स्ववियु निर्वाचन : चितवनका क्याम्पसमा विद्यार्थी संगठनले लगाएका ताला प्रहरीले हटायो

सेयर गर्नुहोस्

चितवन, फागुन ३०–

स्वतन्त्र विद्यार्थी युनियनको निर्वाचनका क्रममा जिल्लाको ११ क्याम्पसमा विद्यार्थी संगठनहरुले विभिन्न बहानामा लगाएका ताला प्रहरीले हटाएको छ । बिहान ६ बजेसम्म पनि विद्यार्थी संगठनले आफुले लगाएका ताला नहटाएपछि प्रहरीले ताला फोरेको हो ।

जिल्ला प्रशासन कार्यालयमा हिजो बसेको राजनीतिक दल र सुरक्षा निकायको बैठकले स्ववियु निर्वाचन शान्तिपूर्ण रुपमा सम्पन्न गर्ने निर्णय गरेको थियो । सोहि अनुसार विभिन्न दलका विद्यार्थी संगठनले क्याम्पसहरुमा लगाएको ताला आज बिहान ६ बजेसम्म खोल्न सम्बन्धित दलले निर्देशन दिने बताइएको थियो ।

प्रशासनले पनि एक सूचना जारी गरी तालाबन्दी हटाउन अनुरोध गरेको थियो । दलको निर्देशन र प्रशासनको आग्रहपछि पनि ताला नखोलिएपछि प्रशासनले प्रहरी लगाएर ताला फोरेको जिल्ला प्रशासन कार्यालय चितवनका सूचना अधिकारी आनन्दवंश न्यौपानेले जानकारी दिए । आगामी चैत ५ गते स्ववियु निर्वाचन हुँदै छ ।