खानेपानीको विकासका लागि थप टेवा पुर्याउन सिमराबासी जागरुक : सिमरा खानेपानीको लागि थप बजेटको माग गर्दै मन्त्रीसमक्ष ज्ञापन पत्र पेस
मनोज शाह, जीतपुर बारा, चैत्र ७ गते
जीतपुरसिमरा उपमहानगरपालिकाको सिमराका जनताहरुले भविष्यमा शुद्ध खानेपानीको समस्या आउन नदिन अहिलेदेखि जागरुकता देखाएका छन् । सिमरा क्षेत्रमा शुद्ध खानेपानीको थप विकासका लागि यहाँका स्थानीय,बुद्धिजीवीहरु लगायतकाले मिलेर मन्त्रीसमक्ष पहल गर्न गएका छन् ।
केही दिन अघि मात्रै केन्द्रमा नयाँ मन्त्रीमण्डल गठन भएपछि सिमराबासीहरुको आशा पूरा हुने विश्वास लिएर यहाँका स्थानीय, बुद्धिजीवी मिलेर खानेपानी मन्त्रीलाई प्रत्यक्ष भेट्न पुगेका छन् । सिमरा खानेपानीको अध्यक्ष कासिम अंसारीको नेतृत्वमा ३ सदस्यीय टोली सिमरास्थित खानेपानीको विकासको लागि सरकारले थप बजेट छुट्याउनुपर्ने माग राख्दै खानेपानी मन्त्री राजेन्द्र राईसमक्ष ज्ञापन पत्र पेस गरेका छन् । सिमराबासीको दैनिक जीवन तथा यस क्षेत्रमा खानेपानीको समस्या कहिल्यै आउन नदिनका लागि केन्द्रबाट उचित थप बजेटसमेत छुट्याइने कुराको आश्वासन खानेपानी मन्त्रीले व्यक्त गर्नुभयो ।