स्पर्श खबर

बकुलिया भवानीपुर गोल्डकप २०८० को ५ औं संस्करणको तयारीमा तीव्रता : चैत्र १६ देखि २३ गतेसम्म प्रतियोगिता आयोजना हुने

मनोज  शाह, जीतपुर बारा, चैत्र १० गते

जीतपुरसिमरा उपमहानगरपालिकाको वडा नं. ५ बकुलियामा जन कल्याणकारी क्लबको आयोजनामा बकुलिया भवानीपुर गोल्डकप २०८० को ५ औं संस्करण सभ्य एवम् भव्यरुपमा आयोजना गर्न लागिएको आयोजकले आज पत्रकार सम्मेलनमार्फत् जानकारी गराएको छ । आगामी चैत्र १६ गतेदेखि २३ गतेसम्म संचालन हुने प्रतियोगितामा ८ टिमको सहभागिता रहने आयोजकले जनाएको छ ।

विगतमा चार ओटा संस्करणहरु सफलतापूर्वक सम्पन्न भइसकेको यस बकुलिया भवानीपुर गोल्डकप २०८० को ५ औं संस्करणको कुल लागत २० लाख रहेको छ । यस बकुलिया भवानीपुर गोल्डकप २०८० मा प्रथम हुने टिमलाई पुरस्कारस्वरुप रु. २ लाख तथा दोस्रो हुने टिमलाई रु. १ लाख रकम पुरस्कारस्वरुप प्रदान गरिने आयोजक जन कल्याणकारी क्लबका अध्यक्ष श्रीराम चौधरीले जानकारी दिए । यस प्रतियोगिताले स्थानीयस्तरमा सीमित रहन बाध्य भएका प्रतिभाशाली फुटबल खेलाडीहरुको प्रतिभालाई पहिचान गरी उजागर गर्न तथा क्षमतावान खेलाडीहरुलाई राष्ट्रिय स्तरसम्म पहुँच बढाउन मदत गर्नेछ भन्ने आयोजक कमिटीका अध्यक्ष श्रीराम चौधरीले विश्वास व्यक्त गरे ।

जन कल्याणकारी क्लबको आयोजनामा संचालन हुन लागेको बकुलिया भवानीपुर गोल्डकप २०८० को ५ औं संस्करणमा आयोजक टिम बकुलिया भवानीपुर, वीरगंज युनाइटेड, पर्सागढी बढनिहार, निजगढ, चितवन, मकवानपुर, बर्दिवास एपीएफ तथा सर्लाही गरी विभिन्न जिल्लाका ८ टिमहरुको सहभागिता रहने छ ।

प्रतियोगिताको बारेमा प्रारम्भिक जानकारी दिन आयोजना गरिएको पत्रकार सम्मेलनमा जीतपुरसिमरा उपमहानगरपालिकाको वडा नं. ५ बकुलियाका वडा सदस्य ईश्वर चौधरी, बकुलिया भवानीपुर गोल्डकपका पूर्व अध्यक्ष केश्वर धामी, उमेश चौधरीलगायत विभिन्न संचारमाध्यममा आबद्ध पत्रकारहरुको उपस्थिति रहेको थियो ।

तेस्रो परवानीपुर गोल्डकपको उपाधी वीरगन्ज युनाईटेड क्लबलाई

मनाेज शाह जितपुर बारा चैत १० गते:

तेस्रो परवानीपुर गोल्डकप फुटबल प्रतियोगीताको उपाधी साविक विजेता वीरगन्ज युनाईटेड क्लब वीरगन्जले उचालेको छ । शक्ति युवा क्लबको आयोजनामा शनिबार भएको प्रतियोगीताको फाईनल खेलमा हेटौडा फुटबल एकेडमी मकवानपुरलाई वीरगन्ज युनाईटेड क्लब वीरगन्जले ट्राईब्रेकरमा ४ –३ गोल अन्तरले हराएर उपाधी उचालेको हो ।
परवानीपुर खेल मैदानमा भएको फाईनल खेलमा वीरगन्ज युनाईटेड क्लब वीरगन्जले हेटौडा फुटबल एकेडमी मकवानपुर माथी सुरु देखि खेलमा हाबि बन्दै अग्रता बनाएको थियो ।
खेलको पहिलो हाफको ३० औ मिनेटमा वीरगन्ज युनाईटेड क्लब वीरगन्जका खेलाडी उदीत नारायण चौधरीले पहिलो गोल गरे ।
सुरुदेखि दबादमा रहेको हैटौडा फुटबल एकेडमी मकवानपुरले खेलको मध्यान्हमा दुई खेलाडी परिवर्तन गरेको थियो । खेलाडी परिवर्तन पछि पनि खेलको अन्तय सम्म दबाबमा रहेको हैटौडा फुटबल एकेडमीले खेलको ८५ औ मिनेटमा गोल फर्काएर खेलमा फर्किेएको थियो ।
उतm गोल हैटौडा फुटबल एकेडमीका खेलाडी सखिल गुरुङ्गले गरेका थिए । खेलको निर्धारित ९० मिनेटको खेलमा दुबै टिम १–१ गोल गर्दै बराबरी खेलेपछि खेल ट्राईबे्रकरमा धकेलिएको थियो ।
ट्राईबे्रकरमा हेटौडा फुटबल एकेडमीका पाँच जना खेलाडी मध्ये दुई खेलाडी गोल गर्न नसकेपछि पराजित हुन पुगेको हो ।
यस्तै ट्राईबे्रकर मै वीरगन्ज युनाईटेड क्लबका पाँच जना खेलाडी मध्ये चार खेलाडीले गोल जालीमा हानेका थिए । आजको खेलमा म्यान अफ दि म्याच हेटौडा फुटबल एकेडमी मकवानपुरका सखिल गुरुङ्ग घोषित भए । उनलाई सागर राणाले नगद सहित शिल्ड प्रदान गरेका थिए ।
प्रतियोगितामा विजेता बनेको वीरगन्ज युनाईटेड क्लब वीरगन्जले नगद दुई लाख एक हजार सहित शिल्ड पाएको थिए । विजेता टिमलाई परवानीपुर गाँउपालिकाका अध्यक्ष रामक्षत्री प्रसाद कुर्मीले नगद सहित शिल्ड प्रदान गरेका थिए ।
यस्तै उपविजेता हेटौंडा फुटबल एकेडेमी मकवानपुरले एक लाख एक हजार सहित शिल्ड पाएको थियो । उपविजेतालाई वडाअध्यक्ष राधाकृष्णा साह रौनीयार र समाजसेवी नागमणी उपाध्यायले नगद सहित शिल्ड प्रदान गरेका थिए ।

विद्यागत पुरस्कार तर्फ विजेता टिम नै हावि

तेस्रो परवानीपुर गोल्डकप फुटबल प्रतियोगीताको विद्यागत पुरस्कारमा पनि वीरगन्ज युनाईटेड क्लब वीरगन्ज नै हावि भएको छ ।
प्रतियोगीताको म्यान आफ दि सिरिज (उत्कृष्ट खेलाडी )वीरगन्ज युनाईटेड क्लबका अमर डंगोल बने । उनलाई राप्रपाका नेता रामेश्वर महतोले नगद सहित ईलेक्ट्रिक स्कुटी प्रदान गरेका थिए ।
यस्तै उत्कृष्ट गोल किपर पनि वीरगन्ज युनाईटेड क्लबका दिलमणी चौधरी घोषित भए । उनले नगद पाँच हजार पाएका हुन ।
प्रतियोगीताको बेष्ट डिफेन्डर वीरगन्ज युनाईटेड क्लबका संजय चौधरी घोषित भएका थिए । चौधरीले नगद पाँच हजार पाएका थिए । यस्तै बेष्ट मिडफिल्डर वीरगन्ज युनाईटेड क्लबका खेलाडी विपिन दुम्सी मगर बने । उनले नगद पाँच हजार पाएका हुन ।
यस्तै प्रतियोगीताको हाई स्कोरर वीरगन्ज युनाईटेड क्लबका खेलाडी उदीत नारायण चौधरी बने । उनलाई युनीटी क्लबका अध्यक्ष हेमन्त चौरसीयाले नगद पाँच हजार प्रदान गरेका हुन ।

प्रतियोगीता भरीमा उत्कृष्ट प्रशिक्षकको उपाधी वीरगन्ज युनाईटेड क्लब रामकिशोर धामीले पाए । उनले नगद पाँच हजार पाएका थिए । तेस्रो परवानीपुर गोल्डकप फुटबल प्रतियोगीताका संयोजक सुबोध श्रीवास्तवको अध्यक्ष्तामा खेल समापन भएको थियो ।

जीतपुरसिमरा क्रिकेट कपको उपाधि मकवानपुरलाई, पर्सा ७ विकेटले पराजित

मनाेज शाह जितपुर बारा चैत १० गते:
प्रथम जीतपुरसिमरा क्रिकेट कपको उपाधि मकवानपुर क्रिकेट संघले जितेको छ । जीतपुरसिमरा ४ स्थित सेज क्रिकेट मैदानमा शनिबार सम्पन्न फाइनल खेलमा पर्सा क्रिकेट संघलाई ७ विकेटले पराजित गर्दै मकवानपुरले उपाधि उचालेको हो ।

टस जितेर ब्याटिङ रोजेको पर्सालाई कम स्कोरमा रोक्दै उपाधि उचाल्ने क्रममा मकवानपुरले सानदार प्रदर्शन गरेको थियो । समूह ‘ए’ विजेता बन्दै फाइनलमा प्रवेश गरेको पर्साले पहिले ब्याटिङ गर्दै निर्धारित २० ओभरमा सम्पूर्ण विकेट गुमाउँदै ९० रन जोडेको थियो ।

पर्साका लागि सुरज पटेलले ४५ र हासिम अंसारीले १० रन बनाउँदा अन्य व्याटरले दोहोरो संख्यामा रन बनाउन सकेनन् । पर्सालाई सस्तैमा रोक्ने क्रममा मकवानपुरका अशिम श्रेष्ठले तीन, पियुश शर्माले दुई, बिशाल फुयाल र रोहित ठाकुरले समान एक–एक विकेट लिए ।

पर्साले दिएको ९१ रनको लक्ष्य लिएर मैदानमा उत्रिएको मकवानपुरका लागि तक्षक सिम्ख्डाले ३०, बिशाल फुयालले १५ र सक्षम बस्ताकोटीले अविजित १४ रन बनाए । पर्साका लागि सम्साद मन्सुरीले तीन विकेट लिए ।

उपाधि विजेता मकवानपुरले एक लाख प्राप्त गरेको छ भने उपविजेता पर्साले ५० हजार नगद पाएको छ । यसैगरी मकवानपुरका शुभ कंसाकार प्लेयर अफ दि टुर्नामेन्ट र बेस्टर ब्याटर घोषित भएका छन् भने खुकुरी क्रिकेट क्लब भैरहवाका सन्तोष यादव बेस्ट बलर घोषित भए । फाइनल खेलको प्लेयर अफ दि म्याचको पुरस्कार मकवानपुरका विशाल फुयालले प्राप्त गरेका छन् ।

विजेता तथा उपविजेता खेलाडीलाई पूर्व युवा तथा खेलकुद मन्त्री एवम् संविधान सभाका सदस्य पुरुषोत्तम पौडेल, संविधान सभाका सदस्य जयराम दहाल, मधेस प्रदेशसभा सदस्य देवनारायण चौधरी, नेकपा एमाले मधेस प्रदेश सचिव मनोज पौडेललगायतले पुरस्कार वितरण गरेका थिए ।

समापन समारोहमा आयोजकले सिमरा महिला क्रिकेट क्लबका पूर्व प्रशिक्षक विष्णु लामिछानेसहित महिला क्रिकेटर, सिमरा क्रिकेट क्लबका पूर्व कप्तान नाजिर हुसेनलाई सम्मानित गरिएको थियो ।

प्रतियोगिता संयोजक सोमलाल बम्जनको अध्यक्षतामा सम्पन्न पुरस्कार वितरण समारोहमा जीतपुरसिमरा २ का वडाध्यक्ष धनबहादुर श्रेष्ठ, वडा नं. १४ की वडाध्यक्ष चयन गुरुङ, ५ का वडाध्यक्ष दीपेन्द्र चौधरी, १३ का वडाध्यक्ष हेमनारायण चौधरी, कार्यपालिका सदस्य अर्जुन रसाईली, जीतपुरसिमरा ३ की कार्यबाहक वडाध्यक्ष माया विक, मधेस प्रदेश क्रिकेट संघका कोषाध्यक्ष सुवास जयसवाल, एमाले नेता किशोर शर्मा, अमृतलाल श्रेष्ठ, रवीन्द्र खकुरेल, बरुण गौतम, आयोजक अभियान नेपालका संरक्षक त्रिलोक बिक्रम शाह, अध्यक्ष लक्ष्मी तिमिल्सिनालगायतको सहभागिता रहेको थियो ।

अभियान नेपालको आयोजना र जीतपुरसिमरा उपमहानगरपालिकाको सहयोगमा आयोजित प्रतियोगितामा ६ टिमले सहभागिता जनाएका थिए ।

जीतपुरसिमरा क्रिकेट कपको उपाधिका लागि मकवानपुर र पर्सा भिड्ने

मनाेज शाह जितपुर बारा चैत ९ गते:
जीतपुरसिमरा क्रिकेट कप प्रतियोगिताको उपाधिका लागि मकवानपुर क्रिकेट संघ र पर्सा क्रिकेट संघ भिड्ने भएका छन् । समूह ‘बी’ को अन्तिम खेलमा शुक्रवार भैरहवालाई पराजित गर्दै मकवानपुर फाइनलमा प्रवेश गरेको हो ।

मकवानपुरले अब उपाधिका लागि शनिबार पर्सासंग खेल्नेछ । पर्सा समूह ‘ए’ को विजेताको रुपमा फाइनल प्रवेश गरिसकेको छ । पर्साले आयोजक जीतपुरसिमरा स्पोर्टस् क्लब ७७ रन र कलैया क्रिकेट क्लबलाई पाँच विकेटले पराजित गरेको थियो ।

यता समूह चरणको पहिलो खेलमा जनकपुरमाथि ३१ रनको जीत निकालेको मकवानपुरले दोस्रो जीत दर्ता गर्ने क्रममा खुकुरी क्रिकेट क्लब भैरहवालाई १५ रनले पराजित गरेको हो । टस हारेर व्याटिङको निम्तो पाएको मकवानपुरले निर्धारित २० ओभरमा ८ विकेट गुमाउँदै १४८ रन जोडेको थियो ।

मकवानपुरका लागि तक्षक सिम्ख्डाले ५४ रन बनाए । उनले २४ बलमा ६ छक्का र एक चौका प्रहार गरे । यसैगरी मकवानपुरका गौरव खड्काले २७, युविन बुढाथोकीले २१, बिशाल फुयालले १९ र सक्षम वस्ताकोटीले ११ रन बनाए । भैरहवाका रोशनलाल गुप्ताले चार ओभर बलिङ गर्दै ३१ रन खर्चिएर तीन विकेट लिए भने अजयकुमार चौहानले दुई र सन्तोष यादवले एक विकेट हात पारे ।

रनरेटका आधारमा फाइनलमा पुग्न मकवानपुरले दिएको १४९ रनको लक्ष्य १४.५ ओभरमै भेट्टाउनुपर्ने बाध्यताका साथ मैदानमा उत्रिएको भैरहवाले १९.३ ओभरमा सम्पूर्ण विकेट गुमाउँदै १३३ मात्र रन जोड्न सफल भयो । भैरहवाका रोशनलाल गुप्ताले २८, प्रज्वल थापाले २१, प्रकाश गिरी र अजय चौहानले समान १९ रन बनाए । मकवानपुरका सुवर्ण भट्टले तीन, पियुश शर्मा र बिशाल फुयालले समान २–२, समिर चौलागाई र अशिम श्रेष्ठले १–१ विकेट हात पारे ।

भैरहवाले १४.५ ओरभमा लक्ष्य प्राप्त गरेको भए रनरेटका आधारमा समूह विजेता बन्दै फाइनलमा प्रवेश गर्ने थियो भने १६ ओभरमा मकवानपुरलाई पराजित गरेको जनकपुर पेस फाउण्डेशन अन्तिम दुईमा प्रवेश गर्ने थियो । समूह ‘बी’ को यसअघिका खेलमा मकवानपुरले जनकपुरलाई ३१ रन र जनकपुरले भैरहवालाई ४८ रनले पराजित गर्दै समान २–२ अंक बटुलेका थिए । समूह ‘बी’ को अन्तिम खेलबाट फाइनल पुग्ने टोलीको टुंगो लागेको हो ।

खेलको प्लेयर अफ दि म्याच मकवानपुरका तक्षक सिम्ख्डा घोषित भए । उनलाई जीतपुरसिमरा उपमहानगरपालिकाका नगर उपप्रमुख भोलाप्रसाद अधिकारीले पुरस्कृत गरेका थिए ।
अभियान नेपालको आयोजना र जीतपुरसिमरा उपमहानगरपालिकाको सहयोगमा आयोजित प्रतियोगिताको उपाधि भिडन्त शनिबार हुनेछ । प्रतियोगिताको विजेताले एक लाख र उपविजेताले ५० हजार नगद प्राप्त गर्नेछन् ।

तेस्रो परवानीपुर गोल्डकप : महिला मैत्रीपुर्ण फुटबल प्रतियोगितामा वीरगन्ज युथ एकेडेमी विजयी

मनाेज शाह जितपुर बारा चैत ९ गते:

तेसो परवानीपुर गोल्डकप फुटबल प्रतियोगिता अन्तर्गत शुक्रबार भएको महिला टोलि बीच मैत्रीपुर्ण खेलमा वीरगन्ज युथ एकेडेमी विजयी भएको छ ।

शक्ति युवा क्लबको आयोजनामा जारी प्रतियोगितामा महिला मैत्रीपुर्ण खेलमा निजगढ फुटबल क्लबलाई वीरगन्ज युथ एकेडेमीले ४-० गोल अन्तरले हराएको हो ।

परवानीपुर खेल मैदानमा जारी प्रतियोगितामा आजको पहिलो हाफको तेस्रो मिनेटमा वीरगन्ज युथ एकेडेमीकि खेलाडी सजिता स्याङतानले पहिलो गोल गरिन ।

खेलमा एक गोलले अग्रता बनाएको वीरगन्ज युथ एकेडेमीले खेलको २५ औं मिनेटमा दोस्रो गोल गर्यो ।
दोस्रो गोल पनि वीरगन्ज युथ एकेडेमीका सजिता स्याङतान नै गोल गरिन ।

सुरु देखि नै कमजोर रूपमा देखापरेको निजगढ फुटबल क्लबका खेलाडी माथि हाबी देखिएका वीरगन्ज युथ एकेडेमीका खेलाडी खेलको ४३ औं मिनेटमा थप एक गोल गरे ।

तेस्रो गोल वीरगन्ज युथ एकेडेमी कि सदिपा भोलेनले गरिन । लगातार गोल हानेका वीरगन्ज युथ एकेडेमीका खेलाडीले खेल्न सक्नु ५ मिनेट अगावै चौथो गोल गरेका थिए ।

चौथो गोल पनि वीरगन्ज युथ एकेडेमी कि सदिपा भोलेनले नै गरेकी हुन् ।

आजको खेलको म्यान अफ दि म्याच वीरगन्ज युथ  एकेडेमीका खेलाडी  सजिता स्याङतान घोषित भईन ।

उनलाई स्थानीय समाजसेवी हृदयनारायण यादवले नगदसहित शिल्ड हस्तान्तरण गरे ।

यसैबीच आजको मैत्रीपुर्ण खेलको दोस्रो स्थान हासिल गरेका निजगढ फुटबल क्लबलाई कार्यक्रमका प्रमुख अतिथि नेपाली काङ्ग्रेसका युवा नेता लोकेश सिंहले शिल्ड प्रदान गरे ।

तेस्रो परवानीपुर गोल्डकप फुटबल प्रतियोगिता अन्तर्गत शनिबार हुने फाइनल प्रतियोगितामा हेटौंडा फुटबल एकेडेमी मकवानपुर र वीरगन्ज युनाइटेड क्लब वीरगन्ज बीच हुनेछ ।

प्रतियोगितामा प्रथम हुने क्लबले नगद दुई लाख एक हजार र दोस्रो हुने क्लबले एक लाख एक हजार सहित प्रमाणपत्र र शिल्ड पाउने प्रेस संयोजक तिवारी यादवले बताए । प्रतियोगिता भरी उत्कृष्ट खेलाडीहरुको लागी विभिन्न विद्यामा विद्यागत पुरस्कार पनि राखिएको उनले बताए ।