न्यायिक समितिमा ९८ वटा मुद्दा दर्ता तथा ५७ वटा मात्रै फर्छ्यौट
मनाेज शाह जितपुर बारा माघ २६ गते :
जितपुरसिमरा उपमहानगरपालिकाको न्यायिक समितिले आ. व. २०७९ / ८० मा जम्मा ४३ ओटा मुद्दा दर्ता गरेकाे थियो। दर्ता भएका मुद्दाहरुमध्ये हालसम्म जम्मा ३५ ओटा मुद्दा मात्रै फर्छ्यौट भएको छ भने ८ ओटा मुद्दा टुङ्गो लगाउन अझै बाँकी रहेको जितपुरसिमरा उपमहानगरपालिकाको उपप्रमुख भाेला अधिकारीले जानकारी दिएका छन् । आ. व. २०७९ / ८० मा दर्ता भएका मुद्दाहरुमध्ये घरेलु हिंसासम्बन्धी ३ ओटा, लेनदेनसम्बन्धी २० ओटा, जग्गा किचलोसम्बन्धी १५ ओटा मुद्दा, निर्माण कार्य राेक्कासम्बन्धी २ ओटा, सार्वजनिक जग्गा सम्बन्धी ३ ओटा मुद्दा रहेको उपप्रमुख अधिकारीले बताए । त्यसैगरी आ. व. २०८०/८१ मा हालसम्म जम्मा ५५ ओटा मुद्दाहरु दर्ता भएका छन् । साे मुद्दाहरुमध्ये जम्मा २२ ओटा मुद्दा मात्रै फर्छ्यौट भएका छन् भने ३३ ओटा मुद्दा टुङ्गो लगाउन अझै बाँकी रहेको छ । आ. व. २०८०/८१ मा दर्ता भएका मुद्दाहरुमध्ये घरेलुु हिंसासम्बन्धी ३ ओटा, लेनदेन सम्बन्धी २० ओटा, जग्गा किचलोसम्बन्धी २१ ओटा मुद्दा, निर्माण कार्य राेक्कासम्बन्धी १ ओटा, सार्वजनिक जग्गा सम्बन्धी १० ओटा मुद्दाहरु रहेको उपप्रमुख भोला अधिकारीले जानकारी दिनुभयो ।
