नेपालमा ‘अनर म्याजिक–६ प्रो’को प्रि–बुकिङ सुरु

नेपालमा ‘अनर म्याजिक–६ प्रो’को प्रि–बुकिङ सुरु स्पर्श खबर जितपुर बारा जेठ ७ गते: अनर म्याजिक’ शृंखलाको फ्ल्यागसिप मोबाइल ‘अनर म्याजिक–६ प्रो’ मोबाइल फोनको नेपाली बजारमा प्रि–बुकिङ सुरु भएको छ। नेपालका लागि अनरको आधिकारिक वितरक सेलट्रोन नेपालले बहुप्रतीक्षित एआई फ्ल्यागसिप मोबाइलको प्रि-बुकिङ खुला गरेको हो। मे २१ मंगलबारबाट सुरु भएको  प्रि-बुकिङ ३१ मेसम्म जारी रहने कम्पनीले … Read more

सवारी चेकजाँचकाे नाममा ट्राफिक प्रहरी गर्ने नौटङ्की बन्द गर्ने मुख्यमन्त्रीको चेतावनी

सवारी चेकजाँचकाे नाममा ट्राफिक प्रहरी गर्ने नौटङ्की बन्द गर्ने मुख्यमन्त्रीको चेतावनी

मनाेज शाह, जितपुर बारा, बैशाख १५ गते:

सवारी चेकजाँचकाे नाममा ट्राफिक प्रहरीले नौटङ्की गर्ने गरेको चारैतिरबाट गुनासो आएपछि मधेस प्रदेशका मुख्यमन्त्री सरोज यादवले आज एक कार्यक्रमका बीच ट्राफिक प्रहरीको यस्तो हर्कत चाँडै बन्द गर्ने चेतावनी दिनुभएको छ । बारा जिल्लाकाे जितपुरसिमरा उपमहानगरपालिका वडा २ सिमरा स्थित तराई यातायात व्यवसायी संघ सिमराकाे १७ औं साधारणसभा सम्पन्न भएको छ । कार्यक्रमका प्रमुख अतिथि मधेश प्रदेशका मुख्य मन्त्री सराेज यादवले दिप प्रज्ज्वलित गरेर कार्यक्रमको औपचारिक उद्घाटन गर्नु भएको थियो । मधेस प्रदेश यातायात व्यवसायी संघमा सबै समस्या सजिलोसँग हल गर्ने मुख्य मन्त्री यादवले दाबी गर्नुभयो । यातायातका सम्पुर्ण काम हुने गरी कार्यालयको विस्तार गरिने समेत उहाँले बताउनुभयो । ढुवानीका समयमा प्रहरीले दिने उल्झन न्युनिकरणमा पहल गरिदिने र यातायात कार्यालयमा हुने घुसखोरीलाई समेत नियन्त्रण गर्नका लागि तत्काल काम गर्ने उहाँले बताउनुभयो ।

तराई यातायात ब्यवसायी संघ सिमरा बाराका अध्यक्ष ओमकृष्ण कार्कीको अध्यक्षतामा उक्त कार्यक्रम सम्पन्न भएको थियोे । कार्यक्रममा बिशिस्ट अतिथिको रुपमा बारा क्षेत्र ४ का प्रतिनिधिसभा सांसद किसान श्रेष्ठ, बारा क्षेत्र १ का प्रतिनिधिसभा सदस्य अच्युत मैनाली, पूर्व संविधान सभा सदस्य फर्मुला मंसुर, मधेश प्रदेशकी श्रम तथा यातायात मन्त्री बेची लुङ्गेली, नेपाल यातायात ब्यवसायी राष्ट्रिय महासंघका वरिष्ठ उपाध्यक्ष सरोज सिटौला, नेपाल ट्रक यातायात ब्यवसायी राष्ट्रिय महासंघका अध्यक्ष हिरालाल श्रेष्ठ, महासचिव रोजेन्द्रविक्रम बानियाँ , मधेश प्रदेशसभा सदस्य देवनारायण चौधरी, मन्जु थापा मगर, मधेस प्रदेश सभाका पूर्व सभासद सुन्दर विश्वकर्मा लगायतको सहभागिता रहेको थियोे । कार्यक्रमकाे सहजीकरण पत्रकार सुनिल गाउँलेले गर्नु भएको थियो ।

चितवन राष्ट्रिय निकुञ्जभित्रको सडक मर्मत सुरु

चितवन राष्ट्रिय निकुञ्जभित्रको सडक मर्मत सुरु

स्पर्श खबर जितपुर बारा चैत २९ गते:

चितवन राष्ट्रिय निकुञ्जभित्रको सडक मर्मत सुरु गरिएको छ। भरतपुर–माडी–ठोरी सडकअन्तर्गत निकुञ्जभित्रको बाटो बिग्रिएपछि मङ्गलबारदेखि मर्मत गर्न थालिएको हो।

माडी नगरपालिकाकी प्रमुख ताराकुमारी काजी महतोले नगरपालिकाको पहलमा सडक डिभिजन भरतपुरले बाटो मर्मतको काम थालेको बताइन्। “रिउ पुलबाट कसरासम्म मङ्गलबारदेखि मर्मत सुरु भएको छ”, उनले भने, “सडक डिभिजनसँग मर्मतका लागि केही बजेट रहेछ, त्यसबाटै हुन लागेको हो।”

चैतेदसैँको अवसरमा चितवन राष्ट्रिय निकुञ्जभित्र लाग्ने विक्रम बाबाको मेला पनि सुरु भइसकेको छ। उनले माडीका बासिन्दालाई मेला आउनका लागि सडक मर्मतपछि सहज हुने बताए। हुलाकी सडकखण्डअन्तर्गत पर्ने यो सडक माडीबाट भरतपुर आउने एकमात्र सडक हो। निकुञ्जभित्रको यो सडकमा यात्रा गर्दा वन्यजन्तुको समेत जोखिम हुन्छ।

निकुञ्जभित्रको बाटो कालोपत्र गर्न नगरपालिकाले निरन्तर पहल गर्दै आएको छ। निकुञ्जको कानुनी अड्चनका कारण यो सडक कालोपत्र हुनसकेको छैन। यो सडक हुँदै दैनिक सयौँ यात्रु ओहोरदोहोर गर्ने गर्छन्।रासस

सुनको मूल्य  उच्च, चाँदीको स्थिर

सुनको मूल्य  उच्च, चाँदीको स्थिर

 

मंगलबार सुनको मूल्य प्रतितोला एकसय रूपैयाँले बढेर उच्च बिन्दुमा पुग्दा चाँदीको मूल्यमा भने कुनै घटबढ भएको छैन।

स्पर्श खबर जितपुर बारा चैत २७ गते:

 मंगलबार सुनको मूल्य प्रतितोला एक लाख ३६ हजार तीन सय रूपैयाँ पुगेको छ, जुन हालसम्मकै उच्च हो।

यो साता लगातार बढेर रेकर्ड बनाइरहेको सुनको मूल्य मंगलबार पनि सामान्य बढ्दा हालसम्मकै उच्च कायम भएको हो।

प्रतितोला एकसय रूपैयाँले बढेर तेजाबी सुनको मूल्य आज प्रतितोला एक लाख ३५ हजार ६ सय ५० रूपैयाँ कायम छ।

आइतबार एकैदिन प्रतितोला दुई हजार ९ सय रूपैयाँले बढेर कीर्तिमानी मूल्यमा पुगेको सुन सोमबार पनि प्रतितोला ६ सय रूपैयाँले महँगिएर हालसम्मकै उच्च प्रतितोला एक लाख ३६ हजार दुईसय रूपैयाँ कायम थियो।

पछिल्लो समय लगातार बढिरहेको चाँदीको मूल्य भने आज स्थिर रहेको नेपाल सुनचाँदी व्यवसायी महासंघले जनाएको छ।

महासंघका अनुसार चाँदी आज प्रतितोला एक हजार ६ सय ८५ रूपैयाँमा कारोबार भइरहेको छ। चाँदी सोमबार पनि सोही मूल्यमा कारोबार भएको थियो।

यो साता आइतबार प्रतितोला ५५ रूपैयाँले बढेको चाँदी सोमबार प्रतितोला १५ रूपैयाँले महँगिएको थियो।

पर्साको विभिन्न स्थानबाट ४ लाखभन्दा बढी मूल्यको विविध सामग्रीहरु प्रहरीद्वारा जफत

पर्साको विभिन्न स्थानबाट ४ लाखभन्दा बढी मूल्यको विविध सामग्रीहरु प्रहरीद्वारा जफत

 

मनोज शाह, जीतपुर बारा, चैत्र १९ गते

भारतबाट भन्सार छली चोरी पैठारी गरी नेपाल भित्र्याइएको ४ लाखभन्दा बढी मूल्य बराबरको विविध सामग्रीहरु पर्साको वीरगन्ज महानगरपालिकाको विभिन्न स्थानहरुबाट प्रहरीले बरामद गरी नियन्त्रणमा लिएको छ । विशेष सूचनाको आधारमा जिल्ला प्रहरी कार्यालय पर्साबाट खटिएको टोलीले ४ लाख ८९ हजार ८ सय ५० मूल्य बराबरको सामानहरु आफ्नो नियन्त्रणमा लिएको हो ।

 

पर्साको वीरगन्ज महानगरपालिकाको वडा नं. १६ नगवास्थित सडकखण्डबाट ८८९ के.जी. हरियो खुर्सानी, २३५० के.जी. गोलभेडा, ३५०० के.जी. कटहर गरी २ लाख ८१ हजार साठी रुपियाँ मूल्य बराबरको तरकारीहरु प्रहरीले नियन्त्रणमा लिएको जनाएको छ । यसैगरी भारतबाट भन्सार छली चोरी पैठारी गरी अनधिकृतरुपमा जम्मा गरी राखेको २३०० के.जी. मैदा, १२८ के.जी. पापड, ६९७ मिटर सुरुवालको थान कपडा गरी २ लाख ८ हजार ७ सय ९० मूल्य बराबरको सामग्रीहरु वीरगन्ज महानगरपालिकाको वडा नं.१ छपकैयास्थित सडकखण्डबाट प्रहरीले नियन्त्रणमा लिएको जनाएको छ । नियन्त्रणमा लिइएको सम्पूर्ण सामानहरु आवश्यक कारवाहीको लागि वीरगन्ज भन्सार कार्यालय पर्सामा बुझाइएको प्रहरीले जानकारी दिएको छ ।

नेरुडे मिर्मिरे लघुवित्त बित्तीय संस्था लिमिटेडद्वारा केन्द्र प्रमुख गोष्ठी तथा वित्तीय साक्षरता कार्यक्रम सम्पन्न

नेरुडे मिर्मिरे लघुवित्त बित्तीय संस्था लिमिटेडद्वारा केन्द्र प्रमुख गोष्ठी तथा वित्तीय साक्षरता कार्यक्रम सम्पन्न

 

मनोज कुमार शाह,जीतपुर बारा, चैत्र ८ गते

नेरुडे मिर्मिरे लघुवित्त बित्तीय संस्था लिमिटेडले उपशाखा कार्यालय बर्दिबासमा प्रमुख गोष्ठी तथा वित्तीय साक्षरता कार्यक्रम सम्पन्न गरेको छ । कार्यालयको कार्य क्षेत्रभित्रका केन्द्र प्रमुखहरुलाई संस्थाको नियम अनुसार दिइने वार्षिक केन्द्रको परिचालन, संस्थाको नीति, नियम, कर्जा, बचत तथा वित्तीय साक्षरताका साथै बैंकिङ्ग कारोबारसम्बन्धी जानकारी दिइएको थियो । यसका साथै कर्जाको भाखा नाघ्न नदिने, कालो सुचीमा पर्ने बारे सचेतना जगाइएको थियो । नेपाल राष्ट्र बैंकबाट ‘घ’ बर्गलाई गरेको निर्देशन र सदस्यहरुलाई उद्यमशील बन्नका लागि आवश्यक पर्ने विभिन्न सिपमूलक तालिमहरु लगायतका विषयहरुका बारेमा जानकारी गराउने उद्देश्यले कार्यक्रमको आयोजना गरिएको संस्थाका प्रमुख राजेश कुमार खाँले स्पर्श खबरलाई बताएका छन् । उक्त कार्यक्रममा १०० जना भन्दा बढी सदस्य साथै अभिभावकहरुको बाक्लो उपस्थिति रहेको थियो ।

 

बालबालिका र युवाहरुमा वित्तीय साक्षरता अभिवृद्धि गर्दै, वित्तीय ज्ञान, सीप र मनोवृत्तिको विकास गर्ने, बचत गर्ने बानीको बिकास गर्ने, वित्तीय अनुशासनको पालना गर्ने उद्देश्यले सन् २०२४ मार्च १८ देखि २४ अर्थात् वि.सं. २०८० चैत्र ५ देखि ११ गतेसम्म संचालन भएको उक्त कार्यक्रममा प्रमुख अतिथिको रुपमा त्यसै नेरुडे मिर्मिरे लघुवित्त वित्तीय संस्था लिमिटेड प्रदेश कार्यालय बर्दिबासका प्रदेश प्रमुख श्री बिक्रम शाह ज्यूले वित्तीय अराजकता फैलाउनेहरुको पछि नलाग्न तथा कर्जाको दुरुपयोग नगरी आफ्नो वित्तीय अनुशासन नबिगार्न समेत सबैलाई सुझाव दिएका थिए ।

मिटर ब्याजको फन्दाबाट उम्कन मुस्किल

मिटर ब्याजको फन्दाबाट उम्कन मुस्किल”


मनोज  शाह, जीतपुर बारा,चैत्र  ८ गते

बैंक र वित्तीय संस्थाले कडाइ गरेपछि अनौपचारिक स्रोतबाट अनेकन सर्त मानेर लिएको ऋण तिर्नै नसक्ने परिस्थितिमा पुगेपछि मानिसहरु आत्महत्या गर्न अग्रसर हुने घटना बढेका छन् । बारा जिल्लाकी कलिता देवीले मिटर ब्याजबारे आफ्नो विचार राख्दै भनिन् , ‘मिटर ब्याजमा पैसा लगाउने अनि ऋणीले भनेको समयमा तिर्न नसके मिटर ब्याज डबल–तेब्बर बनाउने र ऋणीलाई मर्न बाध्य बनाउने गिरोहको आपराधिक गतिविधि अत्यधिक बढेको छ ।’ उनले आफ्नो विचार थप्दै जितपुरसिमरा उपमहानगरपालिकामा मिटर ब्याज अत्यधिक बढेको छ भन्ने कुराकाे समेत जानकारी गराइन् । एक पूर्व प्रहरीले आफ्नो अनुभवका आधारमा मिटर ब्याजको धन्दा सतहमा नदेखिए पनि भित्रभित्रै फैलिएको बताए । उनले मिटर ब्याजकै कारण कैयन् मानिस डिप्रेसनको चरम विन्दुमा पुगेको अनुमान सुनाए । उनले भने, ‘चेक बाउन्सका कैयन् घटनाभित्र मिटर ब्याजको कथा भेटिन्छ ।’ एक अर्का पीडितले मिटर ब्याजले आफू बर्बाद भएको र ढुकुटीको चक्करमा परेर ४९ लाख रुपैयाँ, तीनतले घर र दुई कट्ठा जमिन गुमाएको बताइन् ।

अनौपचारिक स्रोतहरूबाट अनेकन सर्त मानेर ऋण लिने अनि सर्तहरूमा जेलिएर कर्जा तिर्नै नसक्ने परिस्थितिमा पुगेर आत्महत्या गर्न अग्रसर हुने घटनामा कमी आएको देखिँदैन । नेपाल राष्ट्र बैंक ऐनको दफा ७६ ले राष्ट्र बैंकको अनुमतिबिना निक्षेप लिन तथा कर्जा प्रवाह गर्न पाइँदैन भन्ने नियम भएपनि अनौपचारिक अर्थतन्त्रको फैलावट बढ्दै जाँदा मिटर ब्याजको धन्दा चलाउनेहरूको संख्या बढ्दो देखिन्छ ।

 

नेपाल राष्ट्र बैंकका पूर्वकार्यकारी निर्देशक नरबहादुर थापा कर्जाका लागि मिटर ब्याजीको शरणमा पर्ने र चर्को ब्याजदरका कारण सर्वसाधारणले आत्महत्या गर्नुपर्ने घटनालाई बुझ्न सर्वसाधारणको वित्तीय पहुँचका लागि राज्यले के गर्‍यो भन्ने प्रश्नको उत्तर खोज्नुपर्ने बताउँछन् । उनका अनुसार पछिल्ला वर्षहरूमा सुरु भएको बैंकहरूको मर्जर प्रणाली र कर्जा दिने सर्तहरूमा गरिएको परिवर्तनले सर्वसाधारणलाई बैंकबाट कर्जा पाउन मुस्किल बन्दै गएको छ । उनले मर्जर नीतिपछि ८८ वटा विकास बैंक २५ मा झरेको र ७९ वित्त कम्पनी मर्ज भएर २२ मा झरेको बताए । उनले भने, ‘वित्तीय संस्था र बैंकहरू विकेन्द्रीकरण हुनुपर्नेमा केन्द्रीकृत भए । वित्तीय स्थायित्व भन्दै हामी मर्जरतिर गयौं ।’ उनको बुझाइमा एक समय मध्यम वर्गमा रहेकाहरूले बैंकबाट धितो राखेर कर्जा लिने गरेर आफ्नो आर्थिक अवस्था सुधारेका थिए । पछिल्लो समय त्यसमा कडाइ गरिएकाले ठूलो संख्यामा सर्वसाधारण अनौपचारिक क्षेत्रबाट ऋण लिन थाले ।

 

एक पूर्व बैकरले हङकङ, सिंगापुरजस्ता सिटी स्टेटमा लागू हुने वित्तीय मापदण्ड नेपालमा लागू गरिरहेको टिप्पणी गरे । पछिल्ला चार–पाँच वर्षयता हामीले वित्तीय क्षेत्रलाई संकुचित गर्दै लगेका छौं,’ उनले भने, ‘यसले सर्वसाधारणलाई कर्जा लिनका निम्ति साहु–महाजन वा मिटर ब्याजीकहाँ जानुपर्ने परिस्थिति निर्माण गरिदियो ।’

 

नेपाल प्रहरीका प्रवक्ता डीआईजी शैलेश थापा क्षेत्रीले मिटर ब्याजीको धन्दा चलाउने सर्लाहीका श्याम प्रदेशी पक्राउ परेको दृष्टान्त सुनाउँदै भने, ‘तोकिएको भन्दा धेरै ब्याजमा रकम चलाउने काम गैरकानुनी हो र यसमा संलग्नहरू पक्राउ पर्छन् नै ।’ डीआईजी क्षत्रीले कर्जा पाइयो भन्दैमा लिइहाल्ने अनि जस्तोसुकै सर्त मानेर पनि कर्जा लिने गर्दा मिटर ब्याजीको फन्दामा पर्ने गरेको बताए । उनले भने, ‘मिटर ब्याजीको फन्दामा पर्ने र आत्महत्या गर्ने वा त्यो विन्दुसम्म पुग्न बाध्य भएकाहरू कति छन् भन्नेबारे विस्तृत अध्ययन गर्नुपर्ने खाँचो देखिन्छ।

 

बारामा पनि बर्षाै देखि मिटर ब्याजकाे गैर कानुनी धन्दा राम्रैसंग फस्टाएकाे छ। यहाँका अधिकांश मिटर ब्याजी अपराधीहरूले आफ्नाे नाम पनि भगवानकाे नाम मै राखेका छन् । यिनले भगवानलाई समेत छाडेनन्। नाम पनि कृष्णा, बलिराम, राम बाबु, लालबाबु, कन्हैया, गाेपाल, गणेश, नारायण आदि जस्ता राखेका छन् भने काम धन्दा चाहिँ कंश र रावण भन्दा पनि निच र तल्लाे स्तरका गर्ने गरेका छन् ।

 

बाराका अधिकाशं शहरहरू कलैया, जीतपुर, सिमरा, निजगढ र काेल्भी लगायतका ठाउँमा यस्ता थुप्रै मिटर ब्याजी अघाेषित अपराधीहरू समाजमा राम्रै इज्जत,सम्मान, धाक धम्की तथा ऐस आरामकाे जीवन बिताइरहेका छन्। कलैयाका महेश सहनीका अनुसार उनले साेही ठाउँका एक प्रतिष्ठित र राम्राे राजनीतिक पकड भएका मिटर ब्याजी साहुसंँग रू. ५,००,०००/ लिएर जम्मा रू १४,००,०००/ मा एउटा माल बाहक गाडी किनेका थिए । अहिले ५ वर्षकाे अन्तरालमा उनले ब्याजकाे स्याजकाे प्याज गरी कति रकम साहुलाई बुझाए त्यसकाे यकिन लेखाजोखा नभएता पनि उनले आफु संग भएकाे बाईक बेचे, भएकाे पुर्ख्यौली जमिन समेत बेचे, श्रीमतीकाे गहनासम्म बेचे तर साहुकाे ऋण चुक्ता भएन। अन्त्यमा त्यही गाडी साहुकारकाे जिम्मा लगाएर त्याे भन्दा अरू सम्पति आफूसंग नरहेकाे भन्दै साहुकारसंग हात जाेडी विन्ती गरे । तर सहुकारले गाडीले आफ्नाे साँवा मात्रै असुल हुने भनी यस महिनाकाे ब्याज अपुग भएकाे जनाए । सहनीले आफ्नाे हातमा भएकाे सामसुङकाे माेबाइल समेत बुझाएर त्यहाबाट हिँडे ।

 

त्यसै गरी जीतपुरका एक जना कपडा व्यापरीले नाम नबताउने शर्तमा आफ्नाे ब्यापारमा घाटा भएपछि बैंककाे किस्ता बुझाउन मिटर ब्याजी साहु संग बजारकाे १ प्रतिशतमा (एक हप्ता दुई बजार हुन्छ।यस हिसाबले महिनाकाे ८% हुन जान्छ। सरल भाषामा एक लाखकाे महिनाकाे आठ हजार बुझ्नुस्) लिएर बैंकलाई किस्ता बुझाएको बताए । ब्यापारमा सुधार नआएकाेले पछिल्लाे दिनहरूमा बैंक तथा मिटर ब्याजकाे पनि ब्याज बुझाउन पटक पटक थप ऋण लिए। पछि ब्यापारमा केही सुधार भएपछि सबैकाे ब्याज र साँवा अलि अलि गर्दै तिरिरहे। जब उनलाई यो महसुस भयो कि अब जति गरे पनि याे मिटर ब्याजकाे ऋण कमाएर तिर्न सक्दिनँ तब आफ्नै नाममा रहेकाे जीतपुर बजारकाे ६ लेन राेडमै रहेकाे मल्टिस्टाेर भवन बेच्न खाेजे । उनले सो भवन बेच्न खोज्दा मिटर ब्याजीहरूले आफैले बनाएकाे ऋणको डब्बलकाे कपाली कागज र ब्ल्याङ्क चेकमा आफू खुशी रकम भरी अदालत मार्फत राेक्का गराएकाे दुखेसाे सुनाए ।

 

मिटर ब्याजीहरूकै समाजमा दबदबा रहेको उनले बताए । जबसम्म उनीहरूकाे पञ्जामा परिन्न तबसम्म उनीहरूलाई चिन्न सकिन्न किनकी उनीहरुले कहीँ राजनीतिको माहिर खेलाडीको मुकुन्डो लगाएका छन् त कसैले समाजसेवीकाे ट्याग भिरेका छन् । हात्तिकाे खाने दाँत र देखाउने दाँत फरक भए झैं यस्ता मिटर ब्याजीकाे पनि समाजका अगाडि देखाउने व्यवहार र व्यक्तिगतरुपमा प्रस्तुत हुने व्यवहारमा फरक फरक भूमिका हुन्छ। समाजका वास्तविक खलनायक यिनीहरू हुन् । फिल्मकाे खलनायक यिनका अगाडि फ्लप छन्।

 

हुन पनि हाे यस्ता ताकतवर र पहुँच भएका मिटर ब्याजीकाे विरूद्धमा कसैले जाहेरी किटानी दिन मान्दैनन् । भित्र भित्रै पिराेलिएर पीडितहरू अन्त्यमा आफ्नो जीवन अन्त्य गर्ने बाटाे नै राेज्दै छन् । सरकारले यस्ता कुपिशाच र राक्षसरूपी समाजका धमिराहरूकाे पहिचान गरी कानुनी कठघरामा उभ्याउन जरूरी छ।
अनि मात्र यस्ता अनैतिक र अनुचित लेनदेनकाे आपराधिक गतिविधिमा लगाम लगाउन सकिन्छ। हाेइन भने केही साेझा साझा र समाजमा ऐंचाे पैंचाे चलाउनेलाई मिटर ब्याजी पीडक भनी सताउने काम भएकाेले अहिले अति आवश्यक खाँचो र जरूरी पर्दासमेत गाँउघरमा पैसा नपाउने स्थिति आइसकेको सरकारकाे कार्वाहीमा अधिकांश कुख्यात मिटर ब्याजीहरू परे तापनि केही सिधा साधा व्यक्तिहरू जसले आवश्यकता परेकाे बखत ऐंचाे पैंचाे चलाए, यस्ता ब्यक्तिहरूलाई समेत नियतवस फसाइएकाे खबर पनि सुनेकै छाैँ । यी र यस्तै कुराहरुले गर्दा आज समाजमा एक अर्कालाई आर्थिकरूपमा सर सापट चलाउन पनि गार्हाे छ।

चुरियामाई मन्दिर तथा सुरुङ्ग संरक्षण एवम् व्यवस्थापन समितिको तेश्रो अधिवेशन सम्पन्न : चुरियामाई सिमानाबारे कार्यक्रममै चर्कियो विवाद, चुरियामाई मन्दिर बारा वा मकवानपुरमा पर्नेबारे अझै अस्पष्ट

चुरियामाई मन्दिर तथा सुरुङ्ग संरक्षण एवम् व्यवस्थापन समितिको तेश्रो अधिवेशन सम्पन्न : चुरियामाई सिमानाबारे कार्यक्रममै चर्कियो विवाद, चुरियामाई मन्दिर बारा वा मकवानपुरमा पर्नेबारे अझै अस्पष्ट

 

मनोज  शाह, जीतपुर बारा, चैत्र ६ गते

 

मकवानपुरको हेटौंडा उपमहानगरपालिका १५ मा अवस्थित नेपालकै चर्चित एवम् धार्मिक, सांस्कृतिक तथा पर्यटकीय महत्त्व बोकेको चुरियामाई मन्दिरको विकास, संरक्षण एवम संवर्द्वनको लागि गठित चुरियामाई मन्दिर तथा सुरुङ्ग संरक्षण एवम् व्यवस्थापन समितिको तेश्रो अधिवेशन आज भव्यताका साथ सम्पन्न भएको छ । श्री प्रेमबहादुर बम्जन राईको अध्यक्षतामा सम्पन्न भएको अधिवेशनमा प्रमुख अतिथि बाग्मती प्रदेशको सामाजिक विकास मन्त्री माननीय कुमारी मोक्तान हुनुहुन्थ्यो भने विशिष्ट अतिथिमा हेटौंडाको मेयर मीना कुमारी लामा, जीतपुरसिमरा उपमहानगरपालिकाको मेयर राजन पौडेलको उपस्थिति रहेको थियो । कार्यक्रममा मधेस प्रदेशका पूर्व सांसद माननीय श्री सुन्दर विश्वकर्मा विशेष अतिथिको रुपमा पाल्नुभएको थियो ।

 


चुरियामाई मन्दिर तथा सुरुङ्ग संरक्षण एवम् व्यवस्थापन समितिको तेश्रो अधिवेशनले १३ सदस्यीय नयाँ कार्यसमितिको गठन गरेको छ । नव निर्वाचित कार्यसमितिमा अध्यक्ष पदमा प्रेमबहादुर बम्जन, उपाध्यक्षमा सन्तलाल स्याङ्तान र राजकुमार साह चयन भएका छन् । यसैगरी सचिवमा सिंहबहादुर वि.क., सहसचिवमा सरस्वती सिलवाल तथा कोषाध्यक्षमा चमेली पुलामी मगर निर्वाचित भएका छन् भने सदस्यहरुमा राम कुमार, राजकुमार लामा, बुद्धिमाया घलान, राजु नगरकोटी, प्रीतम राना, राम कुमार पुलामी, बाबुकाजी निर्वाचित भएका छन् ।

 

कार्यक्रममा बोल्ने क्रमामा वक्ताहरुबीच बारा तथा मकवानपुरबीचको जिल्ला सिमानाबारे चर्काचर्की भएको थियो । यसका साथै धार्मिक तथा पर्यटकीय गन्तव्यको रुपमा रहेको चुरियामाई मन्दिर मधेस प्रदेशको बारा जिल्लामा पर्ने कुरामा केही वक्ताहरुले जोड दिएका थिए भने केही वक्ताहरुले धार्मिक आस्थाको केन्द्रको रुपमा रहेको चुरियामाई मन्दिर बागमती प्रदेशको मकवानपुर जिल्लामै पर्ने कुरामा जोड दिएका थिए । सिमाना विवादलाई यथाशीघ्र टुङ्गो लगाउनुपर्ने कुरामा जोड दिँदै जीतपुरसिमरा उपमहानगरपालिकाका मेयर राजन पौडेलले पर्सा राष्ट्रिय निकुञ्ज तथा चुरियामाई मन्दिर क्षेत्रलाई परापर्यटनको रुपमा विकास गर्न तथा पर्यटकीय गन्तव्य एवम् धार्मिक आस्थाको केन्द्रको रुपमा विकास गर्नको लागि हेटौंडा र जीतपुर उपमहानगरपालिकाको साथै बागमती प्रदेश र मधेस प्रदेशबीच सहकार्य आवश्यक रहेको कुरामा जोड दिनुभयो ।

 

KTM 250DUKE GEN-3 मोटरसाईकल नेपाली बजारमा,वीरगंजमा पुर्वमन्त्री वेगमले गरिन सार्वजनिक

KTM 250DUKE GEN-3 मोटरसाईकल नेपाली बजारमा,वीरगंजमा पुर्वमन्त्री वेगमले गरिन सार्वजनिक

 

पवन प्रसाद साह वीरगंज चैत ५ गते:

KTM 250DUKE GEN-3 मोटरसाईकलको आज एक बिशेष कार्यक्रमका बिच वीरगंजमा पनि सार्वजनिक गरिएको छ ।

जनमत पार्टीका केन्द्रिय सदस्य एवं पुर्व कृषि राज्यमन्त्री करिमा वेगमले केक र रिबन काटेर सो मोटरसाईकल सार्वजनिक गर्नुभयो ।  ७ लाख ३९ हजार नौ सय मुल्य रहेको सो मोटरसाईकल ५० प्रतिशत डाउन पेमेन्टमा लिन सकिने ईनाया ट्रेडिङ्गका संचालक  साहिद प्रवेजले बताए । KTM 250DUKE GEN-3  मोटरसाईकल देशै भरि आज दिउँसो एक बजे सार्वजनिक गरिएको संचालक साहिद प्रवेजले बताए । प्रवेजले जेन ३ भर्जन नेपाली बजारमा सिमित अवधिको लागि मात्र ७ लाख ३९ हजार नौ सय मा उपलब्ध रहेको बताए ।

KTM 250DUKE GEN-3मा रेस ईन्सपाईड लाईन, स्पेर्टि लुक्स, नयाँ च्यासिस, स्टिल ट्रेलिस फ्रेम,लाईटवेट व्हिल,हाई पर्फमेन्स ब्रेक जस्ता बिशेषता रहेको कम्पनीले जनाएको छ । साथै यस बाईकमा  रियर मेनेशक, कर्भड कास्ट आल्मुनियम स्वीङ्ग आर्म, अफसेट डब्लुपि एपेक्स शक पनि समावेश गरिएको छ । जसले ईम्प्रुभ्ड हान्डलिङ्ग पाउन सकिन्छ भने फोर पिस्टन रेडियल क्यालिपर्स र सुपरमेट एविएसले उत्कृष्ट ब्रेकिङ्ग प्रदान गर्दछ । हन्सराज हुलासचन्द एण्ड कम्पनी प्रा.लि.का सहायक महाप्रबन्धक बिजय श्रेष्ठले  नयाँ जेनेरेशनको KTM 250DUKE GEN-3  नेपाली बजारमा सार्वजनिक भएसंगै नेपालका मोटरसाईकल पारखीहरुका लागि नयाँ अनुभव प्रदान हुने दावी गरे ।

ईच्छुक ग्राहकहरुले नेपाल भरिका सवै केटिएम शो रुमबाट बाईक लिन सकिने कम्पनीले जनाएको छ । वीरगंजमा यो बाईक खरिदको लागि हुलास फाईनान्सले फाईन्स गर्ने लोन अफिसर रविकान्त चौरसियाले बताए ।

कार्यक्रममा फाईनान्सका रिजनल अफिसर रुपेश साह, ईनाया टे«डिङ्गका कर्मचारी लगायत संचारकर्मीहरुको उपस्थिती रहेको थियो ।

पर्सामा मालवाहक ट्रक प्रहरीको नियन्त्रणमा

पर्सामा मालवाहक ट्रक प्रहरीको नियन्त्रणमा

 

मनोज  शाह, जीतपुर बारा, चैत्र ४ गते

 

पर्साको वीरगंजबाट काठमाडौंतर्फ जान लागेको विभिन्न सामानहरु लोड भएको मालवाहक ट्रक प्रहरीले चेकजाँच गर्ने क्रममा नियन्त्रणमा लिएको छ । चैत्र २ गतेका दिन प्रहरीले विशेष सूचनाको आधारमा चेकजाँच गर्ने क्रममा उक्त ट्रकमा बिल बिजकभन्दा बढी सामानहरु लोड भएको पाइएको थियो । वीरगंजबाट काठमाडौंतर्फ जान लागेको ना.६ ख. ५२५४ नम्बरको ट्रकमा बिल बिजकभन्दा बढी हार्डवेयर सामानहरु लोड भएको तथा सो बिल बिजक शंकास्पद देखिएको हुँदा प्रहरीले ट्रकलाई आफ्नो नियन्त्रणमा लिएको पर्साका प्रहरी नायब उपरीक्षक कुमार विक्रम थापाले स्पर्श खबरलाई जानकारी दिनुभयो ।

 

विशेष सूचनाको आधारमा चैत्र २ गते राति ५:३० बजेको समयमा चेकजाँच गर्दा उक्त ट्रकबाट बिल बिजकभन्दा बढीको Power Bank, Ear Buds लगायतका बिलमा उल्लेख भए बमोजिम अ.मु.रु. १,९१,७८,६८१ ।- (एक करोड एकानब्बे लाख अठहत्तर हजार छ सय एकासी रुपियाँ) बराबरको ईलेक्ट्रोनिक्स सामानहरु नियन्त्रणमा लिई थप अनुसन्धान तथा कारवाहीका लागि चैत्र ४ गतेका दिन राजश्व अनुसन्धान कार्यालय पथलैया, बारामा बुझाइएको प्रहरी नायब उपरीक्षक कुमार विक्रम थापाले स्पर्श खबरलाई जानकारी दिनुभयो ।