वीर अस्पतालले अमानवीय व्यवहार गरेको अभियन्ता खानको आरोप
बलात्कारपछि हत्या गरिएकी सुमदरानीका लागि न्याय माग्दै आमा ललिता थारू(दायाँ) माइतीघरमा धर्नाका क्रममा, साथमा अभियन्ता रुबी खान(बायाँ) ।
स्पर्श खबर जितपुर बारा जेठ ३२ गते:
वीर अस्पतालको इमर्जेन्सीमा भर्ना भएकी अभियन्ता रुवी खानले चार दिन बित्दासमेत वार्डमा नसारेर आफूमाथि अमानवीय व्यवहार भएको गुनासो गरेकी छन् । काठमाडौंको माइतीघरमा आमरण अनशनका क्रममा बिरामी भएपछि उनी सोमबार अस्पताल भर्ना भएकी थिइन् ।
नेपालगन्जकी अभियन्ता खान निर्मला कुर्मीको अपहरण र हत्याका दोषीमाथि कारबाही, सुमदरानी थारूको बलात्कारपछि हत्या आरोपितलाई यथाशीघ्र पक्राउ गरी कारबाहीलगायत माग राखेर सात दिनदेखि आमरण अनशनमा छिन् । ‘अनशनको चौथो दिनदेखि अस्पतालमा भर्ना छु तर वार्डमा सारिएको छैन, बिरामीले किन अनशन बस्नुपर्यो जानुस् खाना खानुस् भनेर डाक्टरहरूले अमानवीय व्यवहार देखाए,’ उनले भनिन् ।
बिहीबार फेसबुकमा स्टाटस लेख्दै उनले अस्पतालका अधिकारीले सामाजिक आन्दोलनको मर्म र पीडा नबुझेको गुनासो गरेकी छन् । आफूलाई इमर्जेन्सी बेडमा भर्ना गरिए पनि शौचालय नजिक दुर्गन्धित ठाउँमा राखेको उनले बताइन् । ‘सात दिनसम्मको भोक र प्यासको पीडा पनि नबुझ्ने ? जबकि डाक्टरलाई राम्रोसँग थाहा छ कि आमरण अनशन बसेको व्यक्ति मात्र स्लाइनपानीको भरमा बाँचेको हुन्छ,’ उनले लेखेकी छन् ।
वीर अस्पतालका निर्देशक डा. सन्तोष पौडेलले हरेक बिरामीलाई सम्बन्धित चिकित्सकले हेर्ने भएकाले बुझेर मात्रै बताउन सक्ने बताए । ‘प्रहरीले जो पनि ल्याएर फ्यालिदिन्छ, इमर्जेन्सीमा हो भने त्यहींबाट हेरिएको होला,’ उनले भने । खानभन्दा गम्भीर प्रकृतिका बिरामी आएको खण्डमा पनि वार्ड नपाएको हुन सक्ने उनको भनाइ छ । ‘अनशन बसेपछि अटेन्सन खोज्ने पनि हुन्छन्, उहाँभन्दा सिरियस बिरामी भएकाले पनि डाक्टरले ध्यान नदिएका हुन् कि ? भोलि बिहान (शुक्रबार) बुझेर थाहा हुन्छ, साँच्चै बिरामी रहेछन् भने हेर्नै पर्ने हुन्छ,’ उनले भने ।
नेपाल मेडिकल काउन्सिलको इथिकल कमिटीका संयोजक डाक्टर कालुसिंह खत्रीका अनुसार कुनै पनि बिरामीलाई अस्पतालले भर्ना लिनका लागि कसैले जिम्मा लिनुपर्ने भएकाले खानलाई अस्पतालले भर्ना नलिएको हुन सक्ने बताए । उनका अनुसार स्वेच्छाले खाना नखाएको मानिसलाई के औषधि चलाउने र के नचलाउने भन्ने प्रोटोकल नेपालमा बनाइएको छैन ।सभार कान्तिपु दैनिक । अस्पताल भर्ना हुन चाहने र चिकित्सकले दिएको सल्लाह पनि नमान्ने भएपछि कुनै चिकित्सकले पनि भर्ना गर्न खोज्दैन, सँगै उहाँलाई केही भइहालेमा त्यसको जिम्मेवारी कसले लिने भन्ने पनि हुन्छ,’ उनले भने ।
