जितपुरको एक मात्र खेलमैदान सम्भारकाे पर्खाइमा
मनाेज शाह जितपुर बारा फागुन ५ गते:
जितपुरसिमरा उपमहानगरपालिका वडा ७ जितपुरको शान्ति टाेलमा रहेको खेलमैदान यस क्षेत्रकै एकमात्र खेलमैदान हो तर दुर्भाग्यवश वर्षौंदेखि यो खेलमैदान सम्भारकाे पर्खाइमा रहेको छ ।
यस खेलमैदानमा क्रिकेट , भलिबल, फुटबललगायतका खेलहरु खेल्न विभिन्न उमेर समूहका खेलाडीहरु आउने गर्छन् । बारा जिल्लाको सदरमुकामकाे रुपमा तथा आर्थिक नगरीको रुपमा प्रख्यात रहेको जितपुरसिमरा उपमनपाको जितपुरमा एउटा पनि राम्रो खेलमैदान नरहेकोले शान्ति टोल खेलमैदान मात्रै एक विकल्प रहेको स्थानीय खेलाडी बिनाेद पासवानले स्पर्श खबरलाई बताए ।
लगभग साढे दुई कट्ठामा फैलिएको शान्ति टोलस्थित खेलमैदानमा समयसमयमा विभिन्न राजनैतिक, साँस्कृतिक, धार्मिक कार्यक्रमहरुको आयोजना भइरहन्छन् तर यसको संरक्षण तथा सम्भारको लागि कुनै पक्षले चासो दिएको छैन भन्दै स्थानीय युवा श्रीराम साहले दुखेसो पोखे । विभिन्न पक्षले आआफ्नो स्वार्थसिद्धिका लागि यसै खेल मैदानको प्रयोग गरे पनि स्वार्थ पूरा भएपश्चात यसको सरसफाइ गर्ने, खाल्डाखुल्डी पुर्ने तथा मर्मत सम्भार गर्नेतर्फ कसैको ध्यान नपुगेको गुनासो स्थानीयहरुको छ ।
विभिन्न कार्यक्रमको बेलामा बनाइएका खाल्डाखुल्डी समयमै नपुर्दा यहाँ खेल्न आउने खेलाडीहरुले चोट लाग्ने, खुट्टा मर्किने समस्याहरु भोग्दै आएका छन् । खेलमैदानको अवस्था राम्रो नभएको कारणले कयौं खेलाडीहरु घाइते भएको समेत स्थानीय खेलाडी बिनाेद पासवानले स्पर्श खबरलाई बताए । खेलमैदानको मर्मतसम्भार गर्नुपर्ने तथा यसको व्यवस्थापनमा ध्यान दिनुपर्ने विषयमा अहिलेसम्म पनि यहाँको मेयर तथा वडा अध्यक्षले कुनै चासो वा सरोकार नराखेको खेलाडीहरुले स्पर्श खबरलाई बताए ।
