पर्सामा नक्कली नोट सहित दुई जना प्रहरीको नियन्त्रणमा
मनाेज शाह, जितपुर बारा, वैशाख १८ गते:
पर्सा जिल्लाको वीरगञ्ज महानगरपालिकाको वडा नं.९ घण्टाघरस्थित सडकखण्डबाट नक्कली नोटसहित दुईजना प्रहरीको नियन्त्रणमा परेका छन् । पर्साको वडा प्रहरी कार्यालय विर्ताबाट खटिएको प्रहरी टोलीले शंकास्पदरूपमा दुई जना अपरिचित व्यक्तिहरू पैदल हिंडिरहेको अवस्थामा उनीहरुलाई रोकी कानूनी रीत पुर्याई खानतलासी गर्दा उनीहरुबाट नक्कली नोट बरामद भएको हो ।
भारतको विहार राज्य अन्तर्गतको पश्चिमी चम्पारणको वेतिया भावल पञ्चायतमा बस्ने ३० वर्षीय पुरुष क्यामुदिन मियाँको साथबाट प्रहरीले नेपाली नक्कली रू.१००० दरको नोट १ थान बरामद गरेको छ् भने बारा जिल्लाको प्रसौनी गाउँपालिकाको वडा नं.२ बस्ने ४० वर्षीय महिला हलिमा खातुनको साथबाट प्रहरीले नक्कली नेपाली रु.१००० दरका १२२ थान नोट बरामद गरेको छ ।
उनीहरु दुवैजनाबाट जम्मा नेपाली रु.१,२३,०००।– ( एक लाख तेईस हजार ) बरामद गरी निजहरू दुवैजनालाई बरामद भएको नक्कली नोटसहित नियन्त्रणमा लिई मुद्रा सम्बन्धी कसूरमा थप अनुसन्धान अगाडि बढाइएको प्रहरीले जानकारी दिएको छ ।
