पाँच वर्ष अघि खुला दिसामुक्त घोषणा भएको पालिकामा बल्ल शौचालय निर्माण

सेयर गर्नुहोस्

पाँच वर्ष अघि खुला दिसामुक्त घोषणा भएको पालिकामा बल्ल शौचालय निर्माण

स्पर्श खबर जितपुर बारा फागुन १२ गते:

पाँच वर्षअघि खुला दिसामुक्त क्षेत्र घोषणा भएको बाराको महागढीमाई नगरपालिकाको मुसहर बस्तीमा बल्ल शौचालय निर्माण भएको छ । सरकारले हचुवाको भरमा खुला दिसामुक्त क्षेत्र घोषणा गरे पनि विपन्न मुसहर बस्तीका नागरिक शौचालयविहीन थिए ।महागढीमाई वडा नं २ को मुसहर बस्तीमा शौचालय नहुँदा केही महिना अघिसम्म त्यहाँका बासिन्दा खेतबारी, खोलानाला, झाडीमा शौच गर्न जाने गर्दथे । मुसहर बस्तीकी फुनदेवी पासवानले शौचालय नभएका कारण आफूहरू खुला स्थानमा शौच गर्न जाने गरेको तर नगर प्रहरीले लखेट्ने गरेको सुनाइन् ।महागढीमाई नगरपालिकाले २०७५/०७६ मै आफ्नो मातहतका ११ वटा वडालाई खुला दिसामुक्त घोषणा गरेको हो । खुला दिसामुक्त पालिका घोषणा गर्नुअघि नगरपालिकाले अति गरिब, विपन्न र दलित बस्तीमा शौचालय निर्माणका लागि रिङ, सिट प्यान लगायतका आवश्यक सामग्री निःशुल्क वितरण गरेको महागढीमाई नगरपालिकाका नगरप्रमुख उपेन्द्र यादव बताउँछन् ।सभार राताेपाटी ।हामीले २०७५ सालमा खुला दिसामुक्त क्षेत्र घोषणा गर्नु पूर्व नै गरिब, विपन्न र दलितहरूका लागि शौचालय निर्माणका लागि सम्पूर्ण सामग्री वितरण गर्‍यौँ । केहीले शौचालय बनाए, केहीले बनाएनन् । जसले बनाए, तिनीहरूले पनि पछि भत्काएर बाख्रा, पाडा बाँध्ने गोठ बनाएर पुनः खेतमै दिसा गर्न जान थाले,’ नगरप्रमुख यादवले भने ।पछिल्लो समय नगरप्रहरी खटाएर खेतबारी, खोलानालामा शौच गर्नेलाई  समातेर ल्याउने र सम्झा एर पठाउने गरेको उनको भनाइ छ।

हालै वडा नं २ को मुसहर बस्तीमा इस्लामिक रिलिफ क्यानडा र इस्लामिक रिलिफ नेपालको आर्थिक सहयोगमा जनजागरण युवा क्लब कलैयाले शौचालय र स्नान घर बनाएर त्यसको प्रयोगबारे सचेतना गराएपछि भने सकारात्मक परिवर्तन आएको छ । उनीहरूले पछिल्लो समय शौचालयको प्रयोग गर्ने, स्नानघरमा नुहाउने, आफू र आफ्नो वरपर सरसफाइ गर्न थालेका छन् ।

जनजागरण युवा क्लब कलैयाले सो मुसहर बस्तीका ४६ घरधुरीमा  शौचालय, पिउने पानीको धारा र ठाउँ ठाउँमा सामूहिक स्नानघर निर्माण गरिदिएको छ ।

मुसहर बस्तीकी कलहीदेवी राम एक/डेढ वर्ष अघिसम्म गाउँमा जताततै फोहोर र दुर्गन्ध हुने गरेको स्मरण गर्छिन् । ‘पहिला गाउँमा धेरै फोहोर थियो, शौचालय नहुँदा खोला, नदी, खेत, बाँसघारीमा जानुपर्थ्यो । नगर प्रहरीले लौरो लगाएर खेद्थ्यो,’ उनले भनिन्, ‘अहिले घरघरमै शौचालय भएपछि बालबच्चा पनि शौचालय जान्छन्, हाम्रो पनि इज्जत पनि बढेको छ ।’

जनजागरण युवा क्लब कलैयाका अध्यक्ष भैयाराम यादवले बाराको महागढी नगरपालिका र सुवर्ण गाउँपालिकाको दलित र मुस्लिम बस्तीमा संस्थाले शौचालय र स्नानघर निर्माण र प्रयोगबारे संस्थाले काम गरिरहेको बताए । उनले दलित, मुस्लिम र गरिब वर्गको आर्थिक सशक्तिकरण कसरी समाधान हुन्छ भन्ने उद्देश्यले उनीहरूलाई स्वरोजगार बनाउने कार्यक्रम सञ्चालन गरिएको बताए ।करिब १४ हजार घरधुरी, ५८ हजार जनसङ्ख्या रहेको महागढीमाई नगरपालिकामा १७ देखि १८ प्रतिशत दलित बस्ती रहेको नगरप्रमुख उपेन्द्र यादवले जनाए । उनले शौचालय नभएका दलितहरू बस्तीहरूमा नगरपालिकाले पुनः सहयोग गरेर शौचालय निर्माण गरिदिने बताए ।