मनाेज शाह जितपुर बारा माघ ११ गते:
जीतपुरसिमरा उपमहानगरपालिका वडा नम्बर १५ मा ५औ डुमरवाना क्रिकेट च्याम्पियनसिप हुने भएको छ । प्रगतिशिल युवा क्लबको आयोजनामा माघ २६ गतेदेखि प्रतियोगिता आयोजना हुन लागेको हो ।
प्रतियोगिताबारे जानकारी दिन आयोजक क्लबले आज प्रगतिशिल खेल मैदान पत्रकार सम्मेलनको आयोजना गरेको थियो । फागुन ३ गतेसम्म सञ्चालन हुने प्रतियोगितामा ६ टिमको सहभागिता रहने आयोजक क्लबका सचिव बासु नेपालले जानकारी दिनुभयो । प्रतियोगितामा गौर क्रिकेट क्लब, ईस्टन क्रिकेट एकेडेमी, मकवानपुर क्रिकेट एसोसियसन, पर्सा क्रिकेट एसोसियसन, कलैया क्रिकेट क्लब र आयोजक प्रगतिशिल युवा क्लबको सहभागिता रहनेछ ।
प्रतियोगिताको बिजेताले १ लाख र उप बिजेताले ५० हजार रुपैया पाउने सचिव नेपालले बताउनुभयो । लिग फर्मेटमा सञ्चालन गरिने प्रतियोगितामा प्रत्यक टिमले २ खेल खेल्नेछन् । प्रतिशिल खेल मैदानमा हुने प्रतियोगिता करिव १० लाखको लागतमा आयोजना हुन लागेको हो । प्रतियोगितामा प्रत्यक दिन म्यान अफ द म्याच, म्यान अफ द सिरिज, बेस्ट बलर र बेस्ट ब्याटरतर्फ बिधागत पुरस्कारको व्यवस्था गरिएको छ । प्रतियोगितालाई सफल बनाउन बारा जिल्ला क्रिकेट संघ र मधेश प्रदेश क्रिकेट संघले प्राविधिक सहयोग गरेको छ ।
पत्रकार सम्मेलनमा जीतपुसिमरा १५ का वडा अध्यक्ष रामप्रसाद लामिछानेले प्रतियोगिता आयोजना गर्न वडा स्तरबाट पनि सहयोग हुने प्रतिवद्धता जनाउनुभयो । खेल क्षेत्रमार्फत समाज रुपान्तरण गर्न सकिने भन्दै उहाले समग्र क्षेत्रको विकासमा सबै एक भएर लाग्नुपर्नेमा जोड दिनुभयो । कार्यक्रममा पुर्व वडा सदस्य राजन भट्राई, नेकपा एमालेका नेता राजकुमार अर्याल, माओवादीका नेता नेता हरिकृष्ण के.सी, क्रिकेटप्रेमी पंकज शर्मा लगायतको उपस्थिति रहेको थियो ।
कार्यक्रममा क्लबका पुर्व अध्यक्ष कृष्ण नेपालले स्वागत मन्तब्य राख्नुभएको थियो । क्लबका अध्यक्ष प्रदिप पोखरेलको अध्यक्षतामा सम्पन्न कार्यक्रमको सञ्चालन सचिव बासु नेपालले गर्नुभएको थियो ।
