बारामा ट्राफिक प्रहरी सक्रिय हुँदै : ट्राफिक नियमको पालना नगर्नेलाई धमाधम कारवाही गरिंदै
मनोज शाह, जीतपुर बारा, चैत्र १५ गते
बारामा ट्राफिक प्रहरीले चेकजाँचमा कडाइ गरेको छ । चाडबाडको बेलामा मानिसहरुले ट्राफिक नियमको अवहेलना गरी दुर्घटना निम्त्याउने गरेकोले बारा जिल्लाभरि नै ट्राफिक प्रहरीले कडाइ गरेको हो । बारा जिल्लाको सिम्रौनगढ नगरपालिकामा ट्राफिक प्रहरीले ट्राफिक नियमबारे जनचेतनामूलक कार्यक्रम गरी दिनहुँजसो त्यहाँका सर्वसाधारणहरुलाई चेतनशील बनाउँदै छन् ।
खासमा सिम्रौनगढ नगरपालिकालगायत वरिपरिका मानिसहरुले हेलमेट नलगाउने, उच्च गतिमा मोटरसाइकल चलाउने, एउटै मोटरसाइकलमा दुईजनाभन्दा बढी मानिसहरु चढ्ने, ट्राफिक नियमको पालना नगर्ने जस्ता समस्याहरु देखापरेकोले गर्दा अन्य समयमा भन्दा हिजोआज ट्राफिक प्रहरीद्वारा पूर्ण निगरानीका साथ कडाइ गरिएको ट्राफिक प्रहरी अस्थायी पाेष्ट सिम्रौनगढका प्रमुख रामप्रित चाैधरीले स्पर्श खबरलाई जानकारी दिनुभयो । नियमविपरीत सवारी साधन चलाइएको भेटिँदा आवश्यक नसिहतसहित जरिवाना तिर्न लगाउँदा सवारी चालकले उल्टै ट्राफिक प्रहरीलाई नै धम्की दिने गरेको त्यहाँका ट्राफिक प्रहरीहरुले बताउँछन् ।
जबसम्म यहाँका जनताहरुले आफैंले आफैंलाई सुधारतर्फ उन्मुख गर्दैनन् , तबसम्म केही पनि सकारात्मक परिवर्तन नहुने सिम्रौनगढ नगरपालिकाका एक स्थानीय युवा श्याम कुश्वाहाले स्पर्श खबरलाई जानकारी दिएका छन् । ट्राफिक प्रहरीको यो कदमले मानिसहरुको व्यवहारमा सकारात्मक परिवर्तन देखा परिरहेको स्थानीय युवा श्याम कुश्वाहाले स्पर्श खबरलाई बताए ।
