पूर्व माओवादी उपाध्यक्षसहित दर्जनौं एमालेमा प्रवेश, ‘काम गरेर देखाउने’ किसान श्रेष्ठको प्रतिबद्धता
मनाेज शाह जितपुर बारा माघ १९ गते:
बारा जिल्ला परवानीपुर गाउँपालिका वडा नं. ३ का पूर्व माओवादी पार्टीका उपाध्यक्ष इम्प्याज आलमसहित दर्जनौं कार्यकर्ताहरू नेकपा एमाले पार्टीमा प्रवेश गरेका छन्।
पार्टी प्रवेश कार्यक्रममा बोल्दै आलमले पूर्व माओवादी पार्टीले विवादित र गम्भीर आरोप लागेका व्यक्तिलाई उम्मेदवार बनाएपछि आफूहरू बाध्य भएर पार्टी त्याग गरेको बताए।
उनले भने, “जुन उम्मेदवारलाई टिकट दिइयो, त्यसका बुवा हत्या आरोपमा थुनामा पर्नुभएको थियो। त्यसैले हामीले पार्टी छाड्यौं।
एमाले देश बनाउने पार्टी भएको र एमाले जिते देश र समाज बन्ने विश्वासका साथ आफूहरू सामूहिक रूपमा प्रवेश गरेको उनको भनाइ थियो।
पार्टी प्रवेश गर्ने नेता–कार्यकर्तालाई बारा क्षेत्र नम्बर ४ का एमाले उम्मेदवार कृष्णकुमार श्रेष्ठ (किसान) ले माला, खादा र टीका लगाएर स्वागत गरेका थिए। सो अवसरमा उम्मेदवार श्रेष्ठले “हामी भाषणमा होइन, काम गरेर देखाउने पार्टी हौं। सुख–दुःखमा सधैं जनतासँगै रहनेछौं,” भन्दै जनताको सेवामा लाग्ने प्रतिबद्धता व्यक्त गरे।
कार्यक्रममा एमालेका केन्द्रीय सदस्य मोबिन आलमले राष्ट्रिय स्वतन्त्र पार्टीका अध्यक्ष रवि लामिछाने, बालेन शाह र क्षेत्र नम्बर ४ का उम्मेदवार रहबर अन्सारीलाई प्रश्न गर्दै एमसीसी, लिपुलेक, राजतन्त्र–लोकतन्त्र र धर्मनिरपेक्षताजस्ता राष्ट्रिय मुद्दामा किन मौन बसेको भन्दै आलोचना गरेका थिए।
