मधेस प्रदेशमा “सीमावासीसँग सशस्त्र प्रहरी” कार्यक्रम संचालन : अन्तर्राष्ट्रिय सीमा सुरक्षा थप प्रभावकारी हुने र सीमावासीका समस्याको सम्बोधन हुने विश्वास
मनोज शाह, जीतपुर बारा, चैत्र १२ गते
मधेस प्रदेशस्थित रहेको नं. २ छिन्नमस्ता वाहिनी अन्तर्गतको सशस्त्र प्रहरी बल, नेपाल नं. १३ गण पर्सा, अन्य सुरक्षा निकाय, स्थानीय नागरिकको संयुक्त टोलीले पर्साको ठोरी -१ भगवाननगरबाट सीमा पैदल गस्ती सुरु गरेको छ । सशस्त्र प्रहरी बलले सीमा क्षेत्रका बासिन्दाहरुको समस्या एवम् गुनासाहरुको सम्बोधन गर्न तथा अन्तर्राष्ट्रिय सीमा सुरक्षामा थप प्रभावकारिता ल्याउन अन्य सुरक्षा निकायलगायत स्थानीय नागरिक तथा सरोकारवाला निकायहरुसंग आवश्यक समन्वय र सहकार्य गर्दै “सीमावासीसँग सशस्त्र प्रहरी” कार्यक्रम अन्तर्गत लक्षित क्षेत्रहरूमा नियमित रुपमा हप्ताको सातै दिन २४ सै घन्टा पैदल गस्ती सुरु गरेको छ ।
सीमा सुरक्षाको संवेदनशीलतालाई मध्यनजर गर्दै सशस्त्र प्रहरी बलको भूमिकालाई अझै परिष्कृत, प्रभावकारी एवम् नतिजामुखी बनाउन र अन्तर्राष्ट्रिय सिमाना क्षेत्रका नागरिकहरुमा शान्ति सुरक्षाको प्रत्याभूति दिलाउन यस “सीमावासीसँग सशस्त्र प्रहरी” कार्यक्रमले टेवा पुर्याउने विश्वास लिइएको छ । पर्साका गणपति सशस्त्र प्रहरी उपरीक्षक किशन कर्माचार्यको अगुवाइमा सुरु भएको उक्त सीमा गस्तीमा मधेस प्रदेशका ८ ओटै जिल्लासंँग अन्तर्राष्ट्रिय सीमा जोडिएको क्षेत्रमा निरन्तररुपमा संयुक्त सीमा पैदल गस्ती गर्नेछ ।
पर्साको ठोरी -१ भगवाननगरबाट सुरु भएको पैदल गस्तीमा भारतीय समकक्षी SSB 44 BN का प्रतिनिधि, ठोरीस्थित सीमा सहजीकरण समितिका पदाधिकारी तथा स्थानीय संचारकर्मीहरुको समेत सहभागिता रहेको थियो । गस्तीको क्रममा सशस्त्र प्रहरी उपरीक्षक किशन कर्माचार्यले स्थानीय बुद्धिजीवी तथा नागरिकहरुसँग समेत अन्तरक्रिया गर्दै सीमा सुरक्षाको महत्त्वको बारेमा नागरिकहरुमा प्रकाश पार्नुका साथै सीमा अपराध नियन्त्रणको सन्दर्भमा समेत स्पष्ट पारेका थिए । सीमाका बासिन्दाहरु नै वास्तविकरुपमा सीमा रक्षक भएकोले मधेस प्रदेशका सीमावर्ती क्षेत्रका बासिन्दाहरुको गुनासो सम्बोधन गर्न आफूहरु सधैं तत्पर एवम् सकारात्मक रहेको कुरा कर्माचार्यले बताउनुभयो । सशस्त्र प्रहरी बलले सीमा क्षेत्रका जनताहरुसंँग सहकार्य गर्दै सीमा क्षेत्रमा हुन सक्ने सम्भावित अवैध गतिविधि नियन्त्रण गर्न तथा सीमा क्षेत्रको सुरक्षालाई थप सुदृढ बनाउन दिनरात तयार रहने जनाएको छ ।
