बाराको फत्तेपुरमा सार्वजनिक जग्गामा बनेको टहरामा चल्यो उपमहानगरको डोजर : जनताले सूचनाको अवहेलना गर्दा डोजर चलाउन बाध्य भएको उपमहानगरको दाबी
मनाेज शाह जितपुर बारा चैत १८ गते:
जीतपुरसिमरा उपमहानगरले पटक पटक सुचना निकालेर सार्वजनिक जग्गामा बनाएको टहरा हटाउन भने पनि स्थानीयहरुले अटेर गर्दै आएको कारण आइतबार उपमहानगरले तोकेको म्याद सकेपछि डोजर लगाएर तत्काल जीर्ण अवस्थामा रहेको टहरा हटाउन सुरु गरिएको जीतपुरसिमरा उपमहानगरपालिका-१२ का वडाध्यक्ष श्यामबाबु खाँले जानकारी दिए ।
बारा जिल्लाको जीतपुरसिमरा उपमहानगरपालिका-१२ फत्तेपुरमा सार्वजनिक जग्गामा बनाईएको टहरामा उपमहानगरले डोजर चलाउन सुरु गरेको छ । कृषि बजार (हाटबजार) लाई व्यवस्थित गर्ने र वडा कार्यालय भवन निर्माण गर्नुपर्ने भएकोले सार्वजनिक जग्गामा बनाइएको टहरा हटाउन उपमहानगरले आइतबारदेखि सुरु गरेको छ । स्थानीयहरुले फत्तेपुर बजारमा बनाएको टहरा हटाउन सहमति गरेको थियो तर उपमहानगरले तोकेको समयसीमा नाघ्दा पनि टहरा नहटाएपछि उपमहानगरले आइतबारदेखि डोजर लगाएर टहरा हटाउन सुरु गरेको छ ।
साबिक फत्तेपुर गाविस वडा नं ३ हाल जीतपुर सिमरा वडा नं १२ अन्तर्गत पर्ने कित्ता नं १७ को १८ कट्टा सार्वजनिक जग्गा २०२२ सालको नापीमा फिल्डबुकमा हाटबजार भनी उल्लेख छ । सो १८ कट्टा सार्वजनिक जग्गा मध्ये ६ कट्टा बजारमा प्रयोग भएको र बाँकी रहेको १२ कट्टा जग्गा व्यक्तिले घर टहरा बनाएर लामो समयदेखि भोग चलन गर्दै आइरहेका थिए । सो क्षेत्रलाई स्थानीय कृषि बजार सञ्चालन गर्न गत आर्थिक वर्षमा उपमहानगरले ३५ लाख बजेट विनियोजन गरेको थियो तर सार्वजनिक जग्गा खाली गर्न नसकेपछि बजेट फिर्ता भयो ।
उपमहानगरले चालु आर्थिक वर्षको लागि पनि कृषि हाटबजार र वडा कार्यालयको भवन निर्माण गर्न ९० लाख बजेट विनियोजन गरेको छ । जीतपुरसिमरा उपमहानगरपालिका-१२ का वडाध्यक्ष श्यामबाबु खाँका अनुसार पटक पटक सूचना जारी गरेर बनाइएको टहरा हटाउन अनुरोध गर्दै आएपनि कसैले टहरा हटाउन नमानेपछि उपमहानगरले डोजर लगाएर हटाउन लागिएको हो सार्वजनिक जग्गामा घरायसी र व्यावसायिक प्रयोजनका सटरहरु गरी करिब ६० घरधुरी छ भने निजी बोडिङ स्कुल पनि सञ्चालनमा छ । निजी बोर्डिङ्ग स्कूलले आफैले खाली गरेको छ भने अहिले पनि केही व्यक्तिले जग्गा खाली गर्न नमानेपछि चैत २५ गतेसम्म सबैले आ-आफ्नो सामान हटाउनको लागि उपमहानगरले अनुरोध गरेको छ ।
आफ्नो गाउँठाउँको विकासमा योगदान गर्नु सबै गाउँलेको दायित्व भएकोले फत्तेपुरमा वैज्ञानिक बजारको निर्माणको लागि सो जग्गामा रहेको घरटहरा हटाएर मदत गर्नुपर्ने स्थानीयहरुको भनाइ रहेको छ । विकास निर्माणको कार्यमा कोही कसैले बाधा उत्पन्न गरे उपमहानगर चुप लागेर नबस्ने र आज जीर्ण अवस्थामा रहेको टहरामाथि मात्रै डोजर चलाइएको भए पनि चैत २५ गतेसम्म सो जग्गा खाली नगरे उपमहानगरले सिधै सार्वजनिक जग्गामा बनाएको टहरामाथि डोजर चलाउने जीतपुरसिमरा उपमहानगरका उपप्रमुख भोला प्रसाद अधिकारीले जानकारी दिए । टहरा हटाउने विषयमा स्थानीयहरुबीच नै एकमत नरहेको एक स्थानीयले जानकारी दिए ।
