डुमरवानाको साना किसानमा चोरी
स्पर्श खबर जितपुर बारा पुस १२ गते:
बाराको जीतपुरसिमरा उपमहानगरपालिका १५ डुमरवानास्थित साना किसान कृषि सहकारी संस्था लिमिटेडको कार्यालयमा विहिबार राती चोरी भएको छ ।
अज्ञात समूहले कार्यालयका १० वटा ढोका फोडेर चोरी गरेका छन् । काउण्टरमा रहेको भल्ट समेत फुटाएका चोर समुहले कार्यालयको सिसिटीभीको मुख्य ब्याकअप बक्सनै उठाएर लगेको पाईएको छ ।
शुक्रबार विहान कार्यालय खोल्न गएका कार्यालय सहयोगीले चाबी फुटाएको देखेपछि सञ्चालक समितिलाई खबर गरेका थिए । शुक्रबार विहान घटनास्थल पुगेका सञ्चालक समितिका अध्यक्ष प्रदिप सिंह बरालले संस्थाको काउण्टरमा रहेको १२ हजार र रेमिट्यान्स शाखामा रहेको ४० हजार गरी बाउन्न हजार रुपैयाँ नगद चोरी भएको जानकारी दिए ।
संस्थाको मुख्य प्रवेशद्वारमा रहेको फलामका दुई ठुला गेटमा लगाएको ताला तोडेर शुरुमा क्यास काउण्टरमा प्रवेश गरेको चोर समुह पछि सिसिटीभी रहेको माथिल्लो तलाको कोठाबाट झ्याल फोडेर बाहिरीएको देखिएको छ ।
चोर समूहले कार्यालयमा रहेका कम्प्युटर, टिभी, क्यामेरा लगायतका सामान तथा कागजपत्रहरुमा कुनै नोक्सानी गरेका छैनन् । नगद र सिसिटीभी क्यामेराको ब्याकअप बक्स लैजाने क्रममा उनिहरुले गरेको तोडफोड लगायतको प्रारम्भिक क्षती दश लाख जति रहेको संस्थाका अध्यक्ष प्रदिप बरालले जानकारी दिए ।
