगंज फागुन २४ गते:

आमा नेपाल फाउन्डेसन वीरगन्जले ११४ औ अन्तरास्ट्रिय महिला दिवसको अवसरमा वीरगन्ज महानगरपालिकामा प्रभात फेरि शान्ति र्‍यालीको आयोजना गरेको छ । संयुक्त राष्ट्र संघको “Invest in women :Accelerate progress ” भन्ने अन्तर्राष्ट्रिय नारा तथा ” महिलामा लगानी: सभ्य र समुन्नत समाजको थालनी ” भन्ने राष्ट्रिय नाराका साथ यो दिवस मनाउन आव्हान गरिएको सन्दर्भमा महिलाहरुको आर्थिक र समाजिक सशक्तीकरणका लागि महिलामा लगानीको सुनिश्चितता गर्न समाजिक सचेतना अभिवृद्धि गर्ने उदेश्यले साझा अभियानको रुपमा आमा फाउन्डेसन नेपालले समेत यस दिवसलाइ मनाएको छ । आमा नेपाल फाउन्डेसन सग सगै वीरगन्ज नर्सिङ क्याम्पस , हरि खेतान बहुमुखी क्याम्पस , सामुदायिक सेवा केन्द्र तथा सामुदायिक प्रहरी सेवा केन्द्र विर्ताले सयुक्त रुपमा मिलि सो दिवस मनाएका छन ।

वीरगन्ज महानगरपालिका स्थित विर्ता मन्दिर बाट शुरु भएको र्‍याली नगर परिक्रमा गरि पुन: विर्ता मन्दिर परिसरको सरसफाइ गरि कोणसभा गरि समापन भएको थियो ।उक्त र्‍याली भब्य र सब्य रुपमा सम्पन भएको थियो । त्यस्तै र्‍याली पश्चात् वीरगन्ज नर्सिङ क्याम्पसको परिसरमा उपस्तिथि रहेका अतिथिहरु ले वृक्षारोपण समेत गरेका थिए । प्रत्येक रुख लाई लैङ्गकि समानताको प्रगतिको प्रमाण बनाऔ भन्ने उदेश्यका साथ वृक्षरोपण गरिएको आमा नेपाल फाउन्डेसन वीरगन्जका अध्यक्ष प्रमिता मानन्धर ले बताइन् ।

र्‍यालीमा वीरगन्ज महानगरपालिकाका मेयर राजेशमान सिहंका पत्नी अन्नपूर्ण मानन्धर , वीरगन्ज महानगरपालिकाका कार्यपालिकका सदस्य राधा कार्की , वीरगन्ज नर्सिङ क्याम्पसका क्याम्पस प्रमुख डा. कल्पना पौडेल ,आमा नेपाल फाउन्डेसनका अध्यक्ष प्रमिता मानन्धर , समाजसेवी तथा युवा नेता सन्तोष कुमार श्रेष्ठ , सामुदायिक सेवा केन्द्रका अध्यक्ष मज्जिद मिया , समाज सेवि प्रतिमा सिंह , समाजसेवी रानी रोय लगायत आमाअ नेपाल फाउन्डेसन का पदाधिकारी तथा सदस्य , वीरगन्ज नर्सिङ क्याम्पसका शिक्षक तथा विद्यार्थी , हरिखेतान बहुमुखी क्याम्पसका शिक्षक तथा विद्यार्थीहरु बिर्ता प्रहरी कार्यलयका प्रहरीहरुको उपस्थिति रहेको थियो ।

११४ औ अन्तरास्ट्रिय महिला दिवस फाल्गुन २५ गते परे पनि उक्त दिन महा शिवरात्री पर्व परेकोले फाल्गुन २४ गते नै मनाइएको आयोजक ले जनाएका थिए ।